下星期天氣涼翻啲，最啱同三五知己去Camping，親近大自然Relax一下。而平日如果想回憶野外遊玩嘅寫意，亦可以去灣仔新開幕嘅SOMETHING WILD野玩山店。顧名思義，野玩以野外山系文化為主題，希望將生活融入大自然咁話。
餐廳Logo用咗露營好幫手荷蘭鍋，佢地亦選用荷蘭鍋嚟烹調一道道代表菜，包括荷蘭鍋烤焗原隻野雞。荷蘭鍋可以令食材平均受熱同保留水分，用嚟烤雞就可以鎖住肉汁，而且原隻野雞分量夠大，的確有Camping大家開心Share嘅感覺。一大班人仲可以叫埋荷蘭鍋海鮮匯同荷蘭鍋紅酒香草燴羊膝。
去到野外唔可以錯過嘅就係燒烤，所以餐廳亦供應一系列烤肉，例如野火香烤牛仔骨，以上乘牛仔骨加入香料醃製，燻烤過後果種香味特別誘人。牛仔骨唔係你杯茶嘅話，亦有重量級戰斧肉眼同田園燒烤乳豬。
野餐亦唔少得簡單小食，野玩沙律就用上Feta Cheese搭配新鮮蔬菜，仲有三款醬料任揀，清新之餘滋味十足。另外精選仲有香辣茄蓉點點醬配薄餅、農夫芝士拼盤、野玩燒粟米 、新鮮鮑魚沙律塔等。
餐廳裝修以Camping為主題，一邊係餐飲區，另一邊水吧望落成部露營車仔咁，其實係Caravan甜品及酒吧。甜品方面有野火蘋果脆脆同露營麵包布甸等，飲品方面除咗咖啡奶茶、汽水啤酒之外，亦有雞尾酒同各款全新特飲。
睇嚟SOMETHING WILD野玩山店絕無玩嘢，餐廳仲會定期舉辦限定野玩搞作，各位山系潮人可以留意下。
隨時接收最新資訊
讚好OpenRice專頁！
关键字
山系
野玩
烤雞
燒烤
露營
灣仔
复制到剪贴板