【開飯熱店入圍名單巡禮】東區大城小店

話說今屆開飯熱店大賞又嚟喇，開飯仔就委託咗最Like瓹窿瓹罅搵食嘅喵星人，合組「為食貓偵探團」，上山下海、一帶一路偵查全城大大小小講飲講食情報，廿四小時儘量不眠不休咁四出發掘屬於港喵（oops，唔係，係港人）嘅真正味道。

古語有云：喵以食為天。無論咩日子咩天氣咩地區咩心情，都唔能夠阻止呢幾隻為食軍團四出搵好東西食。喺美食隊長領軍之下，佢哋今次就過海嚟到東區，即係銅鑼灣到柴灣一帶搵食~ 喵~ 普羅大眾對港島區嘅印象通常都係高尚啲，好似一過咗個海啲嘢就貴晒咁，不過餓底貓同公主貓都好努力咁發掘到啲隱世小店。

獨賣沾麵　　俺之沾麵專門店

Photos by Kingwun & maki_xd
喺炮台山站附近嘅一條橫街，有間得4張枱嘅餐廳仔，淨係單一賣沾麵，專到一個點。裡面有一台舊式嘅製麵機，就係用嚟整沾麵。呢部機整出嚟嘅麵，粗到有啲似烏冬，麵身微曲，有蛋味，幾滑幾彈牙咁。

雖然淨係得沾麵食，但落單嗰陣都有得揀嘅，可以揀要咩餸、揀要中粗麵定極粗麵，亦都可以根據自己嘅食量揀麵嘅份量。上枱嗰陣，沾麵同湯係分開兩碗上嘅，啲配料就浸埋喺啲湯度，餓底貓立馬就扮專家咁教路嘞：首先將沾麵沾沾啲湯，然後先食。如果想再食到豚肉嘅鮮味多啲，就可以加柚子醋。食晒啲麵之後，就請店員加湯，係加魚湯呀，中和返原本略鹹嘅湯底，咁就可以成碗乾咗佢喇！

肥雞脾配乜乜乜　　祥發茶餐小廚

Photos by kkjetso
呢間喺北角嘅茶餐廳，長期都好多人排隊等位，不過美食隊長話要排，就算排一日，餓底貓同公主貓都係要跟住排㗎啦。

咁多人排隊食乜？之唔係瑞士雞脾囉。呢度最出名㗎！原隻雞脾上碟，大大隻，淋上偏甜嘅瑞士汁，一上枱就忍唔住要拎嚟食喇！由於成碟都係汁嘅關係，隻雞脾由皮到肉、由外到內到返外每一啖都係滲晒汁嘅，好入味。啲雞肉又滑喎，啱晒公主貓！而呢度除咗隻雞脾出名，另一樣都好出名嘅就係抵食嘞！三十零蚊個餐，但係有包呀多士多吐司呀奄列呀窩夫呀麵呀飯呀超過70款選擇畀你揀，任得你鍾意點配搭都得，自由到呢。就算好似公主貓呢啲咁奄尖嘅食家，都一定揀到嘢食！

辣辣辣椒板麵　　古月

Photos by chikpihehe
星馬菜式一向都係美食隊長杯茶（其實咩式都係，好食就得），所以今次喺呢區發現到有間提供星馬菜嘅餐廳，仲要個店主曾經親自去過吉隆坡度學師取經嘅，就更加要去一試啦。捉埋嗰兩隻喵，可以叫多幾款試多幾款嘛。

嚟呢度預咗要食辣，先嚟個輕微嘅李先生咖喱飯，咖喱夠香，雞翼吸收晒咖喱嘅精華，香得嚟仲有少少辣，少少啫放心。之後就升lvl試過極級辣嘅辣椒板麵啦！參考咗星馬嘅製法，再配合香港人嘅口味，配料包括溫泉蛋、魚乾仔、炸蒜粒、肉碎、菜甫等等，當然仲有最重要嘅秘製辣椒醬啦，啲辣椒醬仲可以無限加添。呀，又估唔到公主貓唔止食甜要大甜，原來食辣都係要大辣！將呢堆料攪勻晒嚟食，好有風味，而且唔止一種風味。鹹又有辣又有，好鬼惹味！餓底貓就似乎唔係好支撐得住，隊長就叫咗杯三色奶茶畀佢喇。所謂三色，一層茶、一層花奶，仲有一層係黑椰糖漿，同時間可以飲得晒呢三種味，唔錯唔錯。

齋都有甜品食　　素食.分子

Photos by BoBo_Chow926 & yauoe
食得太多肉有時都會想食下齋，不過公主貓一聽到食齋兩個字就面已黑，不過佢一聽到呢間齋舖都有得食甜品嗰陣，又立馬變返bling bling眼，唉，而家啲貓女真係難服侍。

食甜品之前點都要食少少正餐㗎？其中碟印尼沙嗲串燒幾有驚喜，個沙嗲醬甜甜地，啲偽串燒係大豆蛋白（好似係），又偽得佢幾真、幾似，餓底貓忍唔住一個人食晒一碟咁滯。好啦，輪到公主貓期待已久嘅甜品，即叫即整嘅朱古力曲奇窩夫，超鬆脆，仲有香濃嘅朱古力醬搽喺面，公主貓表示正正子。而蘋果金寶亦係另一個收服咗公主貓嘅甜品。每粒蘋果粒粒都醮晒肉桂粉㗎，好香甜。

自家手搓湯圓　　福元湯圓

Photos by bageladdiction & happy.fatty.foodie
美食隊長知道公主貓鍾情甜品，今次就特登搵咗呢間喺北角同炮台山中間嘅一間中式糖水店。話明中式糖水，係冇咩平時畀相機食先嘅花巧嘢，不過勝在每樣甜品都好有傳統嘅味道！

最出名就梗係湯圓啦，餐廳名都話咗你知。呢度嘅湯圓係每日人手新鮮搓製㗎，大大粒，皮薄餡多。芝麻味嘅啲芝麻磨到好幼滑，味又夠濃，開心係一咬開就流沙咁流晒出嚟！公主貓見到即刻密密食唔出聲喇。另外，花生餡嘅亦都唔輸蝕，入面有粗粒花生㗎，好有咬口。襯底嘅糖水想要返一般嘅薑糖水又得，或者可以試下米味重少少嘅酒釀桂花湯。嗯，公主貓連啲湯都飲到乾乾淨淨，就知道隊長冇介紹錯啦。

根據隊長嘅介紹，東區另外仲有幾間餐廳排住隊等嗰幾隻為食貓去試㗎，分別係：低調高手大街小食、太平飯店、羅勒印度餐廳、Misocool同華記士多呀！你哋唔使等為食貓㗎，揀啱就去投票啦！

投票網站：http://tiny.cc/op_2016

文：Kar

隨時接收最新資訊
讚好OpenRice專頁！