報告各位得閒就會過大海食下好西嘅大大，澳門漁人碼頭嗰邊開咗間大型嘅巴西燒烤餐廳，有西籍大廚助陣，餐廳兩層高，一層主打海鮮、一層主打烤肉，而且仲有無敵大海景，好彩嘅話仲有機會睇到中華白海豚添呀，開飯仔見過，真係見過，拍咗片~

呢間巴西傳統炭火燒烤餐廳，應該算係港澳地區最大型嘅一間，上層「烤」為主題，有個56吋大嘅全炭火烤肉爐，用炭火慢烤嘅方式處理各式嘅肉類，保留最原始嘅肉汁同鮮味。啲肉烤好之後，就會有打扮成cow boy咁嘅員工捧出，想食嘅話向佢哋示意，佢哋就會原串喺你面前切落嚟喇！牛、豬、雞等等都有！

BTW，巴西人好鍾意食肉，特別係食佢哋嘅原汁原味，所以喺枱面都唔多覺有啲咩醬汁用嚟點，但係啲肉全部用岩鹽調過味，都好夠味的了。

前菜嘅芝士波波同炸香蕉等等都好香口，不過食多幾粒就好易飽喇科科。

出面亦有自助餐區，有多款亞洲、歐洲同巴西風味嘅沙律、冷盤、飯麵等等，任食。

食晒肉之後，記得仲要留肚食甜品喎！烤菠蘿呀！好鬼吸引，將新鮮嘅菠蘿混埋肉桂同焦糖，烤到金黃色咁，個邊好脆，而且菠蘿肉仲好甜好多汁，係會令人忍唔住食完一份又一份。

酒鬼唔使擔心，實有酒畀你哋邊食邊飲嘅，仲要係巴西嘅特色cocktail添。

至於即將開幕嘅下層，則以澳洲悉尼嘅海鮮巿場為藍本，以「鮮」作主題，有龍蝦、蟹、生蠔以及各種刺身等海鮮選擇。不過，當然你坐下層都可以柯打要埋上層嘅烤肉，坐上層都可以食海鮮嘅~~~ 餐廳仲有室外用餐嘅位置，望住個海景咁嘆海鮮，好鬼好feel~~~

而成個4月嘅weekend，仲會有巴西巡遊同森巴主題夜，有森巴女郎大跳森巴舞啊！

烤與鮮
地址：澳門漁人碼頭開普敦館

文：Kar
相、片：Kar、Cathy