麵場田所商店 (Closed)

大概中午12:50去到，一去到唔洗等位就即刻有得坐，個侍應非常好態度問我地幾位，之後仲將兩張兩人枱拍埋，每人都有一杯凍水或者茶，之後我地睇餐牌見到有中午套餐，就叫左個套餐Ａ，叫北海道拉面，佢有三隻湯底，北海道係最濃既，侍應有好貼心咁同我地講，如果覺得太濃可以唔洗加錢問佢拎清湯加落個湯到，係餐牌上睇套餐比起單點既拉面好似細好多，但最後我地都係捧住個肚走，因為個套餐除左面有加埋兩隻餃子同小量既中華沙律，同埋侍應好勤力咁幫我地加水。我覺得餃子唔乾，好好味。個面係好濃味，加多少少清湯個味就岩岩好。單點既拉面有三塊叉燒，套餐既叉燒得一塊。但我覺得一塊都大塊到嚇親我，成塊豬扒咁，好軟熟。所以我同我既朋友都覺得呢間拉面一定有下次！