世界各地嘅奇珍料理都匯聚喺香港呢個美食之城內，呢度曾經日夜都係燈火璀璨，無論幾夜都總能夠喺街度搵到嘢食。可惜呢幾年受疫情影響，加上多項防疫措施令到呢個美食之城，變成冰封之城。要將冰封之城再次燃亮，除咗靠業界努力外，最重要都係靠大家嘅支持，集合力量燃起「美食之火」！6月15日，一人一票，完成任務，喚醒美食之城！投票支持心水熱店後，更有機會贏取獎品總值超過30萬！
美食之城內，甜品店一向都最易贏得大家嘅心心眼。甜品就好似有種魔力咁，令品嚐過嘅人都會得到快樂嘅力量。今次入圍嘅10間甜品舖，當然都有呢種魔力啦，即刻睇下佢哋嘅介紹：
Pantone色卡咖啡店 Moontone
圖：近年多咗好多以打卡為主題嘅餐廳，而太子呢間就選擇以和諧嘅Pantone色卡為概念，由裝修到食品都圍繞住呢個主題。好似招牌甜品角酪卷蛋，就用咗蝶豆花天然色素上色，做出天藍色嘅效果。軟綿嘅蛋糕中層係乳酪忌廉同士多啤梨忌廉，酸甜有致。
打卡值 📷📷📷📷📷
人氣值 🔥🔥🔥🔥
麵包布甸 嘉多利天然酵母手作麵包店
圖：近期人氣大熱嘅法式麵包布甸，要排成個鐘先食到。脆邊嘅法式麵包，包住軟滑嘅布甸，雲呢嗱味濃香，凍食熱食各有吸引。舖頭另外有其他包款，同樣都係甜品款式嘅京都抹茶紅豆麻糬法式布甸包係另一款人氣之選，茶味濃郁帶回甘，夾埋煙韌麻糬，係港人至愛嘅甜品組合。
打卡值 📷📷📷
人氣值 🔥🔥🔥🔥🔥
港式Style刨冰 甜姨姨私房甜品
圖：得到唔少甜品控捧場嘅銅鑼灣甜品舖，最出名就係佢哋首創嘅刨冰系列，用上日本空運到港嘅冰磚同日本冰機製作，刨冰冰感十足之餘仲好綿密幼滑，首推港式Style醬爆奶醬脆多刨冰，大大份，仲要有花生醬、花生奶、花生碎多重口感。而且佢哋仲會成日有唔同嘅創新甜品，例如前排就製作咗crossover海邊走走嘅麻糬撻，難怪開咗咁耐人氣依然不減。
打卡值 📷📷📷
人氣值 🔥🔥🔥🔥
油麻地黃巴士 am.pm
圖：旺角有架長期停泊嘅黃巴士，甜品控們一定識得自己去搵食。呢度主打梳乎厘班戟，亦有布丁燒牛角包窩夫等，重點係平民價呀。即叫即製嘅梳乎厘班戟，有多款口味，口感鬆軟，充滿空氣感。其中黄金布丁燒牛角包窩夫香脆可口，面層嘅牛奶吉士醬仲有火炙過，帶有淡淡焦糖香，可以話係皇牌美食。
打卡值 📷📷📷
人氣值 🔥🔥🔥🔥
過江龍蘋果批 Cocolo Tokyo Cake Factory
圖：由日本引入香港嘅糕餅店，唔淨係得蘋果批架，佢哋仲有好多款蛋糕。不過蘋果批就當然係必食嘅，喺日本全人手製作後再空運送港。選用青森蘋果粒製作，甜度偏高，酥皮層層脆口，無論做飯後甜品定下午茶時間醒醒神都好啱。另外三層抹茶蛋糕、紅茶奶油蛋糕等都係廿零蚊嘅價錢，性價比高。
打卡值 📷📷📷
人氣值 🔥🔥🔥🔥
另外5間入圍嘅甜品店仲包括Café Crêpe、Mamaday Studio、Pancake House HoiHoi 、Bakehouse、ATUM Restaurant，揀啱就快啲去投票啦，投票有機會獲得豐富獎品，要知道，你哋每個人嗰票都好重要，係喚醒美食之城嘅重要力量！是次投票分為兩個階段進行，共四個投選組別。每完成一組投票/回答問題(簡稱「任務」)皆可取得火炬，累積滿4枝火炬或以上即有機會可獲$100 OpenRice現金券獎賞！完成所有任務並累積滿6枝火炬，更有機會贏取豐富獎品！
想支持心水餐廳，記得注意返投票日期：
菜式組別： 2022年 6月15日 - 6月28日
地區組別： 2022年 6月29日 - 7月12日
外賣自取及訂座組別：2022年 6月15日 - 7月12日
