美食當前，相機食先。作為foodie，先影為敬再放上IG直情係反射動作！優秀開飯熱店2018以「美食大晒 盡情Show Quali」主題，無論你係食家定係大廚，有好嘢自然要晒一晒！即刻睇睇各區同各類型必試熱店如何大晒功架！
麻辣當道，香港人口味越食越辣，真係辣到標晒汗！京川滬菜當中最火紅必然係川菜，麻辣火鍋、水煮魚等等地道名菜無人不曉，而同樣香辣嘅湖南菜亦準備上位。但係京式烤鴨、上海小籠包都係長期熱門搜尋菜式，絕對唔能忽視！即刻睇睇優秀開飯熱店2018京川滬菜入圍名單，投下心水一票支持啦！
湖南家鄉菜 湘聚小廚
圖：西環開業兩年多小店，位置唔起眼，但食物正宗，由來自湖南大廚主理。湘菜味道鮮明，辣椒、臘肉及部份食材都係來自當地，招牌菜包括絕色雙魚、乾鍋肥腸、酸菜米豆腐及冰鎮酸辣蕨根粉。舖頭開到凌晨兩點，唔少大學生及內地同胞幫襯食宵夜。
周董fans要去 香湘辣妹
圖：另一間主打湖南菜嘅小店，裝修格局新潮，菜式用周杰倫歌曲命名，忍者窩窩頭係北方人主食之一，狀似饅頭，但質感更紮實，配香辣梅菜乾一齊食，好地道。招牌菜仲有好久不見酸菜魚、說好的幸福呢香辣QQ蝦、東風破剁椒魚頭等。
實力連鎖店 上海弄堂菜肉餛飩
開業多年，現時全港有4間分店，更曾被食家蔡瀾推薦之香港最好餐廳之一。灣仔店裝修精緻舒服，難得價錢大眾化。主打菜肉餛飩皮薄而且餡料足，陳年花雕醉雞酒味香濃入味，點心、麵食及小菜水準穩定，好抵食！
圖：ilovefood1314、mandymanlovefoodie
上癮川味烤魚 十二味不只是烤魚
呢間飲食集團由港漂開設，由一間牛肉粉開始，發展到到麻辣火鍋、烤魚店、乾鍋專門店等。川式烤魚可以揀吳部、清江、江團及桂花魚四款魚，再自選金牌蒜香、招牌香辣、酸菜、麻辣等，魚肉嫩滑又入味，而且一上枱魚皮仍然香脆熱辣，辣味夠香濃，唔少回頭客食上癮。
必吃自製涼粉 湘蜀人家
圖：呢間包攬川菜及湘菜嘅餐廳，由四川大廚主理，用當地運來辣椒及新鮮辣椒炮製，鮮香味濃，而且冇得自選辣度，口味正宗。招牌川北涼粉係自家製作，滑溜索汁，水煮魚紅油足，麻香濃郁，上枱時仍然滾燙。位於商場入面，環境企理舒適。
以上都係今年新打入京川滬菜式嘅入圍餐廳，其他餐廳仲有蜀府川鍋、老川皇、漁牧同麻辣派對，都係川菜為主，各位辣仔辣妹，梗係要瞓身支持！
立即投票：https://www.openrice.com/info/awards2018/index.html
文：Perrins
