常問道人生有幾多個十年，OpenRice啱啱就有兩個。踏入開飯二十年，優秀開飯熱店2019以「歷久嚐新」做主題，擁抱經典、傳統老味道之餘，亦緊貼潮流，飽嚐新世代嘅美食。即刻睇下邊啲必試熱店入咗圍啦。
講到港人出街食飯嘅最愛，泰國、越南同台灣菜都一定唔少得架啦。香港嘅東南亞菜開到成行成市，競爭真係幾激烈下，優秀開飯熱店大賞2019東南亞菜嘅入圍名單，有大熱台式茶飲，亦有名人開嘅越南粉麵，都有一年365日都要食嘅火鍋，不如睇睇邊間啱你心水？
人龍台式茶飲 老虎堂黑糖專売
2018全年都被台式茶飲佔據，講到氣勢強勁，點都唔少得呢間台灣過江龍，今年首度入圍優秀開飯熱店大賞！一提黑糖珍珠鮮奶，第一時間真係會唸起佢，當初登陸香港時排隊風潮可以話持續咗幾個月啊。去到當然要飲招牌波霸厚鮮奶，外型呈現黑糖虎紋，飲之前最重要係咩？當然係打返個卡先啦！
古早味台式小食 阿元來了
由台灣人主理嘅台灣小食店，本身只係一間喺西環嘅小店，但而家已經開埋去觀塘。必試有佢地嘅台式魯肉飯、鹽酥雞同蚵仔煎等。另外早前仲新增埋地瓜球、台北人氣芋泥蛋餅同埋嘉義著名嘅四神湯等菜色，真係可以一解思鄉之情。
特色手工火鍋 101手工涮涮鍋
火鍋係港人嘅Comfort food，呢間手工涮涮鍋價錢雖然貴咗少少，但食完你就會覺得抵返架啦。首先喺手工涮涮鍋套餐嘅基礎上可以無限追加，無論湯底定食材都係誠意之作，如清甜嘅冬瓜卜卜蜆海鮮鍋、手工響鈴同炸魚皮、墨魚汁鳥結糖同黑松露蟹肉餃等。連台灣特飲、紅酒白酒cocktail都任飲！
濃郁和牛船麵 Samsen 泰麵
灣仔人氣熱店，招牌菜包括和牛船麵同虎蝦炒金邊粉。泰式和牛濃湯河湯底用豬皮、豬骨同豬血熬出嚟，鮮甜濃郁；和牛肉味重之餘夠哂嫩滑，幼身河粉都好掛湯。炒金邊粉有四隻大蝦，炒得夠香有鑊氣。
圖: soya1314
馬來風味美食 蘇媽.蘇媽馬來西亞茶餐室
香港女生同馬來西亞拍檔開設，供應不少馬來西亞特色美食。國民美食Nasi Lemak椰漿飯，飯跟隨馬來西亞做法加入班蘭葉，有陣陣班蘭葉同香料幽香。椰香咖央多士烘至香脆，配埋半熟溫泉蛋享用，夠哂馬來風味。
圖: hkamandajp、tptp89
名人開店 蔡瀾越南粉
美食家蔡瀾開設嘅越南粉麵店，選址中環，湯底製法秘方沿自澳洲墨爾本老字號名店勇記，湯頭用50公斤牛骨、牛肉及香料熬成，非常清澈，牛味濃香帶少少甜。小食有多款選擇，如越式炸春卷、香茅烤豬頸肉、黃金蝦扒同香芒凌波魚米紙卷等。
東南亞菜十強仲包括埋旺角人氣泰菜小店泰廚泰國菜館、地道泰國菜餐廳Orange Elephant Thai Restaurant、超蓮BB引入到港嘅玖五牛肉麵同多倫多知名越式Pho店Pho Metro，邊間係你嘅口袋名單？即刻去優秀開飯熱店大賞網站投你神聖嘅一票：https://www.openrice.com/info/awards2019/index.html
文: Yanica
