Video
Read full review
2016-05-29
3773 views
〖2016-5月下旬〗時間：星期六，7：25am地點：沙梨頭水上街市人物：鍵盤戰士OneMan、潮流教主史提芬、剛剛收工的FC、未訓醒的John任務：攻略本土魚市場！傳說水上街市樓上有得買海鮮上去加工，即買即蒸即食。聽聞多時，但從未實行過一次。因為這個任務的難度實在是★★★★★★★★★★！要發動任務，首先要集齊以下條件：1. 早起，非常早。因為魚檔很早收工，很多魚鮮賣完就冇2. 必須Call馬，越疊馬越好3. 這班馬必須擁有在早餐吃九大簋的好胃口Bonus：當中最好有人識買海鮮同講價想我長年宅於家中，偶爾會買菜，但買來買去果幾味，話唔驚比人呃秤，就肯定是假的。不過我心想，山長水遠去到韓國鷺梁津，去台灣基隆漁港，咪又係預左俾人劏。依家大家話晒澳門人，就算唔錫住，都至少可以用廣東話講下價。所以當幾天前好友FC講起「今個禮拜收早，可以去同你打任務」時，仲唔輪到我飛雲機會來鳥？！隨即打蛇隨棍上，拉埋朋友圈中僅餘的兩位願意早起的史提芬和John。雖然前夜John突然傳來一個短訊，話「乜依家唔係休漁期咩？」，真是驚呆了我這小夥伴，但是，難得夠腳，唔係唔去下話？於是我當日晨早七點幾就出現在街市內，仲
〖2016-5月下旬〗
時間：星期六，7：25am
地點：沙梨頭水上街市
人物：鍵盤戰士OneMan、潮流教主史提芬、剛剛收工的FC、未訓醒的John
任務：攻略本土魚市場！
傳說水上街市樓上有得買海鮮上去加工，即買即蒸即食。聽聞多時，但從未實行過一次。因為這個任務的難度實在是★★★★★★★★★★！
要發動任務，首先要集齊以下條件：
1. 早起，非常早。因為魚檔很早收工，很多魚鮮賣完就冇
2. 必須Call馬，越疊馬越好
3. 這班馬必須擁有在早餐吃九大簋的好胃口
Bonus：當中最好有人識買海鮮同講價
想我長年宅於家中，偶爾會買菜，但買來買去果幾味，話唔驚比人呃秤，就肯定是假的。不過我心想，山長水遠去到韓國鷺梁津，去台灣基隆漁港，咪又係預左俾人劏。依家大家話晒澳門人，就算唔錫住，都至少可以用廣東話講下價。
所以當幾天前好友FC講起「今個禮拜收早，可以去同你打任務」時，仲唔輪到我飛雲機會來鳥？！隨即打蛇隨棍上，拉埋朋友圈中僅餘的兩位願意早起的史提芬和John。雖然前夜John突然傳來一個短訊，話「乜依家唔係休漁期咩？」，真是驚呆了我這小夥伴，但是，難得夠腳，唔係唔去下話？
於是我當日晨早七點幾就出現在街市內，仲早過番工。其實那時魚檔才剛剛開始擺陣，有意攻略的朋友，8點幾9點過來也ＯＫ。
戰場就在這裡！
早上七點幾就已經有不少勇者在進行採購。水上街市最熱鬧的時段在9-10點左右。
那些連街市都唔敢入的少爺小姐們，Sorry，呢個任務你高攀不起。街市內到處都是血肉橫飛的景象，被魚血顏射是90%會發生的事件。就算避得開，沿途都會有唔少身首異處的畫面招呼你，仲刺激過玩Biohazard。
和史提芬行了個圈。身為潮流教主的史提芬果然一眼睇中場內最多特別嘢的一檔。蟶子王好大隻，睇見都心動。我攞左最少的一紮，後來被食店老闆告知其實可以拆開逐條揀逐條買⋯⋯（OneMan戰士經驗+10，自尊-100）。
見旁邊條鱔即使被腰斬了都生猛地扭動著，事頭婆話是鱔王。唔係講笑，仲粗過我隻強勁ge臂彎！從沒見過咁大碌的鱔！！Mop8一兩，這裡就是Mop200！但人一世物一世，就試佢一嘢。
