【新店直撃】出現了！卡樂B Plus薯片概念店登陸灣仔！

嘩嘩嘩，卡樂B終於要登陸香港喇！咦？咪住，香港唔係不嬲都有卡樂B食嘅呢咩？係，但我講緊嘅係佢嘅概念店Calbee Plus呀！一向都淨係得日本有㗎咋嘛，而家香港終於都會有喇……3月21號開始！係海外首間分店呀，好榮幸呀！以後唔使再淨係葡萄人哋日本喇！

呢間開喺灣仔嘅概念店有兩層咁大，上面嗰層呢就係零食體驗工作坊，下面嗰層呢就係體驗店，個廚房係開放式嚟，大家可以見證住啲薯片呀薯條呀咁出世嘅過程，邪惡得嚟又好治癒！

概念店有成10款即炸薯片同薯條食㗎，即炸，係即炸呀！熱辣辣、脆卜卜，邪惡到一個點。除咗有日本都有嘅Poterico薯條同芝士味薯條之外，又可以揀有芝士醬、朱古力醬伴住嘅薯片，加多杯日本3.5牛奶味雪糕！正呀喂！

仲仲仲有淨係得香港限定嘅「避風塘香辣味薯片」，有得揀平切定係波浪型添呀，嗯，避風塘呢隻味真係好香港！

講多樣嘢你哋聽，3月22至28號每日嘅1點同6點，都會送50杯熱辣辣即炸薯片出嚟呀！先到先得，快定schedule校定鬧鐘喇喂！

詳情：
Okashi Galleria x Calbee Plus
地址：灣仔皇后大道東200號利東街地下G14-15號 (合和中心對面)

文：Kar

隨時接收最新資訊
讚好OpenRice專頁！