【開飯熱店入圍名單巡禮】觀塘有寶！一區食勻多國菜式

今年開飯仔特別搵咗自命對追求味覺有強烈使命感嘅「特種開飯團」，進行十面埋伏、吖唔係、係全面巡邏全港九新界，一日食足十餐幫大家地氈式搜索，從唔同地區、唔同菜式當中搵出真正本土滋味！

好新偵察兵Scout今日又出動，去到觀塘區搵食。以前對觀塘嘅感覺係多工廠，好少話會嚟呢區搵嘢食。之但係近呢幾年多咗好多工廈餐廳，就完全唔同講法喇。中日韓台意……咩式嘅餐廳都開始喺觀塘出現喇！Scout對呢啲餐廳都好有興趣，其中呢10間仲入埋圍添，睇完介紹記得投票，畀Scout知道你哋嘅心水呀！

和牛壽喜燒掌壽司

位於工廈入面嘅日本餐廳，千其唔好畀佢個位置呃咗，水準係唔錯。除咗一般嘅刺身、壽司夠新鮮之外，嚟到建議要試玉子燒同和牛壽喜燒。玉子燒都有唔同口味嘅，芝士松露鰻魚或者流心芝士就啱晒芝士控喇，拉絲㗎！而和牛壽喜燒就係用澳洲M4和牛，脂肪分佈平均而牛味香濃。

創新點心吉吉點

主打點心嘅呢間餐廳，除咗傳統食到嘅燒賣蝦餃之外，都有好多新式嘅點心。例如大家都係馬蹄糕，但呢度嘅馬蹄糕會變咗黑色，係加咗芝麻味呀，係幾香嘅。而鹹水角就會加咗芝士餡變咗芝心鹹水角，另外蜜瓜炸奶幾乎係嚟到必食嘅，外脆內暖，香香甜甜。

抹茶意粉慕茶

圖：Keilwk、waitnigxT

聽個名就知呢度主打茶品，唔止飲品喎，連甜品甚至主食都加入茶嘅元素。抹茶控見到應該會幾想試嘅抹茶意大利粉，賣相真係全碟綠色，食落仲有微甘嘅茶味。雪糕嘅口味都係茶先勁，有伯爵茶啦、普沫茶啦、玄米白茶啦、功夫茶啦等等都有！

三式芝士醬燒豬肋骨魔膳工房

圖：Wishiwolly Bo、VCY

觀塘區都幾受歡迎嘅一間工廈餐廳，有自助沙律吧，而且menu仲會定期更新，係有新鮮感嘅。但無論點變都好，三色芝士醬燒豬肋骨配薯角一定係食客們嘅飛佛，因為三種芝士醬加埋一齊真係好香好濃味呀。另外波士頓龍蝦飯同樣都係用三色芝士焗出嚟㗎，唔怕肥嘅朋友真係可以成餐全部都係芝士！

番茄蛋菠蘿油華嫂冰室

喺元朗賣番茄蛋菠蘿油賣到出晒名嘅華嫂，嚟到觀塘一樣保持水準。呢個番茄蛋菠蘿油未食過嘅初初可能會覺得奇怪，但食過就知佢嘅甜酸鹹度都balance做得好好，隻蛋仲要係太陽蛋，咬開有蛋汁流出嚟！蕃茄湯底嘅米粉麵食同樣值得推介，用鮮茄煮，食到茄蓉添呀！

鵝肝醬燉蛋 BriKetenia

呢間係法國米芝連級數嘅西餐廳嚟呀。佢哋嘅菜式都幾有驚喜，特別如果你鍾意龍蝦嘅就一定要試法國干吧龍蝦湯，濃到一個點。仲有龍蝦燉蛋添呀。不過講起燉蛋，仲有另一款都係好特別嘅，鵝肝醬燉蛋，味道有幾個層次，但又唔會互搶，值得試。

觀塘區入圍嘅餐廳又點止得呢幾間吖？呢外仲有Mela Italian & Spanish Cuisine、曼克頓餐廳、小時光同Deer Kitchen呀，揀到心水未先？撳入下面網站投票啦~

文：Kar

隨時接收最新資訊
讚好OpenRice專頁！