澳門氹仔林記燒烤

Open Now

Now Closed

諗住去澳門食宵夜，網上好多介紹嘅都係乜乜大排檔，好多都開得唔夜。見到呢間林記燒烤開到凌晨四點，啱晒，食完晚飯就過去。嚟港珠澳大橋搭的士去大約$70，位置有少少隔涉，係住宅區樓下，兜咗一陣先搵到。叫咗佢嘅signature 葡式凍蝦，係唔錯嘅，蝦夠彈牙，出色位係個醬汁，有parsley，生洋蔥，橄欖油同醋，酸酸辣辣，好開胃，但性價比好低，6隻唔算大嘅蝦要$125。再嚟都係signature 嘅芥末羊架，叫咗細份，有三件，唔算大，食落芥末味好濃，甜甜地，好食，但件羊架有少少肥，不過好juicy。呢個咖喱牛脷正常發揮，用咗咸牛脷，腍得嚟有啲爽爽地，口感唔錯。加咗個豬仔包沾嚟食，個包好好食，真係外脆內軟，加上啲咖喱，好正。再叫咗一串燒粟米，係一條分開四舊，食到有牛油蜜糖味，好食。仲叫咗杯馬來吉仔水，一杯雪碧同一枝青島，两個人埋單$4xx。 整體嚟講係一間味道唔錯嘅小店，不過某些菜式價錢稍高，都值得再幫襯。