越嚟越多人鍾意飲茶，睇下每次新開都大排長龍嘅抹茶專門店或者係近期大熱嘅手工茶飲品店就知。今年中秋無論係過江龍定係本地品牌都加入戰團，紛紛推出茶味月餅，即刻同大家嚟個巡禮先。
京都抹茶月餅 中村藤吉
呢間店上年首推抹茶月餅大獲好評，今年再推至尊級抹茶月餅。同上年有咩唔同呢？原來係加入咗比上年多1.5倍嘅手採碾茶茶葉做月餅餡，抹茶味更濃，連月餅皮都有濃濃嘅茶香，啱哂抹茶迷。
抹茶雪糕月餅 Häagen-Dazs
Häagen-Dazs當然都唔執輸啦，佢哋今年推出嘅抹茶雪糕月餅，用森半抹茶粉去製作脆皮，令外層嘅抹茶朱古力脆皮味道更濃郁，而裡面嘅抹茶雪糕就夠哂香滑，aftertaste有少少甘香，令人有想食多件嘅感覺。同一和風系列仲有芒果士多啤梨雪糕月餅，未切開都已經見到粒粒士多啤梨，再加埋煙韌麻糬外層，口感都幾創新。
宇治抹茶月餅 Valérie
人氣網上餅店Valérie首次開設Pop-up store，除咗網上訂購外仲可以到店選購，由京都宇治抹茶粉製作嘅宇治抹茶月餅茶味都幾濃，有少少回甘唔會好膩。仲有皇牌迷你奶黃、迷你流心奶黃同楓糖果仁月餅一共四隻味。八件裝禮盒仲送Harney & Sons 伯爵茶同洋甘菊茶包，一啖茶一啖餅都幾寫意。不過由於貨量有限，建議大家去鋪頭前打電話查詢貨量先呀。
期間限定店資料：
日期：即日起至10月6日
地址：銅鑼灣地帶2樓214號舖
茉莉香片奶皇月餅 奇華餅家
茉莉香片味嘅奶皇月餅的確係少見嘅，未食都已經聞到淡淡茉莉香味，入口清新，餅皮鬆化。而另一款伯爵茶奶皇月餅就帶有佛手柑香，同奶皇幾夾，唔會太甜。
月餅花茶禮盒 大同老餅家
香港老字號大同老餅家同本地原創凍齡花茶品牌花研草說(MZK Life)首度聯乘推出月餅花茶禮盒。包裝走傳統手繪風格，懷舊味十足。禮盒內有傳統雙黃白蓮蓉月餅同埋五款各有唔同功效嘅石斛花花茶，好似有可以消脂瘦身嘅石斛洛神茶同清熱下火嘅石斛胎菊茶，啱哂想食月餅又怕肥膩嘅朋友。仲送埋靚靚保溫瓶，等你可以去到邊飲到邊。
網上訂購: http://bit.ly/2uXtulL
更多【月餅巡禮】： |
京都宇治抹茶奶黃月餅 8 度海逸酒店
奶黃月餅已經好吸引，加埋抹茶就更加不得了。抹茶甘香，奶黃綿滑。仲有鮮鳳梨奶黃蛋黃月餅同海藻糖白蓮蓉蛋黃月餅兩隻味，想一次過試哂嘅可以揀三色雜錦月餅禮盒，買嚟一班人share食就最啱。
抹茶白花豆月餅 京林屋
呢款月餅除咗用左佢哋自家嘅抹茶粉之外，個餡仲用咗來自北海道嘅白花豆同日本海藻糖黎製作。咁月餅皮呢？就係用咗同樣來自北海道嘅脫脂奶同埋愛知縣嘅牛油。成個月餅都充滿日本風味，禮盒裝仲送埋煎茶同焙茶添。
抹茶流心月餅 東海堂
又抹茶又流心，呢個組合真係好難抗拒。特別選用來自日本京都宇治．丸久小山園嘅「若竹」抹茶同埋北海道3.6牛乳，用料矜貴，牛乳外餡配上抹茶流心內餡都唔會好膩，仲幾有層次添。
伯爵紅茶月餅 Paul Lafayet
呢間法式甜品店今年推出咗兩款茶味月餅，分別係清香伯爵紅茶同醇香抹茶味。伯爵紅茶味用咗斯里蘭卡頂級茶莊嘅伯爵茶葉，而抹茶味就用咗日本靜岡縣嘅高地抹茶，一款清香，一款甘香，另外仲有雲呢嗱同咖啡味，一套四件買晒返去唔使揀。
蓮花玉茶月餅 Tea WG
當然唔少得經典茗茶品牌Tea WG，綠色禮盒睇落夠哂優雅。其中「日落餘暉」月餅，就係由抹茶加紅豆餡同瓜子組成，口感豐富。兩件禮盒裝仲配埋蓮花玉茶，等你可以飲啖茶食件餅，嘆到呢。
文：Crystal
