呢幾年好似多咗人去越南旅行，而大部分去過越南嘅人，應該都食過當地嘅牛肉粉。其中一間好受歡迎嘅越南老品牌牛肉粉專門店，最近嚟咗香港開舖喇！

同越南店一樣，香港嘅呢間舖都係主打牛肉粉，分別有生牛肉粉、熟牛肉粉、生熟牛肉粉、牛丸粉，同埋乜都有嘅綜合粉。

食綜合粉有特別技巧㗎，首先飲一啖湯，試咗佢最真最原始嘅味道之後，就按個人喜好將九層塔、鴨舌草等等嘅香葉撕碎，放入湯度，再加青檸汁、辣椒、同芽菜，攪勻之後就連粉連湯咁食。咁就可以每啖都食到晒成碗嘅精華。不過提一提，九層塔同鴨舌草都係相對重口嘅香草，未必人人都接受到，但如果鍾意嘅人應該會覺得加完之後，碗湯香咗、層次多咗。另外，牛肉就可以點甜醬加辣醬咁食，越南風味更重。

小食方面，想香口啲嘅有牛油雞翼，用牛油煎之餘仲加咗蒜粒，係脆口嘅；想清少少嘅就有米紙卷，薄得嚟又有少少煙韌嘅米紙，包住蝦、扎肉、濛粉同青瓜，點埋自家調製嘅魚露，清香嘅。而小米糕就喺蒸好嘅米漿面，加上花生、肉鬆同蔥油，又係可以點埋魚露食。

飲品方面，比較特別嘅有越南滴漏咖啡同雪梨崩大碗。前者杯底預先裝咗煉奶，壺上嘅咖啡一滴一滴咁滴落嚟，略帶微甘；後者就有好大陣嘅草青味，即使加入咗雪梨都仍然唔能夠沖淡到嗰種澀，同埋留意返出大碗幾寒嘅，孕婦、小朋友或者身體虛弱嘅朋友就唔太適合飲嘞。

錦麗
地址：觀塘觀塘道418號創紀之城5期(apm)4樓19號舖

文：Kar
相：Kar、Cathy



其他新店介紹：
Happy Friday新chill點 台灣掌門手工啤首設香港門巿
海底撈預計年中進駐油麻地 唔洗上深圳都嘆到肉麻服務？
東京築地海鮮丼専門店登陸油麻地 飛天鮪魚X海膽霸氣之選（有片）







隨時接收最新資訊
讚好OpenRice專頁！