【國際新食力】日本特別版惠方卷大晒冷

日本每年嘅2月3號係節分日，除咗要撒豆避邪之外，仲要面對惠方（即係吉利嘅方向，每年都唔同，2016年係南南東）一口氣食哂成條惠方卷。傳統惠方卷裡面有乾瓢、黃瓜、雞蛋卷、鰻魚、肉鬆、椎茸等七種食材，代表七福神，所以將惠方卷食落肚即係代表將福氣捲起嚟食落肚。演變到而家，唔同便利店、超市同餐廳都會推出唔同嘅惠方卷。

北海道餐廳土豪金惠方卷

北海道札幌市嘅日本料理「北乃路」今年就推出咗豪華版嘅金箔惠方卷，裡面仲包住北海道和牛柳、鵝肝、魚子醬、大蝦等，一件要￥15,000，仲唔係走土豪金路線！

東武百貨名貴版惠方卷

唔想高調做土豪，都仲有其他豪嘅方法。日本百貨公司東武推出嘅松阪牛＆熟成和牛巻，就有松阪牛扒、熟成和牛同烤牛肉，認真豪爽！唔食牛肉嘅亦有極上吞拿魚惠方卷，捲住大大塊大間産嘅吞拿魚，表面亦有金箔。兩件分別賣￥20,160同￥25,000，抵唔抵就真係見仁見智啦。

LAWSON鬆弛熊惠方卷

便利店LAWSON今年特別採用喺京都音羽山清水寺祈禱過嘅紫菜嚟做惠方卷，感覺好似真係會幸運啲。最得意嘅當然係數量限定嘅鬆弛熊惠方卷！雖然無鬆弛熊大頭，但配色夾過哂，而且有鬆弛熊毛巾送，算係咁啦。

另外其他惠方卷CP值亦相當唔錯，無論係神戶牛燒肉卷定極上海鮮卷都係￥1,000有找，真正嘅食平啲，食好啲。

超級市場意大利版惠方卷

超級市場伊藤洋華堂除了基本款嘅惠方卷之外，今年仲同意菜餐廳名廚桝谷周一郎合作，推出咗三款融合意大利同日本口味嘅惠方卷：生火腿米蘭卷、威尼斯風三文魚同他他汁炸白魚卷。日本人一向都鐘意食意大利菜，呢個意日Fusion應該有唔少人Buy。

くら寿司驚嚇系惠方卷

くら寿司今年推出嘅特別版惠方卷係豆大福惠方卷！無錯，係有甜紅豆餡外皮好似麻糬嘅嗰種豆大福！到底壽司飯同和菓子豆大福夾唔夾，開飯仔我就真係唔知。其實呢間くら寿司已經唔係第一次出呢種驚嚇系惠方卷，舊年嘅燒沙丁魚卷亦捲土重來，而且今年仲喺紫菜上面畫埋魚骨。豆大福惠方卷同燒沙丁魚卷要你食一個你會點揀？開飯仔我就寧願唔食惠方卷好過...

資料來源：Century Royal Hotel，東武百貨，ローソン，イトーヨーカドー，Pouch

隨時接收最新資訊
讚好OpenRice專頁！