盆菜寓意合家團圓、盆滿砵滿，內裡各種食材更係各有意頭，好似髮菜蠔豉（發財好巿）、豬手（橫財就手）咁。不過講真，一個盆菜入面有幾多髮菜都唔係最重要，最重要係一家人喺呢段時間，仍然能夠齊齊整整、健健康康咁一齊食餐團年飯/開年飯嘛。

當然，豪有豪食（傳送門：新年豪華食！ 米芝蓮/酒店級盆菜精選），溫馨有溫馨食，除咗近日得到好多人支持，接單接到接唔切嘅基隆茶餐廳（佢哋喺Facebook宣佈而家只接受2月4至15日嘅盆菜訂單，另外會喺1月28-31日上午11點起，每日預多少少盆菜畀大家到餐廳即埸購買）外，都重有好多街坊小店有盆菜供應，而且各有特色㗎。

富記大排檔 鮮鮑金蠔極尚盆菜

 圖：餐廳Facebook

大圍呢間大排檔，有逾30年歷史囉，每年新年都悉心為街坊準備盆菜過節，今年都唔例外。最頂層有原隻南非鮮鮑，又有流浮山金蠔等多款海鮮，中間同底層亦有沙頭角走地雞、紅燒腩肉、發財髮菜等16種材料，重要係即日新鮮製作，逐個逐個人手砌㗎。4人、6人定10人用嘅份量都有，記得早3日訂啊。

供應日期：即日至2月13日

日常料理×日和居酒屋 日式盆菜

  圖：餐廳Facebook

位於元朗嘅呢間日式小店，就推出創新嘅日式盆菜，選用食材包括秘製醬汁鮑魚、秘製廣島蠔、原隻特大虎蝦、北海道鮮帶子、蒲燒原條鰻魚、鹿兒島豬軟骨等等，而且更有日式拉麵喺底𠻹，幾有驚喜。加埋無激素雞白湯底，帶出陣陣鮮味，咁就可以過返個和風新年啦~

原汁原味   龍蝦盆菜

 圖：餐廳Facebook

灣仔呢間粵式懷舊中菜館，平時著重呈現菜式嘅原汁原味，盡量少油。新春盆菜一樣健康，兼有睇頭𠻹。除咗平時見慣見熟嘅食材，例如鮑魚、海參、花膠，蠔豉等等之外，更有澳洲龍蝦同蟲草花啊，非常豐富！Size則有6人、8人、10人選擇，不過溫馨提示一下，要早2日預訂，同埋1月31日之前交收呢。

Pantry Foodies   特盛鮑魚盆菜 /溫馨滿屋盆菜

 圖：餐廳官網

主力做到會嘅呢間小店，新年亦會提供盆菜到會，並由擁有超過40年經驗嘅主廚主理。今年有2款盆菜選擇，均以原汁原味熬製，絕無添加防腐劑同味精。想食豪少少嘅有特盛鮑魚盆菜 ，想住家多少少呢就有溫馨滿屋盆菜。前者包有原隻8頭鮑魚、特級瑤柱同滋補魚鰾等共十幾種材料；後者則將鮑魚換作鮑汁螺片。

盛記盆菜&盛記麵家 平安盆菜

 圖：kwan._.

相信沙田嘅街坊對呢間餐廳一啲都唔陌生，重可能年年都幫襯𠻹。由圍村村長親自主理嘅平安盆菜已經推出咗好多年，食材、烹調方法同味道都夠晒正宗，最難得係冇加味精。近20款食材包括有古法白切雞、明爐大鴨、新鮮門膳、圍村腩肉、酥炸荔芋等，當然唔少得髮菜啦。size選擇重好彈性，由2-4人嘅迷你盆，到12位以上嘅大盆都有供應。

文：Kar