美食當前，相機食先。作為foodie，先影為敬再放上IG直情係反射動作！優秀開飯熱店2018以「美食大晒 盡情Show Quali」主題，無論你係食家定係大廚，有好嘢自然要晒一晒！即刻睇睇各區同各類型必試熱店如何大晒功架！
無論係熱辣辣嘅 #雞粥 、材料豐富嘅 #車仔麵 、定外遊返港後最掛住嘅 #雲吞麵 或者 #魚蛋粉 ， #粥粉麵 🍜 總係畀大家一種窩心溫暖嘅感覺😌 。今年入圍 #優秀開飯熱店大賞 #十強 嘅粥粉麵店既有 #新派 代表😎，亦有 #傳統 #老字號 迎戰😄。你嘅神聖一票，又會投畀邊三間？
自設工場魚蛋粉 三才魚蛋粉麵
銅鑼灣呢間粉麵檔好似同一般嘅無乜分別，但其實入到去細心留意餐牌，就會發現佢地特別標榜自設工場，人手自家製造魚蛋、炸魚片頭、餃子、牛腩等。特別推介手打魚蛋。口感爽滑彈牙最緊要係唔會食到成口粉！而每碗麵都會有蔥、炸蒜同冬菜增加風味，想再食重口味啲，記得要加自家製辣椒油。
復古車仔麵 旺囍車仔麵
圖：Neyuis
旺角呢間車仔麵店裝修以木頭車做主題，加上鐵皮餐牌幾有懷舊Feel。選擇相當多元化，有九款麵底加超過四十款配菜，當中比較特別嘅有咖喱陳皮魚蛋、秘製牛孖筋、辣汁爽脆魷魚同秘製雞中翼。自問有選擇恐懼症嘅，亦可以直接嗌返碗十全十美富貴麵，一次過試勻店家十大推介配料。分量唔少而且價錢公道。
魚湯餃子上海麵 圓方餃子粥麵
雖然店名叫餃子粥麵，但其實仲有腸粉、蒸飯同油器，但最多人嚟食佢地嘅魚湯上海雲吞或者西洋菜餃，前者係白菜豬肉餡後者係西洋菜豬肉餡，一樣係人手包，大大粒而且皮滑餡靚。奶白色嘅魚湯無味精又唔過鹹，有種食緊住家飯嘅感覺。可以點淨湯餃、亦可以配上海麵或米線。唔夠喉可以外賣返屋企自己煮！
米芝蓮推介車仔麵 文記車仔麵
喺深水埗福榮街呢條食街上成為人龍熱店，仲被列入2018年米芝蓮街頭小食推介，可想而知呢間車仔麵檔絕非普通嗱喳麵。14款麵底同超過50款配菜當中，必食嘅係招牌瑞士雞中翼，入味而唔過腍；另一推介係柱候牛腩，惹味軟腍而不失咬勁。玻璃辣魷魚、滷水豬大腸同自製韭菜餃都可以一試，配埋腩汁更滋味。
老字號雞粥新分店 新記雞粥
圖：KaKa522
元朗老字號去到港島筲箕灣開分店，招牌煲仔雞粥同市面較少見嘅黃鱔粥等都係熱辣辣用砂煲上枱，每日生滾粥底香滑軟綿，食材亦夠鮮甜。另外唔少食家都推介佢地嘅蜆芥鯪魚球同紅燒脆皮乳鴿，兩款都係即叫即炸，前者粒粒足料漲卜卜富魚味，後者皮脆肉Juicy而且唔油膩。新店仲增加咗小菜同炒粉麵飯選擇，食多幾次都唔會悶。
摩登潮州牛丸粉 潮丸
尖沙咀呢間餐廳裝修簡約似Cafe，其實係食潮式牛丸粉麵。特別在喺潮汕自設工場做棍打牛丸，彈牙爽口帶肉汁。招牌係自家牛三鮮，可以選擇湯麵或者撈麵，而牛三鮮即係牛爽腩、牛筋同牛肚，牛爽腩牛味濃郁但偶然會出現太瘦難咬嘅情況，牛筋同牛肚就非常入味軟腍。而豬三鮮（豬肉丸、扎肉、腩肉）同魚三鮮（魚蛋、魚片頭、魚皮餃）都有水準。
除咗以上6間今年新入圍嘅店家之外，今年仲有出名食豬潤牛肉麵嘅維記咖啡粉麵、有足料雲吞蝦籽撈麵食嘅劉森記麵家、濃味滷水汁車仔麵檔榮記粉麵同以玻璃腸粉馳名嘅陳漢記呢4間粥粉麵店，揀啱心水就立刻去投票支持啦！
立即投票：https://www.openrice.com/info/awards2018/index.html
文：Cathy