好快就到聖誕節啦！如果搞家庭派對想有氣氛啲嘅，買返個靚靚聖誕蛋糕做甜品就最啱啦～唔少烘焙店都推出聖誕蛋糕，睇吓邊間外貌同口味最啱你心水。

目錄

75%特濃朱古力黑森林蛋糕、三重朱古力慕絲蛋糕 LIFETASTIC

呢個蛋糕品牌首次同意大利朱古力品牌 Venchi 聯乘合作推出兩款朱古力蛋糕～75% 特濃朱古力黑森林蛋糕夾層選用 Venchi 75%黑朱古力慕絲、黑櫻桃果醬及朱古力海綿蛋糕，慕絲口感綿密絲滑，配埋酸甜嘅黑櫻桃果醬更有層次，頂層嘅櫻桃酒忌廉更散發淡淡酒香。三重朱古力慕絲蛋糕由朱古力海綿蛋糕、白朱古力慕絲、牛奶朱古力慕絲及 75% 黑朱古力慕絲組成，集香甜、奶香及甘甜於一身，餅底嘅朱古力布朗尼濕潤綿密，多重滋味。

焦糖脆脆薑餅人巴斯克芝士蛋糕、抹茶聖誕樹巴斯克芝士蛋糕分享杯 Soulgood Bakery

主打巴斯克芝士蛋糕嘅餅店，聖誕節推出多款聖誕限定口味。焦糖脆脆薑餅人巴斯克芝士蛋糕係原味巴斯克芝士蛋糕配上 Lotus Biscoff 焦糖餅乾醬及焦糖曲奇脆脆，甜而不膩，薑餅人造型仲好可愛～抹茶聖誕樹巴斯克芝士蛋糕分享杯由 7 個或 12 個迷你兩吋巴斯克芝士蛋糕組合而成，用丸久小山園抹茶製成，啱晒買嚟 Party Share 食！

伯爵茶芝士聖誕樹蛋糕、聖誕冬甩禮盒 Pâtisserie Jane

啱晒相機食先嘅伯爵茶芝士聖誕樹蛋糕，伯爵茶茶香濃醇，加埋香濃嘅忌廉芝士內餡及面頭唧上香緹忌廉，好味又滿滿儀式感。另外有推出聖誕冬甩禮盒，共有三款口味，分別係抹茶、紅絲絨及朱古力，紅絲絨口味更係用紅菜頭天然色素染色，送禮自用兩相宜。

聖誕回憶蛋糕、朱古力魯道夫戚風蛋糕 The Cakery

呢間嘅聖誕蛋糕造型都好吸睛，聖誕回憶蛋糕係一個聖誕小屋蛋糕造型，頂部擺放迷你聖誕樹同由煙囪爬落嚟嘅聖誕老人，旁邊更有小雪人裝飾，滿滿夢幻節日氣氛～客人可選純素、無麩質、有機等材料作蛋糕基底，更可以自選蛋糕口味，好貼心呀。朱古力魯道夫戚風蛋糕係無添加任何乳製品嘅朱古力戚風蛋糕，小鹿造型一樣可愛！

聖誕樹幹蛋糕、雪人甜甜圈 Pane e Latte

充滿異國風情嘅意大利咖啡店，12 月期間亦有供應唔同聖誕甜品，如 Pane e Latte 聖誕樹幹蛋糕，有黑森林和紅果肉兩種口味選擇，高顏值又好味～雪人甜甜圈配上自家製榛子醬同椰子，兩者融合得好好，香甜帶陣陣椰香～

榛子朱古力網格拿破崙、草莓麻糬網格拿破崙 『百子』燒菓子 & 洋菓子 專売店

一間好有人氣嘅拿破崙小店，主打獨樹一幟而香脆嘅網格酥皮、幼滑香甜嘅吉士忌廉及唔同風味嘅內餡～最近推出多款新蛋糕，包括榛子朱古力網格拿破崙，以黑朱古力及榛子組成雙重吉士醬，再配以榛子朱古力脆脆，加埋香甜脆身嘅酥皮真係多重口感！草莓麻糬網格拿破崙於原有嘅草莓口味之中加入麻糬，酸酸甜甜之餘仲多咗份煙韌口感。

文: Yanica