西環呢區隨住港鐵港島西延線通車多咗唔少新餐廳進駐，一方面為西環注入新氣象；另一方面，同時亦有唔少老店同小店依然日復一日，為大家送上一份平實窩心嘅美食。就好似堅尼地城咁，唔單止有唔少價錢絕不離地嘅餐廳，行去美非路熟食中心，仲會搵到唔少大家最熟悉又抵食嘅港式美食！
超有火招牌雞煲 雞煲
圖：有身孕的不良牛
無錯，開飯仔無打錯字，呢個檔口個名就係叫雞煲，簡單直接得可愛。但佢地賣嘅招牌雞煲就非常有火，因為係加咗啤酒嘅火焰雞煲呀！雞煲可以嗌走辣、小辣、中辣或者大辣，重點當然係上枱後由店員淋上啤酒然後點火燒著嗰下啦。另外仲有乾身雞煲，雖然無火焰嘅視覺震撼，但一樣夠香夠辣夠入味，而且仲帶少少麻，會食到嘴唇有少少痺㗎。
平靚正街坊粥店 卓記
西環有兩間粥店都叫卓記，但認住街市熟食中心呢間先係幾十年前由大排檔搬入室內嘅「正宗」卓記。做嘅係街坊生意，一碗生滾鯇魚片粥都係收$16，而且粥底軟綿有米香，食完唔口渴唔係味精粥。另外呢度嘅油器係小店自己即日炸，所以油炸鬼同炸兩都有水準。唔夠飽可以嗌埋蘿蔔糕，蘿蔔絲唔多但勝在大大件又煎得夠香。
隱藏版出色清湯牛腩 順景食店
點解叫佢隱藏版？因為有食家試完大讚呢間嘅出品同其他牛腩名店比一啲都唔輸洩，但就未必個個都識搵到嚟試喇。午市可以食咖喱牛腩麵或者咖喱牛腩飯，晚市就可以嗌個清湯牛腩鍋，裡面有牛腩、爽腩、肥腩同筋腩，食落夠腍亦有肉香，仲會送多碟菜同粟米畀食客打埋邊爐。不過有食家就表示嗌其他檔口嘢食一齊打邊爐就被要求收取Gas費用，唔想最後有咩誤會嘅話，打邊爐之前最好問清楚先喇。
香濃沙嗲湯麵 誠記
圖：Raul L.
每一間能夠喺熟食中心站穩陣腳嘅粉麵檔都各有自己嘅招牌菜，估你唔到地呢間最多人推介嘅係沙嗲湯！因為佢地嘅沙嗲湯麵並唔係最後先加沙嗲醬上去，而係由一開始就係沙嗲湯底，所以就算係茶餐廳常見嘅一碗沙嗲牛肉麵都特別香口。另外佢地嘅粉麵飯都好似車仔麵咁可以自由搭配，而下午茶就必試西多士同撈麵！
特色鑊氣小炒 煮廚
幾時都話每個熟食中心都總有一檔鑊氣小炒，呢間就勝在菜式配搭有新意，例如窩貼小唐菜睇落好似無乜特別，其實佢係煎到金黃香脆嘅墨魚餅，再喺墨魚餅當中加入小唐菜碎，外脆內彈牙之餘又唔油膩。鐘意食香口嘢送啤酒嘅朋友仔仲可以嗌炸大腸或者椒鹽魚。小炒方面煮廚小炒皇就夠惹味香口。
平民版All day breakfast 源成興大排檔美食
熟食中心都有英式All day breakfast？非也，開飯仔講緊係呢間茶餐廳全日供應嘅港式早餐啫，包一大碗火腿通粉或者沙嗲牛肉丁麵等粉麵，配腸仔煎蛋或者鮮茄奄列，同方包或者多士，想轉油醬多都係加$1，抵食到一個點。想食惹味啲嘅話必嗌炒麵，無論係雜扒炒一丁、上海粗炒定係乾炒牛河都係足料、乾身、有鑊氣而唔油膩。
文：Cathy
更多【熟食中心尋寶】：
熱門文章推介：
隨時接收最新資訊
讚好OpenRice專頁！