夏日炎炎，相信大家唔係行入商場嘆冷氣，就係迫不及待買杯凍飲或者雪糕.....不過，消暑其實仲有另一個方法，就係食辣嘢嚟以毒攻毒！東京新宿即將展開激辛美食祭，一站式集合中、日、韓、泰等唔同國家嘅超辣菜式。大部分美食辣度仲可以自己揀，循序漸進得，一開始就「打大佬」亦得，得咗！

激辛美食祭分三期，每期都有九間唔同特色嘅餐廳參加。例如呢間蒙古タンメン中本嘅辣味胡麻冷麵同特製豬肉樺太冷麵就啱哂想慢慢熱身嘅勇士們啦。

嚟到日本當然要試日本料理，宇都宮餃子館嘅激辣餃子連皮都有辣味！咁唔知プングム嘅韓式辣味炸雞加咗芝士會唔會好啲？

講到香辣嘅菜式，又點少得中國菜呢？無論係陳家私菜嘅皇帝口水鶏，定天府舫嘅麻婆豆腐都係川菜代表，見到都覺得辣！

另外仲有泰菜代表タイ料理 バーンキラオ嘅牛肉飯，同越南菜代表BANH XEO SAI GON嘅牛肉麵。雖然望落好似幾好食，但大熱天時各位勇士係咪真係可以成功挑戰？

如果以上菜式自問都唔驚嘅話，隆重介紹當中嘅「大佬」：武蔵野うどん 藤原嘅骷髏頭烏冬，醬汁用咗又名斷魂椒嘅印度鬼椒，辣度直逼地獄級，勇士們記得量力而為。

激辛美食祭2016
地址：東京新宿歌舞伎町特設会場（大久保公園）
活動日期：（一期）2016年8月25日至31日，（二期）9月2日至11日，（三期）9月13日至19日

資料來源：激辛グルメ祭り2016