中秋節就到喇，一家人團圓食飯，通常都會揀酒家，食中菜，等長輩坐得舒服啲，菜式又啱佢哋口味。酒家嘅菜式雖然夠大體，但傳統做法或多或少會落重啲調味料同油，令餸菜惹味又有光澤，咁就唔太健康咯。以下呢3間參加咗少鹽少糖食店計劃嘅大型酒家，就特別設計咗幾道少鹽少糖菜式，賣相出得廳堂，味道亦適合大人細路，健康得嚟又好食。
蕃茄金湯浸龍躉斑球
做節點都會揀幾道海鮮菜式，如果用斑球同唐芹，一般都會諗爆炒嘅做法，但始終較油膩，冇咁健康。湯煮嘅蕃茄金湯浸龍躉斑球，就一洗大家嘅固有印象喇。由於鹽、糖比平時用少3/4，師傅特意加入南瓜蓉汁、蕃茄同自家熬製嘅清雞湯，用蔬果嘅清甜為菜式增加天然甜度。而炸蒜子同薑片可以幫龍躉辟腥提香，減低調味料用量。
松子牛肝菌蜜豆炒珍珠帶子
菇菌類乾貨都有濃郁嘅香氣，所以平時媽媽浸冬菇，都會留起冬菇水煮餸，而呢道松子牛肝菌蜜豆炒珍珠帶子就用咗牛肝菌水喇。雖然鹽同糖嘅用量減少3/4，而蠔油更加由1茶匙大幅減至1/8茶匙，但珍珠帶子、鮮百合、蜜豆、牛肝菌同甘筍炒香後，用牛肝菌水埋芡，令所有食材都帶有菌乾嘅香氣，亦提升各款蔬菜嘅清甜味，令少鹽少糖都同樣美味。
腰果伴塘炒蝦滑
蓮藕清熱生津，呢個天時食就啱晒喇。腰果伴塘炒蝦滑用上蓮藕、馬蹄、荷豆、雲耳同唐芹，以天然蔬菜甜味令菜式更清新爽口。而且選用鮮蝦製作蝦膠，特意減少1/2鹽同2/3糖，以突顯其鮮味。另外以清雞湯做芡汁，即使減少3/4鹽同2/3糖，都仍然好夠味；加上落咗少量麻油，唔爆炒都散發陣陣香氣；配埋乾蔥同腰果，令口感層次更豐富。
桂花炒素翅
大時大節又點少得有派頭亦夠喜慶嘅魚翅菜式呢！但係為咗保育，而家好多人都選擇轉食環保素翅，不過素翅通常都冇咩味，但呢道減鹽減糖兼少油嘅桂花炒素翅就唔同喇，大廚一樣有妙法令佢變得鮮味！瑤柱本身嘅天然鹹鮮味滲入素翅，所以減少1/3鹽都夠味道。而銀芽同椰菜絲嘅蔬菜清甜味都好突出，加上金黃色嘅韭黃薑米蔥片炒蛋，增加蛋香同蛋白質，食落清爽有咬口。
玉簪蝦球
老少咸宜嘅玉簪蝦球賣相高級，食材亦畀人尊貴嘅感覺。為咗突顯鮮蝦同蛋白嘅原味，刻意減少1/3鹽同糖，而且用較健康嘅蒸煮方式，將大大粒鮮蝦球同蛋白一齊蒸熟，口感爽彈又香滑，同時提供豐富蛋白質。配埋泰國蘆筍，增加鮮甜味同咬口。
淮山杞子燉響螺湯
做節當然要飲啖靚湯啦！淮山杞子燉響螺湯特別選用豬肉偏瘦嘅部位——赤肉，減低油膩感，但亦有肉湯嘅精華；而雞件、雞腳同響螺令湯水更加鮮甜，即使減少1/3鹽都好夠味。
鮮當歸炒花膠
藥膳菜式都可以味道清香又矜貴！鮮當歸帶有獨特嘅芳香，加上花膠本身嘅海水鹹味，配埋爽脆嘅西芹，即使減少1/3鹽，食材嘅原味都令呢道鮮當歸炒花膠鮮、香、味俱全，重可以補充骨膠原㖭。
大蒜黃耳炒枝竹
想走肉又有啲鑊氣，呢道大蒜黃耳炒枝竹就啱晒你。雖然減少1/3鹽，但爆香天然又濃味嘅配料——大蒜同炸蒜片，有助加強菜式嘅味道，而黃耳、湖南青椒、枝竹同雞蛋亦各自帶唔同嘅甜味，配埋蔥段同炒就更加香氣四溢。喺大時大節食得多肉之際，點呢道菜就可以減輕身體負擔啦。
清炒萵筍絲
萵筍嘅清甜爽口係唔少人鍾意食佢嘅原因之一，配埋木耳絲同紅椒絲，色彩豐富，又有多重口感，帶有淡淡椒香，減少1/3鹽都依然係不俗嘅伴菜。
* 資料由客戶提供