平時gathering飯局諗食咩都已經好頭痕，遇著好朋友生日，諗餐生日飯去邊食就更加頭痕！通常你問主角想食問，佢都會答你冇所謂。但冇所謂之中，生日飯總不能夠求其，環境氣氛、食物質素、生日驚喜，甚至乎你同呢個朋友有幾friend等，通通都係考慮因素。就等開飯仔畀啲建議你哋參考下，上次就介紹過幾間窩心西餐廳，今次講下好多女生都鍾意嘅日本嘢~
放題x生日願望球 殿 大喜屋日本料理
食物：★★★★☆
通常啲人聽到放題或者buffet就會好開心，咩都想食又咩都有得食吖嘛。放題嚟講呢間幾高質，刺身連拖羅都可以任叫，幾新鮮㗎，另外食返啲松葉蟹腳、流心芝士玉子等等都回票價，雪糕仲要係movenpick、Haagen dazs、milk top都有，心心眼呢。
生日祝福：★★★★☆
早啲訂位講定嘅，生日有靚靚dream ball送。個dream ball外層係朱古力，扑開入面有tiramisu，而隻碟上都會畫字。不過留意返，呢個優惠只限生日前後7日內。
價錢：$$$$
抵食壽司x壽司蛋糕 千の味刺身壽司專門店
食物：★★★☆☆
如果你咁啱手緊，可以考慮下呢間喺長沙灣嘅小店，堂食、到會都有，2月尾前都做緊刺身類買一送一優惠，幾抵食。軟殼蟹卷同鰻魚芝士卷有唔少網民推介，另外仲有花之戀嘅海膽版都唔錯。
生日祝福：★★★☆☆
日本嘢都有蛋糕食，不過係壽司蛋糕，面頭舖滿晒三文魚、吞拿魚、甜蝦等等嘅魚生，入面就係壽司飯加蛋加蟹子，砌出嚟都幾靚。仲有幾個size揀，由5吋到9吋都有。
價錢：$$
鐵板燒x卡通生日飯 秋田鐵板燒刺身專門店
食物：★★★★☆
貴價鐵板燒，其中和牛薄燒中間仲要夾埋蒜片同蔥花，令到片牛更加香口。而龍蝦拆肉後，同樣用蒜片炒香，肉質鮮甜爽口，最尾仲可以有紅豆銅鑼燒做甜品！
生日祝福：★★★★★
基本上揀嚟呢間慶祝生日，都係為咗呢個鐵板卡通炒飯㗎喇！同師傅講聲你想要咩卡通，師傅就會利用櫻花蝦、米、蛋等等嘅食材整咗佢出嚟，跟手再用埋雞蛋寫「生日快樂」，夠晒開心！
價錢：$$$$$
鐵板燒x卡通生日飯 鐵板超
圖：Kenkoko
食物：★★★★☆
同樣都係鐵板燒，呢度最受歡迎之一嘅菜式係火焰龍蝦，炒嗰陣勁猛火，視覺效果滿分，味道亦都有咁上下水準，夠鮮夠香。其他招牌菜包括法國鵝肝、澳洲大鮑魚等等。
生日祝福：★★★★★
全間餐廳都係鐵板枱，包保你一定睇到師傅嘅「表演」。睇住師傅三兩下手勢，就炒好碟卡通飯，再用蛋汁寫上祝福字句，啲卡通樣仲要都砌得幾似，係正嘅。
價錢：$$$$
日韓放題燒肉x 生日優惠 校長燒肉日韓料理
食物：★★★★☆
身邊總係有啲貪心嘅朋友，又想食日本嘢又想食韓燒咁，元朗呢間舖就可以一次過滿足晒佢哋嘅願望！有刺身同燒肉不特止，仲要有生蠔同長腳蟹食，想食幾多就拎幾多。
生日祝福：★★★☆☆
呢度嘅生日祝福，唔止祝福你個friend，仲祝福埋你，因為佢哋有生日同行優惠呀！4-12個人上去食生日飯，就全枱都有折呀~ 另外如果你早一日訂定，仲會送埋個壽司蛋糕過你。不過聽講佢哋生日優惠個個月唔同嘅補充返。
價錢：$$$
文：Kar
其他生日飯局推介：
同好朋友慶生食咩好？ 窩心西餐篇
100%日本原產人氣蛋糕店登陸太古 Tea Time生日蛋糕有著落（有片）
隨時接收最新資訊
讚好OpenRice專頁！
