正所謂「小飲怡情」，有時食飯加多支啤酒，除咗可以增加飯局氣氛之外，啤酒食物配搭得宜，更可以提昇食物嘅味道。生力啤酒係唯一喺香港自設大型酒廠嘅啤酒品牌，每日新鮮釀造，適合配搭新鮮即製嘅美食。最近生力啤酒聯乘多間中式及港式風味餐廳推出「生力招牌菜」，只要去到參與活動嘅餐廳點選指定菜式，出示已登記領取嘅優惠券*，就即刻送支生力啤酒大樽裝過你！

唔講唔知你知唔知，原來生力啤酒廠設喺元朗，咁就同大家睇睇幾間同樣位於元朗嘅餐廳有咩招牌菜，一齊歎生力，享美食！

松記燒鵝飯店

喺元朗有近30年歷史嘅老店，大牌檔打冷格局，菜式份量都算大碟，最出名就當然係燒鵝啦。

 生力招牌菜：椒鹽鮮魷  $128

全碟金黃色嘅椒鹽鮮魷，香氣樸鼻。鮮魷嚿嚿都好大嚿，炸漿唔算厚，薄薄一層幾脆口。而且有大量炸蒜鋪面，惹味鹹香，味道濃郁，食多幾嚿可能會有少少口渴，配返隻清爽嘅啤酒就啱晒。

 松記馳名燒鵝 $268 半隻 + 椒鹽鮮魷

餐廳以燒鵝做主打，一場嚟到當然要試埋啦。半隻都好大隻喇，經猛火燒製嘅鵝皮呈深紅色，肉質仍然保持嫩香，咬落仲幾juicy𠻹。

新偉記風味小廚

呢間餐廳相對比較細間，但枱與枱之間又坐得幾開，闊落自在。主力供應多款中式小菜，豬牛雞肉等都有唔少選擇。

 生力招牌菜：芥末凍雜盤$118

啤酒同美食配對，都係一門有趣嘅學問。爽口而帶槐花香嘅啤酒，配襯帶微嗆嘅冷盤，有助提升兩者嘅味道層次，令口感更豐富。所以呢間餐廳嘅生力招牌菜就係芥末凍雜盤喇，就咁睇好似好清咁，但內藏豬耳、豬肚、牛𦟌、素鮑片同魷魚，一食就見真章。點得愈多汁，Wasabi味就愈刺激。

招牌頭抽雞 $148  + 芥末凍雜盤

同場推介招牌頭抽雞，雞肉滑身，豉油味濃香帶甜，食落仲有陣陣麻油香𠻹。

煮漲天下重慶老火鍋

主打地道重慶火鍋嘅呢間火鍋店，最大特色一定係佢哋自家製嘅熊仔牛油，賣相可愛，但每日限量供應咋留意返，想食嘅話最好提早預訂。

 生力招牌菜：香辣特色鴛鴦鍋$138

成日都話湯底係火鍋嘅靈魂，食得辣嘅朋友仔，無懸念，香辣特色鴛鴦鍋。一邊係以青花椒、紅花椒等熬煮嘅麻辣湯，另一邊係較清香嘅蕃茄加菇湯底。自家製嘅熊仔其實係紅油牛油，一路打邊爐一路慢慢融化，湯底嘅麻香滲有陣陣牛油香。平時打邊爐已經鍾意邊打邊飲酒，今次呢個香辣鍋，就更加要配返支清爽型嘅啤酒。因為酒精會加強辛辣嘅感覺，夠晒過癮。

 黑柏葉 $108 （全份） + 香辣特色鴛鴦鍋

打邊爐除咗必食肥牛之外，推介試試呢度嘅黑柏葉。新鮮爽脆，索埋湯汁就更加吸引。

*即拎「生力招牌菜」送酒優惠：(按此)