今年開飯仔特別搵咗自命對追求味覺有強烈使命感嘅「特種開飯團」，進行十面埋伏、吖唔係、係全面巡邏全港九新界，一日食足十餐幫大家地氈式搜索，從唔同地區、唔同菜式當中搵出真正本土滋味！
講起意大利菜，唔少人第一印象都係意粉或者Pizza，先唔講呢兩道菜嘅賣相形態同食材配搭都可以千變萬化。香港地意大利餐廳都唔少，想要站穩陣腳當然亦要有相當特色！今次由最鐘意試新嘢同Fusion菜嘅好新偵察兵Scout介紹一下入圍嘅意大利菜餐廳，睇完報告先投票！
獨家黑松露芝士Pizza 金船長餐廳
正所謂「人做我唔做，殺出新血路」，呢間餐廳就係靠一碟造型同味道都令人一試難忘嘅黑松露菌醬意式馬斯卡普芝士夾心比薩建立口碑。一上枱你可能會以為佢係多士，但食落入面嘅黑松露醬同半溶芝士香味，加埋外脆內軟嘅口感已經無得輸，再點少少提子汁更加係畫龍點睛。
旺中帶靜驚喜樓上店 Babbo Trattoria
呢間餐廳雖然開喺銅鑼灣鬧市，但上到去餐廳就變得寧靜舒適。當中最為驚喜嘅係凱撒沙律，因為夜晚堂食會有一大塊Graba Padano芝士，由店員喺你面前幫你刨片，想食幾多都得！辣味番茄鑲蛋佐特製麵包同佛羅倫斯披蕯餃亦有特色，前者即焗麵包配邪惡醬汁，簡單滋味；後者用Pizza皮包住芝士肉醬，滿足感十足。
傳統手拉意粉x創新配搭 Trattoria Doppio Zero
圖：Yan~*
平時去出街食意粉就食唔少，但夠膽以自家意粉做賣點嘅餐廳就唔多喇。呢間主打手工意粉，用嘅係00級意大利最幼細嘅麵粉，沿用意大利傳統手法製作出唔同款式嘅手拉意粉。加上佢地嘅菜設計亦有用心，例如XO醬紅蝦意粉就加入香港特色醬料XO醬，味道特別鮮香，配搭乾意粉口感更上一層樓。
輕鬆汽車主題餐廳 Fiat Caffé
圖：JannisT
雖然呢間餐廳以汽車做主題，但唔好以為得愛車人士先會去，其實佢亦係唔少為食友聚餐嘅好地方之一。半開放式設計開揚得嚟，卡位私隱度亦夠。黑松露野菌忌廉汁手搓粉菌香濃郁得嚟，煙韌嘅手搓粉亦相當特別。嗌多碟邪惡愛爾蘭藍芝士瘋薯或者無花果乳清乾酪沙律做前菜，加埋甜品又係寫意嘅一餐。
平民+創意西式小店 Vision 8
呢間西餐廳專做街坊生意，定價合理而且菜式亦非常特別。黑松露菌薄餅睇落似芝士餅，但中間有一層黑松露醬，上面再灑一層芝士粉，配埋脆身餅底食落香而不膩。卡邦尼牛油果醬意大利粉就用咗牛油果打成醬，令鹹香嘅卡邦尼意粉變得更Creamy更清新。唔啱嘅話仲有鮮蝦芝士蕃茄醬燴意大利飯同煙肉帶子忌廉意粉。
工廈別緻主題小館 Deer Kitchen
雖然工廈地理位置可能無咁方便，但呢間餐廳勝在以鹿做主題，裝修感覺清新別緻。食物出品亦有水準，黑松露意大利雲吞嘅雲吞皮夠煙韌，而且由餡料到醬汁都有香濃黑松露香味，小小一份大大滿足。主菜嘅意粉同意大利飯都係好選擇，想豪少少仲有比目魚配芝士焗龍蝦，分量唔細味道對板，而且紫薯蓉仲係免費任添。
香港有驚喜嘅意大利餐廳邊止咁少吖，好新偵察兵Scout補充返入圍名單仲有Amour Garden Grill & Bar，Cafe Paradise，Mela Italian & Spanish Cuisine，同Lo Spazio呢四間。揀啱心水就記得去投你嘅神聖一票！
投票網站：https://www.openrice.com/info/awards2017/index.html
文：Cathy
隨時接收最新資訊
讚好OpenRice專頁！