「食晒啲飯呀！唔好嘥嘢呀！粒粒皆辛苦㗎！」相信大家都由細聽到大，聽咗咁多年你哋又做唔做到呢？自己煮飯就容易控制份量，出街食可以點？用OpenRice 搵「咪嘥嘢食店」咪幫到手囉！列表上嘅餐廳都參加咗環保署「咪嘥嘢食店計劃」，帶頭實施減少廚餘嘅措施同提供食物份量選擇，同食客一齊合力惜食減廢為環保出一分力。我哋揀「咪嘥嘢食店」幫襯，就唔怕畀人日哦夜哦咪嘥嘢啦(笑)。
打開OpenRice 進入「進階搜尋」，喺「食品/餐廳類型」就可以搵到「咪嘥嘢食店」喇。
「iBakery 愛烘焙餐廳」 惜食環保社企
「iBakery 愛烘焙餐廳」呢間社企西餐廳，除咗為弱勢社群提供就業機會外，亦係其中一間「咪嘥嘢食店」，有提供少飯、少意粉等選擇，好啱附近鍾意健康輕食嘅OL。食客可依自己食量揀選份量，同時餐廳亦會從控制食材採購量、利用「先入先出」原則、善用剩餘食材等方面入手，減少廚餘。
餐廳位於金鐘添馬公園，值得推薦畀附近鍾意輕食嘅OL，少飯少意粉份量啱啱好。
餐廳員工為每位食客落單時，均會主動問「使唔使少飯／少意粉」。如食客叫凍飲，佢哋係唔會主動提供飲管㗎，食客有需要的話就會提供紙飲管。以上全靠餐廳為員工提供足夠訓練，教導惜食減廢嘅重要性，時時刻刻發揮「咪嘥嘢」精神。今時今日大家嘅環保意識都提高咗，故有更多食客願意配合措施，相輔相成，與餐廳合力源頭減廢。
員工唔會主動提供飲管，不過都會預備紙管畀有需要嘅客人。
疫情期間 減少蔬菜貨量免浪費
除咗店面以外，廚房對減少廚餘都擔當一個重要角色，例如係控制食材貨量同實行「先入先出」原則都可避免同減少產生廚餘。廚房員工會依經驗調整新鮮食材入貨量，以去年疫情為例，員工就大大減少採購蔬菜，避免因過量存貨而造成浪費。
「先入先出」原則 由舊至新使用食材
處理存貨原來都大有學問，餐廳會按「先入先出」原則將舊貨放於當眼處，提醒員工由舊至新使用存貨，避免食物過期。另外，餐廳只會在收到客人Order 沙律時，才會由雪櫃拎蔬菜出來清洗，即叫即整，食落更新鮮，同時亦可延長蔬菜保鮮期。
餐廳招牌菜係素食「自家製香草意粉」，青醬醬汁以羅勒、紫蘇葉、松子仁等打蓉而成。
素食製作過程所耗用嘅能量一般比肉食製作低，做到低碳足跡，既環保又健康。
餐廳每星期都會引入唔同魚類入饌，今次嘅菜式係「香煎龍脷魚柳伴時菜 配香酒檸檬牛油汁」。
重用咖啡渣 作肥料種植延續生命
有靚咖啡當然有大量咖啡渣，唔講未必知將咖啡渣烘乾後有好多用途，可以放入雪櫃、鞋櫃吸味，又或者好似呢度嘅員工咁拎返屋企用作肥料來種植。有時員工仲會將已收成嘅水果拎返嚟同大家分享。惜食減廢就係咁簡單，連結人與人，亦連結人與大自然。
員工沖調即磨咖啡後，剩餘咖啡渣用途多多。
外賣袋走塑 自備餐具齊減廢
疫情下多咗人買外賣，即棄廢物隨之增加。如果每位食客都自備環保購物袋、餐具同食物盒，絕對可以幫手減廢！iBakery 就用紙袋代替外賣膠袋，並不時推出環保杯Keep Cup、稻穀植物纖維製嘅便攜餐具換領活動，鼓勵大家自備餐具，齊齊走塑減廢。
