【特約分享】茶記實測西多、菠蘿油控必睇

下午茶去茶餐廳食個菠蘿油、西多士，再加杯奶茶真係又抵又爽。但唔少人見到大大塊牛油就驚，驚塊牛油唔知咩來頭，食落肚健唔健康㗎？要食得安心，食材來源梗係好重要啦！其實只要留意貼著Anchor標誌嘅餐廳門口，就係用梗紐西蘭Anchor安佳牛油喇，由鮮牛奶製造，特別健康㗎！

貼著呢個標誌，就代表餐廳用梗來自紐西蘭牛油喔！

嚟自紐西蘭　「鮮」係真牛油

就咁講鮮牛奶製造，你可能想像唔到塊牛油有幾特別。其實佢哋嘅牛油不含防腐劑同色素，而且於紐西蘭製造，奶味香濃，喺紐西蘭已經130年歷史喇！

實測用Anchor牛油茶餐廳
大大個菠蘿油九龍餐室

開飯仔就搵咗幾間用Ancho牛油嘅茶餐廳，實測吓佢哋嘅下午茶正唔正先。先睇有大大個菠蘿油嘅九龍餐室，佢哋自設餅房由朝早6點開始新鮮出爐麵包，菠蘿油仲係香港數一數二咁大個呀！

九龍餐室嘅菠蘿油真係勁大個，配返杯大排檔傳統沖法奶茶就啱晒喇。

冰鎮牛油

冰鎮奶茶就聽過，冰鎮牛油真係第一次聽呀！老闆話想客人食到牛油紮實口感，所以牛油係冰鎮上枱，由客人親自放入菠蘿包。入口先食到菠蘿包輕脆外皮，後續就係牛油香滑口感同鬆軟麵包。

九龍餐室自設餅房，全日都食到新鮮出爐麵包。

激厚西多士萬興茶餐廳

西多士最正就係外層夠脆，又有牛油奶香同糖漿……真心諗起都想食！今次開飯仔嚟到萬興實測，喺平日3、4點都坐滿食客等食，水準應該唔錯呀。等到西多上枱就知點解咁受歡迎，因為西多極厚，外層炸得金黃；內層係傳統花生醬餡。

原塊牛油上枱，先食到牛油喺口中慢慢化開嘅口感。

唔知你喺茶餐廳有無留意過，有啲牛油上枱後可以保持原塊；有啲好快就溶成液態，其實好大機會因為「純正牛油」同「人造牛油」嘅分別。因為「純正牛油」要放喺雪櫃保存，使用前先拎出切塊，所以你會見到完整一塊塊牛油。相反無咁健康嘅「人造牛油」，平時可以放喺室溫唔易變壞，當放落有熱力嘅西多士上梗係好快溶晒啦。

咁「純正牛油」點解健康啲？因為真係以純正牛奶製造，當中不經氫化過程，因此不含人造反式脂肪。「人造牛油」所含嘅人造反式脂肪，係有機會增加患上心血管疾病風險㗎，識分辨「真牛油」真係好重要。

Anchor牛油係100%純正牛油，無咁易完全溶化㗎！

懷舊做法半煎半炸西多士更少油

老闆透露，要做到咁厚又唔腍嘅西多士，秘訣就係用「半煎半炸」懷舊做法，用嘅油少咗，西多士都乾身啲唔油膩，外層亦脆得鬆軟，口感平衡得啱啱好。

下午茶時間真係好多食客，想食就早啲嚟喇！

老字號祥景茶餐廳

實測當日已見到好多街坊幫襯，老闆都話呢度開咗好多年喇，幸得一班街坊多年支持，唔怪得咁多食客一坐低，餐牌都唔駛睇就講句「菠蘿油、凍奶茶吖唔該！」。祥景茶餐廳同樣有自己餅房，全日無間斷出爐新鮮麵包，所以菠蘿油好香脆鬆軟㗎！

呢度嘅菠蘿包唔會「死甜」，因為老闆肯用貴啲嘅麥芽糖，加埋塊靚牛油真係無得輸。

高溫快炸西多士

西多士賣點就係夠脆口，重點係炸油要夠熱，用明火高溫快速炸脆西多士，令西多士唔會炸太耐同吸太多油，又脆又健康啲呀！

老闆真係好重視食材質素，蛋漿都係用貴價雞蛋，食落更有蛋香。

脹卜卜菠蘿油好味屋

唔知你係咪都咁著重色、香、味，食嘢除咗要好食外，樣靚都好重要㗎，好味屋嘅菠蘿包就夠晒脹卜卜喇！加埋原塊牛油真係見到都想食呀。呢度嘅菠蘿油全日都供應，即叫即焗，所以外皮都幾脆口。

好味屋嘅菠蘿包焗到脹卜卜。

想食健康天然嘅紐西蘭Anchor牛油，留意餐廳門外有呢張標誌就啱喇！

地址: 北角炮台山英皇道275號南天大廈地舖

電話: 23933198

地址: 跑馬地昌明街2號地舖

電話: 25749228

地址: 屯門田景路31號良景廣場4樓L414A號舖

電話: 24552422

地址: 鰂魚涌船塢里16號匯豪峰地下F,G舖

電話: 26563288