以往唔少人會去暖和嘅東南亞地區過冬玩下，今年不如味覺出遊，品嚐充滿亞洲風味嘅菜式代替旅行啦！東南亞菜、南亞菜一直畀人濃味嘅感覺，因為當地天氣炎熱，要刺激啲嘅味道先可以增加食慾，但無形中容易攝取過量鹽同糖，有損健康。以下呢3間參加咗少鹽少糖食店計劃嘅亞洲風味餐廳，特別提供幾道少鹽少糖菜式，讓你同親朋好友享受下異國風情之餘，又可以食得健康啲。
Jashan Celebrating Indian Cuisine（印度菜）
Chicken Tikka Masala
為咗令菜式提香又入味，Jashan Celebrating Indian Cuisine嘅印度菜用較多天然原材料製作醬汁，而且不含味精自然更健康。其中先烤後燉煮嘅Chicken Tikka Masala，燉煮時加入番茄同洋蔥，以蔬菜天然嘅甜味提鮮；重用咗香氣十足嘅芥菜籽、胡蘆巴粉同辣椒粉來調味，即使落少咗10%鹽，雞肉仍然香口又入味。
Kashmiri Lamb Rogan Josh
為配合少鹽而不失呢道羊肉咖喱嘅風味，大廚特別熬煮秘製肉汁，另以黑胡椒增加香氣，再配上天然香料乾薑末同茴香末，令呢道少鹽版羊肉咖喱，減少咗5%鹽也保持鮮香美味。
Lemon Grass Fish Tikka
印度菜亦有唔少烤肉菜式，Lemon Grass Fish Tikka預先將鯖魚稍微醃鹹，使魚肉入味後再烹調，就可以減少5%鹽。另外加入檸檬汁、新鮮壓碎嘅黑胡椒、自製新鮮薄荷醬等天然香料，既中和鯖魚豐富嘅魚油，味道層次亦更豐富。
班蘭葉印尼餐廳 Pandan Leaf Indonesian Restaurant（印尼菜）
Pandan Chicken
廣東菜有白切雞，印尼菜就有斑蘭雞！班蘭葉印尼餐廳嘅招牌菜Pandan Chicken，選用原隻新鮮雞，將高良薑、香茅同斑蘭葉放入雞隻肚內，去除雞嘅腥味；再用熱湯慢慢浸熟，令肉質保持嫩滑，同時落少20%鹽同糖，更能突出雞肉本身嘅鮮甜味。
Fish Maw Soup with Vegetables
有菜有肉就更加飲食均衡喇！用新鮮蔬菜製作嘅上湯浸時蔬，以蟲草花同杞子突出蔬菜本身嘅甜味，減少20%鹽同糖反而更清甜生津。
Pandan Layer Cake
如果想食甜品收尾，當地特色嘅斑蘭千層糕都有少鹽少糖版㗎！特別版減咗15%鹽同糖，令椰奶同斑蘭葉本身嘅清甜味同香氣更明顯。
Paneer Cheese Momo
近年多咗人食尼泊爾菜，尤其係當地嘅特色餃子Momo。呢度嘅Momo有煎同蒸嘅版本，建議揀蒸煮方式更能突出食材原味。餃子皮本身略帶甜味，而芝士口味採用微鹹嘅Paneer芝士做餡，夾埋一齊食，就算減少咗70%鹽，唔蘸辣醬都夠晒味。
Truffle Tagliatelle
呢度另有供應西式料理，畀大家多啲選擇。松露意大利麵用橄欖油先炒香蘑菇同辣椒，逼出食材天然香氣後，加入忌廉、麵條同松露醬一齊煮，以奶香同素類食材散發嘅香氣，減少70%鹽，使味道更天然可口。
The Jungle Salad
想食得再少鹽少糖天然啲嘅話，純素菜沙律就啱你喇。呢道沙律本身用好少鹽吊味，而家減少70%鹽就更健康；而且有紅蘿蔔、番茄、洋蔥、牛油果、青瓜同多款沙律菜，只係落少少香草醬就可以帶起蔬菜天然嘅甜味，口感重好清爽𠻹。
* 資料由客戶提供
