對好多家庭嚟講，飲茶，毫無懸念，一定係一家人每個週末嘅指定天倫樂活動。不過，老老實實，飲得多都會悶㗎？嗱，咪話開飯仔唔過料畀你，今個月尾「飲茶」就會開張，到時咪去飲茶囉。係呀，冇玩你，間店個名係叫「飲茶」呀！
見其名知其店，一睇就知呢間中式點心菜館玩味十足啦。先講樓面格局，「飲茶」嘅廚房係開放式嘅，透明度高，客人可以直擊廚師嘅手勢同功夫，而嘢食方面，佢哋主打新派點心同埋中菜，喺保留傳統菜式精髓嘅同時，亦會注入新元素，即係點？我唔直接答你，我用例子答你：
「睇住流奶」呀喂！我講緊食呢個造型可愛嘅「睇住流奶流沙奶黃包」嗰陣，細細啖咬個窿，唧一唧，熱辣辣嘅流心奶黃就會喺傾湧而出，好澎湃的唷。記得要趁熱食呀。
呢幾隻咁萌嘅豬仔，取名「一籠八戒」，唔講都唔知，其實佢哋係叉燒包嚟。不過一籠得3隻豬仔㗎咋留意返。
而喺鳥籠裡面嘅係「鴿吞鳳梨」，即係鳳梨酥呀。款款食物都又睇得又食得咁，啱晒相機食先嘅朋友。
另外仲有個意想不到嘅完美組合，就係由蛋撻同蘋果批合製而成嘅「蘋果花撻 」。雖然兩款都係由細就食到大嘅嘢食，但二合為一咁食就真係第一次。蛋同蘋果出奇地夾，少少甜，多多趣。
嗯，講咗咁耐，都係嗰句，得閒飲茶。
隨時接收最新資訊
讚好OpenRice專頁！
关键字
尖沙咀
飲茶
中式
流沙包
點心
复制到剪贴板