2022年啱啱開始，嚟緊又新年又情人節，本來係同親朋好友加另一半食大餐嘅好時機，可惜要抗疫，晚巿堂食一路禁到起碼年初三……咁，食住下午茶先啦~~ 今期有卡通系列、養顏、意大利、芝士火鍋及虎年主題，款款都好有特色。

AMMO x Mr. Men Little Miss下午茶

Mr. Men Little Miss Afternoon Tea Party下午茶事隔一年又返咗嚟！每款鹹甜點都好cute，例如有好香濃嘅Mr. Strong黑松露醬芝士可樂餅及炸雞，味道甜而不膩嘅Little Miss Giggles同Little Miss Princess鹽味焦糖啤梨蛋糕、Little Miss Hug及Mr. Happy馬卡龍草莓慕絲蛋糕。食客更可以喺法式布丁撻上畫Mr. Happy，好食又好玩。凡惠顧二人用下午茶一客仲可獲贈別注版Mr. Men Little Miss記事本（數量有限，送完即止），Mr. Men Little Miss fans一定要收藏！

價錢: $528/2位，另加$68可品嚐 Mr. Men Little Miss 造型熱朱古力或「Popping White」雞尾酒或無酒精雞尾酒一杯
供應時間: 即日至2022年2月28日，每天下午3時至6時

Vive Cake Boutique Dear LuLu下午茶套餐

又一間以卡通為主題嘅下午茶～LuLu豬本身都有唔少fans，呢間精品蛋糕店推出Dear LuLu下午茶套餐肯定吸粉！甜鹹點都好啱打卡。甜品方面有LuLu 野莓馬卡龍、LuLu 彈彈雲呢拿芒果流心慕絲餅及朱古力焦糖流心禮物盒等；而鹹點就有自家製蝦堡三文治、午餐肉飯糰同鵝肝慕絲酥皮盒，可愛到唔捨得食呀。

價錢: $270/位或$498 元/兩位用
供應時間: 即日起至2022年2月28日，逢星期四至星期日及公眾假期，下午2時30分至6時30分期間供應

YAMA x Eurobeauté 「滋養水光蜜語」下午茶 

約閨蜜去嘅，可以考慮下呢個以被譽為「綠色魚子醬」沖繩海葡萄入饌嘅「滋養水光蜜語」下午茶，食完即刻變靚啲～鹹點方面主打有沖繩海葡萄海膽軍艦壽司同北海道鱈場蟹柳海葡萄壽司，鮮味滿滿。仲有吉列和牛三文治及香煎鵝肝配黑魚子，前者入口即溶，後者油香極重，每一啖都係享受。Afternoon tea又點少得甜品呢，有紅桑子果醬馬卡龍同馬達拉斯加雲呢拿奶凍伴日本白桃杯等緊你，甜而不膩。

價錢: $488/兩位用
供應時間: 2022年1月8日至2月27日、星期六、日及公眾假期3pm-5pm (最後點餐4:30 pm)

大堂酒廊 味遊意大利下午茶 

呢個注入意式風味嘅下午茶，由酒店意大利餐廳Angelini主廚同行政糕餅總廚合作創作，主打多款甜點同鹹點。如鴨肝、意大利火腿及黑松露等，每一款都有新驚喜。另外只要惠顧兩位用下午茶套餐，更可獲贈一份意大利護膚品牌L’Erbolario身體及面部護理套裝、一次茶本滋潤手部護理及兩份其他禮遇，數量有限，送完即止。 

價錢: $638/兩位用
供應時間: 2022年1月1日起至2月28日

普慶餐廳 戀戀車厘甜品下午茶+芝士火鍋週末自助餐 

下午茶達人應該都對呢間餐廳唔陌生，今期佢哋推出全新「戀戀車厘」下午茶，以車厘子為主題，焦點推介鮮車厘子撻、車厘子芝士餅同車厘子意大利奶凍等，仲有大廚會喺甜品專區現場製作新鮮車厘子果醬法式薄餅、雞蛋仔同任食超8款口味嘅Mövenpick雪糕及超過二十款配料，鍾意點配搭都得！每位客人都會包一份主菜～ 平日唔得閒嘅都唔緊要，週末有芝士火鍋下午茶自助餐，包括三重芝士、黑松露芝士同埋加推嘅威士忌口味，濃郁嘅芝士火鍋加入酒香醇厚嘅威士忌，每一啖都散發微微酒香，必試！另外有Raclette芝士專區同多款以芝士為主題嘅甜鹹點，芝士控一定要bookmark呀。

戀戀車厘甜品下午茶
價錢: 每位HK$158*起
供應時間: 逢星期一至五下午3時15分至5時15分

芝士火鍋週末自助餐
價錢: 每位HK$258*起
供應時間: 逢星期六、日及公眾假期下午3時15分至5時15分

Woobar 虎虎生風新年下午茶   

玩味十足嘅下午茶，以多款矜貴食材入饌，如鮑魚、魚子醬、燕窩等製成多款別出心裁嘅茶點，包括涼拌汁煮鮑魚、龍蝦配香橙煙鯡魚子醬以及金黃酥脆嘅W叉燒酥、黑白芝麻卷同埋楊枝甘露等經典中式鹹甜點。加埋粉紅色燕窩覆盆子芝士蛋糕，而且每款點心都係用點心蒸籠盛載，啱晒相機食先呀。

供應時間: 2022年1月1日至2月28日

文: Yanica
編：Kar