港九新界嘅街市熟食中心開飯仔都介紹過，不過你又知唔知其實灣仔嘅鵝頸熟食中心係全港第一個街市熟食中心？呢度有唔少檔口都係街邊做大排檔起家，搬到入熟食中心依然不減「味」力，無論係馳名清真咖喱羊腩、皮脆肉嫩掛爐燒鴨、香口鑊氣小炒定健康素食都有選擇，仲唔係各位為食友最愛？
無得輸咖喱羊腩 清真惠記
知，開飯仔知呢間小店好出名，不過講到鵝頸熟食中心又真係好難唔提到囉。最出名嘅係佢地嘅咖喱羊腩飯，用嘅係老闆家傳秘方，香濃微辣嘅咖喱同滑嫩軟腍羊肉就係最佳配搭，雖然咖喱汁比較多油，但送飯一流。另一名物就係掛爐燒鴨髀飯，燒鴨皮脆肉嫩又夠脂香，鐘意重口味嘅重可以撈咖喱汁食。
咖喱燒臘另一選擇 海記燒臘飯店
就好似兩生花咁，呢間飯店最出名嘅一樣係咖喱羊腩同燒鴨。如果要比較嘅話海記嘅咖喱汁辣嘅後勁比較強，而羊腩肉一樣滑溜。燒鴨髀飯嘅主角鴨髀就一樣有鴨油香而且想當Juicy，但皮就唔夠惠記脆喇。而且因為惠記係清真食肆，所以唔會有豬肉菜式，想食叉燒或者燒肉嘅朋友仔就記得要揀海記。
長龍人氣車仔麵 九記牛什粉麵
圖：Kan Lee
根據唔少食家心得，呢間舖絕對唔難搵，因為任何時候呢度都會有條長長嘅人龍！原因之一當然係夠抵食，一碗三餸足料車仔麵都係$28。二係車仔餸唔係一般行貨，魚餅煎得香口魚味又夠濃，而且因為多人嗌，好大機會食到新鮮炸起嘅炸魚餅，再加分。而牛筋腩、牛雜同豬紅都有水準。
街坊平實車仔麵 波仔記車仔麵
無獨有偶，同一個熟食市場裡面亦有另一檔車仔麵，價錢相約而最出名嘅同樣都係炸魚餅。有食家就指呢間勝在夠用心，無論揀邊款餸都一樣大大份又夠好食，例如牛腩炆得夠腍又入味，而且菜嘅選擇又多，Lunch食健康啲都得。最後嘅加分點係唔少食家都話波仔記嘅服務比九記好，難怪係唔少街坊嘅心頭好。
晚市稱霸小炒王 榮記(東成)飯店
如果話午市嘅鵝頸熟食中心係咖喱燒臘同車仔麵「三國鼎立」，晚市就由榮記嘅小炒「獨領風騷」！椒鹽魷魚鬚係必嗌嘅小菜，皮香脆而魷魚肉Keep到柔軟，最緊要係香口得嚟唔會太鹹。蒜香蟹飯同樣香口惹味，蒜粒落得夠重手。蒜蓉粉絲蒸蟶子、豉油王焗蝦同油盬水煮蜆等海鮮都係唔錯嘅選擇。
健康無味精素食 根記健康素食
無論係因為宗教信仰要食齋，定加入咗Green Monday行列嘅朋友仔，嚟到鵝頸熟食中心可以嚟呢間素食館。午市係雙拼或者三拼素菜飯，而晚市就做小炒，特別係人多嘅話建議先訂座。素叉燒有咬口味道又夠濃，鮮茄豆腐免治素牛最啱送飯。而且佢地奉行少油、少調味同唔落味精，夠健康。
文：Cathy
更多【熟食中心尋寶】：
熱門文章推介：
隨時接收最新資訊
讚好OpenRice專頁！