年，又過年，希望牛年會是個好年吧。新年梗係要試新嘢，喺大家都準備買糕過年嘅時候，畀啲新嘢大家先~有唔少餐廳同品牌都推出咗創新口味嘅賀年糕點呀，唔止口味創新連造型都創新，有Kitty造型年糕添啊，即刻睇睇！

芫茜蘿蔔糕 EATLA

芫茜控留意喇！呢間網店居然推出咗芫茜蘿蔔糕，於傳統蘿蔔糕底上加入大量新鮮芫茜，惹味臘⾁配上勁濃芫茜味道，芫茜控⼀定鍾意～雖然芫茜蘿蔔糕早喺一星期前已經售罄～由於唔想令咁多芫茜fans失望，店主決定於新年前最後加推！想買真係要襯手呀～

購買方法: https://www.eatla.co/

黑糖薑汁年糕及有機蘿蔔糕  莫忘煮食

本地品牌莫忘煮食創辦人Antony推出嘅金箔沖繩黑糖薑汁年糕及有機蘿蔔糕！有機蘿蔔糕選用新鮮有機蘿蔔，相對一般嘅蘿蔔糕更清甜，配上獨家秘方，比起傳統絲狀嘅蘿蔔糕更具有口感。金箔沖繩黑糖薑汁年糕利用健康嘅黑糖帶出主要甘味，同時減去傳統年糕過甜嘅油膩感，加埋薑汁就更有層次。

Hello Kitty薑汁年糕＋Hello Kitty奶皇年糕 Twinkle Baker Décor

HELLO KITTY粉絲一秒變心心眼啦！新年有咩理由唔食佢？唔捨得囉。呢兩款年糕，用六角型輪盤裝住，仲可以喺輪盤寫上唔同賀詞，齊齊轉出祝福行大運，玩味十足～年糕有薑汁同奶皇味，前者有淡淡辣味，但配上甜味中和，即使小朋友都啱食，口感煙韌；後者嘅蛋奶味同吉士味濃郁，椰漿清甜。

椰香錫蘭年糕 營致會館 

就咁睇樣可能會覺得呢個年糕同以往食開嘅差唔多，但食落就知內有乾坤呢~ 由米芝蓮二星粵菜餐廳推出嘅創新椰香錫蘭年糕，味道甜而不膩，糕身軟滑，有陣陣椰香味，加入錫蘭紅茶後就更加香醇。而且無添加任何防腐劑，夠晒天然。

雪蓮紅豆玉米糝糕+發財蓮藕五穀豐收糕 帝京餅店

每年都要有新口味嘅年糕創作都唔容易呢，佢哋今年仲有兩款：發財蓮藕五穀豐收糕、雪蓮紅豆玉米糝糕。前者啱晒要管理體重但又想應節嘅朋友仔，材料包括有鮮冬菇、靈芝菇同雞脾菇，啖啖菇菌香氣。再混合蓮藕五穀米同藜麥等健康食材，食多幾件都唔怕咯！而後者則以雪蓮子為主，滋補養顏，口味清新，淡淡香甜，粒粒雪蓮子同紅豆仲好有口感添。

八十年陳皮十勝紅豆年糕  夏宮 

陳皮同紅豆，呢兩款大纜都扯唔埋嘅材料，竟然可以擺埋一齊做年糕？呢款中日結合嘅年糕，用上八十年陳皮，配甜而不膩嘅十勝紅豆，撞撞下又幾夾喎，粒粒紅豆有咬口。

凍齡啖啖蠔皇鮑魚蘿蔔糕 尚鮑

呢間主打南非鮑魚嘅舖頭，就將鮑魚融合落蘿蔔糕度，同名廚合作，首創出凍齡啖啖蠔皇鮑魚蘿蔔糕。將南非慢煮鮑魚煨入獨門秘製嘅蠔皇鮑汁，再配搭乾瑤柱、臘味、蝦米等製成蘿蔔糕。除咗有絲絲甜香蘿蔔絲，每啖都仲會有埋鮑魚嘅鮮味，蒸又得煎又得。點埋秘製XO醬，多多層辣味，層次更加豐富。另外，更會附送SUN+ 維他命D納米口溶片2片呢。

黑珍珠奶黃年糕禮盒  唐宮小聚

黑糖珍珠興咗幾年，今年更加變埋做年糕口味。珍珠以木薯粉製作，奶黃年糕則加入鹹蛋黃同吉士製作，粒粒煙韌珍珠咬下咬下，幾有口感。

鮮淮山雜菌素糕 奇華

素食盛行，當然都要有素年糕啦——鮮淮山雜菌素糕以鮮淮山為主，混入顆粒分明嘅南瓜，並加入多款清香嘅雜菌，層次鮮明。而且仲貼心咁採用素食蠔油提鮮，完全照顧到素食朋友仔嘅需要！

南瓜薑黃紅藜麥燕麥奶年糕  Kind Kitchen、Green Common

呢個品牌一直致力推廣素食，純素賀年糕點又點少得佢哋？全部都採用植物性食材同超級食材，不含人造色素同味精，營養豐富。其中特別推薦全新口味——南瓜薑黃紅藜麥燕麥奶年糕，口感軟糯，層次感十足。糕點中加入可以抗氧化嘅新鮮南瓜同薑黃。薑黃仲有效抗炎，增強免疫力添，另外加埋有好高膳食纖維嘅紅藜麥，絕對係健康之選呢！

重要優惠

另外，即日起凡經OpenRice購買賀年食品嘅餐飲券，輸入優惠碼【CNY200】，滿HK$200即減HK$40，輸入優惠碼【CNY500】，滿HK$500即減HK$120！優惠名額有限，先到先得，額滿即止。（詳情按此）

文：Hailey
編：Kar