iBakery 以紙袋代替膠袋，為走塑出一分力。
餐廳不時推出環保杯Keep Cup 同便攜餐具換購計劃，鼓勵大家減少使用即棄用具。
麵包店「品穀」 捐贈麵包分享溫暖
除咗餐廳外，原來「咪嘥嘢食店」都有麵包舖㗎。「品穀」由兩位擁有法國藍帶嘅兄弟開設，各自負責製作麵包同甜品，材料以法國、日本有機麵粉為主。
位於灣仔嘅「品穀」設計俐落簡潔，以有機麵粉製作多款麵包及甜品。
無防腐麵包保存期短 要趁新鮮盡快食
麵包舖無得少飯或少意粉，但同樣努力實施減少廚餘嘅措施和向顧客傳遞惜食信息。店內會貼上溫馨提示，鼓勵大家珍惜食物，亦會提供唔同Size 嘅麵包供顧客揀選；結賬時更會提醒客人，因麵包無添加防腐劑，保存期較短，拎返屋企就要盡快食晒喇！
麵包展示櫃貼上「Cherish Food (珍惜食物)」提示。
剩餘可食用麵包 捐予社福機構
店員會跟據經驗調節每日麵包出爐數量，如有麵包賣剩，店員會在收舖前將剩餘麵包妥善存放，準備捐予社福機構幫助老人家同弱勢社群，唔浪費食物之餘又幫到人，其實我哋日常生活都可以做到㗎！
妥善存放剩餘麵包，準備運往社福機構。
妥善存放麵粉 每月滅蟲驅鼠
如果麵粉無妥善存放可能會變壞而造成浪費㗎，所以店員會將麵粉存放於乾爽地方，而已拆開包裝嘅麵粉則放於密封容器中，避免受潮變壞。同時麵包舖每月做好滅蟲驅鼠工作，避免食材受污染。
麵粉適宜放於乾爽地方，避免受潮變壞。
自備環保袋 源頭減廢走塑
以前買麵包，店員總會用膠袋將每個麵包分開裝，直至大家開始重視環保後，膠袋使用量都隨之減少。喺呢方面，「品穀」都有實行好多相應減廢措施，例如每次都會詢問客人有無自備環保購物袋、全面用防油紙袋代替膠袋、同款麵包會放於同一紙袋中，避免浪費。
餐廳食店都願意為走塑努力，我哋作為顧客亦可以主動提議將唔同款嘅麵包放埋一個袋；又或隨身攜帶環保袋、食物盒，從源頭減廢走塑。
店家推出一系列減廢措施前幾個月，已預先通知客人，方便大家及早適應。
(左)「栗子之星」以法國栗子蓉、布里歐麵團製成，口感猶如鬆軟蛋糕。 (右)「榛子之舞」外層參考牛角酥酥皮，夠香夠鬆化；內餡則有原粒榛子、黑朱古力等。
(左)「檸檬茶」麵包以美國紅茶粉製作，混入蜜漬檸檬皮丁，聞落有陣陣清新茶香，真係好似「食檸茶」咁！(右)「忌廉粟米」內藏自家製忌廉粟米餡料，滿滿香甜粟米締造豐富口感。
果醬都係手工自家製，無添加防腐劑，買咗記住開封後1個月內食用，食完個玻璃樽仲可以循環再用，咪做「大嘥鬼」呀。
冷泡茶樽附有茶隔 即開即飲唔使飲管
呢度亦有自家冷泡茶—冷泡伯爵茶、冷泡鐵觀音等。每朝新鮮冷泡，味道清新。最貼心係冷泡茶樽有茶隔設計，直接飲用時唔使飲管都可隔走茶葉。
(左起) 冷泡伯爵茶、冷泡鐵觀音。
冷泡茶樽附茶隔，唔用飲管都唔驚飲到成口茶葉。
只要花多啲心思、妥善存放食物、捐出剩食等方法，盡量避免和減少廚餘產生，已可以為保護環境出一分力，好似嗰位員工咁，以咖啡渣施肥種植，再將收成嘅水果分享畀身邊嘅人，將實踐環保嘅成果傳承他人，我哋日常生活都輕鬆做到㗎！