路過蜆檔，又想炒碟蜆。一問事頭婆「邊隻冇沙架？」，已經暴露左我經驗值低的一面。事頭婆：「隻隻都冇架！」
⋯⋯咁我又未至於智障到相信呢個美麗的謊言。
沙白肯定冇沙，但我本身唔係好鍾意食沙白，硬係要揀旁邊那種白蜆。
結果被食店老細話「呢隻有沙喎，炒唔到喎！應該買白色那隻嘛。」⋯⋯
（OneMan戰士經驗+10，自尊-200）
路過蟹檔老細好落力咁sell，見佢咁靚仔，又擺晒Pose咁，唯有幫襯兩隻生猛海蟹。
買到差不多了，就直上二樓的熟食檔。
其實只有兩家熟食檔，今次幫襯的是後方這家。廚房門口放著一個好型棍的營業時間牌匾。拿著一袋二袋海鮮，無上裝的性感肥佬老細即刻走過來，睇下我們買了什麼。
「蟶子呀？蒜蓉粉絲蒸！蟹一係煮粥，一係炒⋯⋯嘩，舊鱔咁靚，一於豉椒蒸！呢隻蜆驚有沙，唔炒得喎，不如蒸左佢，邊隻唔開就唔好食啦⋯⋯」
老細好多主意，完全唔需要擔心。問佢加工費幾多錢，事頭婆即刻話：「好平架，街坊生意！」
⋯⋯咁即係幾錢呢？「街坊」又是一個怎樣的數學單位？其實到埋單的一刻佢都唔會話你知。不過，如上文所言，出國去魚市場咪又係咁冒險，就算要呃，頂多都係幾十蚊之內的事。
蒜蓉粉絲蒸蟶子王MOP135＋加工費MOP48一大盤上桌，即刻威盡成個二樓！
在這裡吃蟶子王真是比較抵。在小炒店吃一盤的話，可能沒這麼多，但至少都要MOP200以上。
清蒸出來的，沒有什麼調味上的技巧，吃的就是新鮮海鮮的甜美！略嫌蒸得過火了一丁丁，有勇者要吃的話記住提醒老闆注意火候。
據說粉絲底要加MOP10，但這十蚊絕對值得。粉絲吸收蟶子的精華後，極其鮮味，樂而忘返。
豉汁蒸鱔 MOP200＋加工費MOP35有請今餐最貴的項目，鱔王陛下出場！！！
好肉地！
超、大、碌！！！簡直是一塊厚切魚扒！大口咬落去，魚油隨即滲出，肉質爽彈，啖啖都是肉，爽皮程度爆曬燈。本年吃過的魚中，這一條都叫難忘！
一斤多的魚，每人分到2大塊，因為油份極高，所以好飽肚呀！
薑蔥炒蟹MOP90＋加工費MOP38蟹本身不大，肉也不是很多，但勝在新鮮，肉質很鮮甜！而且在家整蟹有些麻煩，在這裡加工都幾抵。
蒜蓉粉絲蒸白蜆MOP36＋加工費MOP48因為有沙不能炒，於是拿去蒸，如果沒開口的不能吃，但結果是每一隻都開了。偶爾還是遇到少許沙，好在新鮮就是無敵，這一道也是鮮甜美味的。
這裡是一斤半的蜆，合指一算，加埋工要成MOP84，不便宜了！還是蒸貴價海鮮的ＣＰ值比較高！
任務完成後的桌面，四條友，飽到連蟶子王都食唔落！痴線。講緊幾點？才剛剛9點正。買料連埋加工，所花費的總數是MOP630，即每人才MOP160有找。價錢算合理的，是不是街坊價，就見仁見智啦～
總結一下這次即買即食的體驗：
1. 盡量買一些高價及較難在家處理的海鮮，圍番起來比較抵
2. 盡量Call馬。蒸兩條蟶子仔又係咁多錢，蒸一大碟都係咁多錢！
3. 自備散紙，一開檔就隊張500出來一定會俾人問候
4. 真．要叫一個識買餸的朋友一起去（Sor，我是唔合格的）
5. 想炒蜆的話買沙白好了，唔好重複我的錯誤
如果你真係唔識買海鮮，又好Ｌ想食海鮮餐，仲有個秘技，就係可以在一天前打電話叫老闆娘幫手留貨。不過咁，要同隊友一起沿途買餸打怪被呃稱，才能稱為一個完整的魚市場體驗，買多幾次就自然會升Level架啦～（望就係咁望）
中國名粥
澳門沙梨頭海邊大馬路沙梨頭臨時街市1樓熟食中心
6638 8569
Post
