鍾意食拉麵嘅朋友仔，又有新蒲點喇！今次唔係銅鑼灣，而係葵芳同屯門呀！特別係葵青區一向都比較少拉麵店，對新界友嚟講的確係個好消息。呢間拉麵店仲係嚟自日本涉谷㗎，聽講話啲湯底有美顏效果喎！

主打係鹽味拉麵，有辣有唔辣，有炸雞有溏心蛋，不過最大嘅特色就係有好多種唔同嘅配料擺喺枱面，包括梅子醬、柚子胡椒、黑蒜蓉同辣醬，全部任加，自己調製自己碗麵嘅味！枱面有餐牌建議邊種麵配邊種醬會比較夾嘅。梅子醬嘅梅味超重，而黑蒜蓉就好香，但落太多就會有啲鹹，柚子胡椒嘅味道層次就最豐富，一嚟先係酸酸地嘅柚子味，鹹味緊接住就會出嚟，最後就會有胡椒嘅辣味停留喺口度一段時間，撈落拉麵度食係幾過癮。

湯底可以話係一碗拉麵嘅靈魂，呢度嘅湯底主要有「鹽湯」同「熟成鹽湯」兩種，前者係用雞骨、豬骨、葱同蘋果等慢火熬製，再加埋秘製辣汁就變咗做辛辣鹽湯，加柚子汁呢，就變柚子湯底喇~ 而「熟成鹽湯」就係用特製嘅超高壓壓力鍋將雞骨、豬骨、香葱等等快速餚成見湯唔見渣嘅豆乳色濃湯，同樣都係可以變變變幾種口味出嚟，包括辛辣味、黑蒜油、味噌、辛辣味噌之類。兩款比較下，鹽湯相對嚟講比較清淡，冇乜味 (怕清淡嘅朋友建議加埋上面講嘅醬料食)，熟成鹽湯就會濃味少少，而且仲多啲骨膠原，啱晒貪靚嘅女生。

熟成鹽湯（左）、鹽湯(右)

至於麵嚟講，就全部都日本空運到港嘅，有粗有幼，分別配湯麵、撈麵咁食。

俺流鹽湯拉麵

俺流男盛熟成拉麵

俺流特製撈麵

詳情
俺流塩らーめん
地址：
葵芳新都會廣場地下 117 號舖、
屯門屯門鄉事會路83號V City商場1樓19號舖