好多人都鍾意去尖沙咀覓食，最近山林道又多咗個新場！全新大樓銀座38最近正式進駐山林道，地點位於佐敦同尖沙咀中間，方便之餘仲有好多間新餐廳，西餐、主題酒吧、日本菜同火鍋等都有。襯復活節假就到，不如約埋三五知己去覓食，順道打個卡啦~ 以下同大家介紹嘅四間餐廳都各有特色，打卡、體驗一流！

火車主題酒吧 火車頭

銀座38內淨係酒吧都有兩間畀大家選擇，最高層嗰間係靚景時尚酒吧，而喺一樓嘅就係行懷舊復古風嘅火車主題酒吧。「火車頭」牆上掛滿各式各樣嘅火車畫作，就連昔日大圍火車頭嘅場景都好似重現眼前咁，加埋杯酒確係別有一番味道。 

酒吧晚市主要提供各式佐酒小食，如炸雞、牛柳粒、雞腎同雞泡魚乾等，另備有啤酒、紅、白酒、生啤、各類雞尾酒及洋酒等以供選擇，每晚九點前Happy Hour仲有生啤買一送一優惠，以尖沙咀區嚟講堅係抵飲，放工同同事朋友去飲返杯、掟下飛鏢唱下K，咩壓力都冇晒。 

另外餐廳亦有午市套餐供應，選擇多元化，包括All Day Breakfast、蕃茄肥牛湯烏冬同碎蛋吞拿魚牛角酥等，每樣都係即叫即整，係充滿誠意之作啊。

火車頭
地址: 尖沙咀山林道38號銀座38 一樓
電話: 26682028

聚餐之選 籽樂廚房

籽樂廚房行簡約路線，望落同一般西餐廳無異，都係主要供應西式美食，但原來呢間社企餐廳，聘請嘅員工近9成都係聽障人士同傷健人士，為嘅係希望可以宣揚傷健共融嘅訊息，幫助佢哋投入社會，好有意義。

餐廳內嘅員工有分黑白色制服，白色制服嘅係傷健或有學習障礙嘅人士，而黑色制服就係聽障人士，至於溝通、落單等問題，大家完全無須擔心，一嚟餐廳門口位置有手語點餐簡介，二嚟其實只要大家講得慢少少，佢哋都可以聽得明啊。當然，大家仲可以學埋點樣用手語點菜同表達謝意，感受下新嘅用餐體驗啦～另外餐廳內佈滿好多有正面金句嘅海報，食完個飯成個人都充滿正能量！

佢哋煮出嚟嘅食物質素，絕對可以話係水準之上，每一份都係佢哋用心之作。如黃金（鹹蛋黃）意粉，有鹹蛋香之餘亦唔會過鹹；BBQ汁燒原條西班牙黑毛豬豬肋骨，大大份得嚟肉質又軟腍；燒巨型美國斧頭扒更加係推介之一，真‧巨型啊，啱哂一大班朋友分享！

籽樂廚房
地址: 尖沙咀山林道38號銀座38 三樓
電話: 26680450

閨蜜約會必到！典雅傳統英式下午茶　Victorian Rose Tea Room

如果食好嘢之餘，仲可以食埋環境就正！維多利亞式裝潢嘅Victorian Rose Tea Room (VR)，一凳一枱都充滿英國古典味。坐喺度食傳統英式下午茶，真係突然變咗英式貴族，已經唔記得自己身處香港！

傳統英式下午茶作為VR嘅皇牌，真係好精緻！英式三層架上面，放有甜品師每日用新鮮食材製作嘅甜點同鹹點。VR仲會因應唔同當造食材，隨季節改變甜點同鹹點菜式𠻹。

除咗英式下午茶外，VR另一皇牌就係海鹽焦糖醬配伯爵茶戚風蛋糕，其實戚風蛋糕嘅英文就係Chiffon Cake，言下之意就係口感好似雪紡咁輕盈，而且蛋糕充滿蛋黃香。加上伯爵茶味忌廉做出嘅立體玫瑰花，配上自家製海鹽焦糖醬，甜而不膩啱啱好。

Victorian Rose Tea Room
地址： 尖沙咀山林道38號銀座38 十七樓全層
電話: +852 2789 1999/9744 0188（whatsapp)

酒店大廚坐鎮　唔同時段都可以食好嘢　Nathanhouse

主打海鮮嘅Nathanhouse，專誠請嚟酒店行政主廚譚大民師傅坐鎮，為食客帶嚟酒店級菜式外，譚師傅都有更大發揮空間，嘗試更大膽創新菜式。率先帶嚟新菜式就有意式薄切龍蝦刺身、日本雪場蟹腳同磯煮南非鮑魚等。同場仲有招牌早餐同下午茶𠻹，咩時間都食到好嘢！

意式薄切龍蝦刺身，用鱘龍魚子醬、青吉欖油配上龍蝦刺身，清新爽口。

日本雪場蟹腳，蟹腳大大隻，大廚以橘子沙帶出蟹肉鮮味，蟹控食得滿足。

磯煮南非鮑魚，新鮮運到嘅南非鮑魚夠厚肉，大廚慢煮五小時令鮑魚鮮味更濃郁。

正所謂一日之計在於晨，所以Nathanhouse特別喺朝早8點至中午12點提供豐富早餐。首先嚟一杯鮮榨橙汁同新鮮生果盤喚醒腸胃，享受呢個健康早晨。另外仲有十幾款歐陸菜式慢慢揀，配埋餅廚新鮮自家製嘅牛角包同多士，再慢慢嘆杯即磨咖啡或茶，開展美好嘅一日！

下午茶時段係每日最放鬆嘅時間，如果可以一邊食小甜點、飲杯清香熱茶；一邊望著日光慢慢變成黃昏，實在好寫意。Nathanhouse由下午3點至黃昏6點就有優雅下午茶。為咗切合唔同食客嘅喜好，會有多款鹹點同甜點揀，全部都由大廚自家製，新鮮又好食。

每日唔同時間，都應該享受唔同菜式－朝早食豐富水果；Happy Hour飲杯冰涼啤酒；夜晚就食海鮮、鋸扒，揀啱時間嚟食好嘢，咁先係生活態度。

Nathanhouse
地址: 尖沙咀山林道38號地舖
電話: 23888193