【手信巡禮】去日本旅行買呢啲

唔知由幾時開始，去旅行要買手信返嚟已經變成常識，明明買返嚟嘅嘢，香港或者上網多數都買到都係要買，搭過飛機返嚟係唔同啲，心意重啲啩。點都好，去旅行負責買手信嗰個，有時其實都幾頭痕，唔係買咗咁多年都仲係買香蕉糕、薯條三兄弟同白之戀人呀嘛（雖然真係好好味）？Come on，下次去日本嘅話，不妨考慮買呢啲：

Pablo 法式千層酥

你就話自己開心有得食Pablo芝士撻啫，你個friend喺香港冇嘛。撻又運唔到返嚟喎，可以諗諗買舖頭裡面其他嘅替代品啦。就好似呢隻法式千層酥咁，有原味（芝士味）同綠茶味揀。兩隻嘅包裝都係呈長條形，內附一把刀仔。酥皮有層糖粉喺面，切落去亦都唔會話散晒，塊酥皮脆得嚟又有少少綿，夾住中間軟綿綿嘅餡，好有口感，但一次過食太多就可能會有少少膩喇，雪凍少少食仲好味呀溫提返。

中村藤吉抹茶金磚蛋糕

圖：yoni24（左下）
眾所周知，抹茶控去京都必定要拜訪中村藤吉啦！雖然香港都有，但去本店食嘅感覺真係唔同啲嘅呢~ 自私食完晒抹茶厥餅、冷麵、雪糕等等之後，都要記掛下香港嘅抹茶控朋友嘅。呢隻抹茶金磚蛋糕質感嚟講外層就硬少少，但裡面就好鬆軟，仲有好濃嘅抹茶味，細細嚿食完會好想再encore！

Bâton D'or 百力滋

圖：nanasmemoryalbum、acotantan、brppp
你唔好睇少呢隻百力滋，喺某幾間大型百貨公司先有得買，仲要排晒長龍，然後每日4、5點左右就賣晒！佢有咩咁特別？佢其實係高級版嘅Pocky，有好多種特別嘅口味，除咗大家都好鍾意嘅抹茶之外，仲有甜牛油、白朱古力、咖啡、VSOP白蘭地等等。粗身嘅百力滋，味道亦較為濃郁，甜牛油味仲會有啲糖霜黐住成條百力滋，牛油味同甜味都相當香。不過都係嗰句，一盒得5包，每包得4條，唔夠喉啊！

Pocky 巨型百力滋

講開百力滋，如果嫌貴唔想買高級版嘅，不如買巨型版？一樣咁特別！一盒18條嘅巨型百力滋，每條都係獨立包裝，有成26cm咁長㗎，又夠粗喎，揸住嚟食幾有滿足感，而且仲有細包裝冇嘅哈蜜瓜味添呀，買畀小朋友食一定好開心！

Royce 朱古力

圖：simplycute1103、jiwonnabe、with.nim.1203
數咗咁耐點能夠唔數下啲朱古力呢？Royce嘅朱古力薯片好出名，甜甜脆脆咁好受歡迎，當然佢哋主打嘅朱古力亦唔會失色啦。牛奶味、香檳味、黑朱古力味、白朱古力味同抹茶味等各有特色，一盒廿粒，粒粒都好幼滑，軟硬適中，另外有層可可粉喺面亦令成粒朱古力食落更加有口感。其中有部分款式仲滲有酒香添，不過記得提你啲朋友，保質期得一個月，幾唔捨得食都要快啲食晒呀！

KitKat 朱古力

圖：arima08、osaka_momma_japanese_goods、snackfarm、japanese.store
係，KitKat香港都有得賣，不過日本就真係特別多特別味囉。就好似早排開飯仔都同大家推介過嘅白酒味，同一貫嘅KitKat一樣，喺鬆脆嘅朱古力威化中間，滲出陣陣嘅白酒清香，味道都算濃，原來係含有0.8%酒精㗎，不過食幾條應該唔會醉嘅。另外要推介嘅係伊藤久右衛門焙茶味，十分之咁有茶香，食落好有驚喜，鍾意嘅仲可以一邊嘆茶一邊食，雙倍茶香添呀，不過係京都限定囉。如果你唔係去京都嘅，都可以留意下貨架上嘅KitKat，每個地區都有唔同嘅限定口味㗎，例如靜岡同關東有wasabi味，神戶就有布丁味咁。

日清自製杯麵

圖：yeahyeahright、hereiskat
咩話？杯麵都買返嚟做手信？係！不過呢杯係非一般嘅杯麵，基本上喺街係買唔到嘅，因為係你參觀完日清杯麵博物館之後，自己執料整出嚟嘅杯麵，可以話係獨一無二。由杯麵嘅材料、味道、以至杯身嘅設計都全權由你話事。送一杯自己一手一腳整出嚟嘅杯麵，有夠心思了吧。不過，作為你嘅朋友，就應該會希望你手下留情，唔好太重口味喇哈哈。

咩話？你冇旅行去？唔緊要啦，你身邊總有朋友去旅行嘅，大方啲同佢哋開心些牙下啦。

文：Kar

隨時接收最新資訊
讚好OpenRice專頁！