各大品牌同便利店成日都出新款零食，就算作為定期會去巡舖、入貨嘅專業零食控，都未必試得到咁多款，有時又會驚中伏而卻步。到底邊款抵買抵食，邊款伏味濃，2022年就等開飯仔繼續行勻便利店、超巿、零食店、啤酒舖等，時不時幫大家留意住最新、最吸引嘅新品，一一試真啲！
12月23日更新
H.K. Lovecraft - 季節限定Lager Wine : The Enduring
銷售點：各大精釀啤酒店、酒廠網站
主力釀造lager嘅本地精釀啤酒廠最近出咗隻新嘅季節限定啤酒，Lager Wine。特別加入埋法國煙燻橡木同蘇格蘭威士忌釀造，令到明明飲緊啤酒都有啲緊whisky嘅感覺，好好feel。酒體呈深銅紅色，聞落有好香嘅布冧同提子乾味，仲有木質嘅香味。入口層次複雜多變，先有提子乾香，跟住會試到黑朱古力嘅甘，收尾係甜嘅，值得一試。
八道 龍蝦味 / 傳統韓式泡菜大碗湯麵
銷售點：7-11
2款口味分別係龍蝦同傳統韓式泡菜，不過前者嘅龍蝦味唔算好濃，反而有少少辣；至於後者嘅辣就更加辣得光明正大，麵質較一般杯麵爽口。
嘉頓 車打芝士味忌廉檳
銷售點：各大便利店及超市、嘉頓門市
忌廉檳係早餐其中一個選擇，不過食咗咁多年可能都會有啲悶。好在佢哋耐唔耐都會出下新口味，最近就出咗車打芝士味忌廉，輕盈啲唔會太膩。而原有嘅花生味、朱古力味、檸檬味等則換上咗新包裝。
12月15日更新
Ile de France天然芝士
銷售點：各大超巿及HKTVMALL網店
聖誕Party食咩好？如果想自己整Party Food，可以考慮下法國品牌Ile de France嘅各款天然芝士，有Brie、 Camembert、Brie Au Bleu三款口味，亦有芝士片同Bite Size嘅Mini Brie。任意配搭水果或者Nuts當前菜拼盤得，整迷你小食得，成個芝士用焗爐焗至軟身整果香芝士餅亦得啊～
12月6日更新
Haagen-Dazs x姜濤特別版雪糕禮盒
銷售點：各大便利店及超巿
Haagen-Dazs™同姜濤再度合作，推出姜濤特別版雪糕禮盒，入面有4款雪糕，包括西瓜士多啤梨脆皮雪糕批 、紅桑子脆皮雪糕批 、車厘子黑莓雪糕 同埋新出嘅節日限定口味：紅絲絨芝士蛋糕雪糕！不過我諗姜糖們關心嘅都唔係啲雪糕咩味，最緊要唔好漏咗，盒內有張姜濤立體心意卡呀打開仲有阿姜畀心心~ 今個冬天，就算食住雪糕都特別暖~~
五木 - 腐皮/海帶烏冬碗麵
銷售點：7-11
熊本熊粉絲實留意到呢兩款新口味烏冬，唔止包裝靚，味道都唔錯，唔會好似其他嗰啲即食麵咁濃味咁鹹。腐皮烏冬係鰹魚海帶湯底，微甜；海帶烏冬仲加埋有白芝麻添，香氣倍增。鳥冬口感順滑，不過份量就唔算好多，如果作為lunch嘅話要自行加餸咯。
日清冷凍食品 – 拉麵
銷售點：指定百佳、TASTE、fusion
呢兩款冷凍拉麵幾有誠意，唔係淨係得拉麵同湯包，仲包埋日式叉燒同其他配料，簡單加熱完出嚟砌一砌靚仔佢，都有啲似出街食到嘅拉麵架。生產過程使用冰冠製法，使拉麵加熱後依然保持彈牙口感。濃湯魚介豚骨味叉燒拉麵湯底清甜，而海老辣味噌味叉燒拉麵辣香之餘，亦有陣陣鮮香。
日清冷凍食品 – 餃子
銷售點：指定百佳、TASTE、fusion
兩款餃子分別係傳統豚肉煎餃子同雞軟骨棒餃子，前者輕輕煎一煎，已經可以做到外皮微焦效果，內餡有豚肉同蔬菜，都幾juicy；後者則有啖啖爽脆口感，質素唔錯。
日清冷凍食品 – 點心
銷售點：指定百佳、TASTE、fusion
另外仲有點心類別，叉燒腸、叉燒包同埋鮑汁珍珠雞，簡單加熱就可食用。值得一提嘅係，三款點心均使用植物肉製作，味道不錯。
友 – 柚子薑拉格啤酒
銷售點：7-11及超巿
呢排睇世界盃有冇飲多咗酒？便利店多咗唔少啤酒，手工啤酒都有呢。呢個品牌最近仲出咗新口味，鮮黃色罐裝好sharp醒。新味係柚子薑啤，聞到陣陣檸檬同柚子嘅微酸，不過飲嗰陣味道就唔算太突出，但求清爽感都可以嘅。
11月30日更新
樂事 英式香烤春雞味 / 勁爽拉格啤酒味薯片
銷售點：各大便利店及超巿
呢排睇波，晚晚都啤酒薯片？有冇諗過可以二合一？Lays最近出咗新口味，係lager啤酒味薯片！還原度極高，開飯仔搵同事玩Blind test都真係答得出，有陣陣香甜嘅啤酒麥芽味，仲隱約有啲氣泡感同埋微酸，食完條脷涼涼地。另外有香烤春雞都係新味。
嘉頓 朱古力味牛油卷
銷售點：各大便利店及超巿
牛油卷出新包裝，仲出埋朱古力新味。一大包內有12包獨立小包，方便口痕時拆嚟食又唔使怕會漏氣變腍。牛油卷口感鬆化硬脆，選用法國可可粉製造，唔算太甜。
Häagen-Dazs迪士尼人物造型雪糕杯
銷售點：7-11獨家發售
迪士尼粉絲要入手咯。食雪糕本身已經係開心事，仲要有米奇、米妮同唐老鴨雪糕杯裝住食就仲開心。三款被選中跟配嘅雪糕口味分別係朱古力（米奇）、士多啤梨（米妮）同芒果紅桑子（唐老鴨）。
日清冷凍食品 – 意粉
銷售點：指定百佳、TASTE、fusion
呢個品牌最近出咗多款冷凍食品，方便大家短時間內就可以有熱嘢食。其中有兩款係意粉，都係採用自家製闊條麵製嘅，一款係紅酒燴牛肉風味闊條麵，另一款係忌廉番茄蝦肉闊條麵，兩者都係叮一叮就食得，掛汁力幾強，但味道亦都相對地較為濃烈咗少少。
11月22日更新
HEY! CHIPS - 蔬果脆片
銷售點：一田、先施百貨、甘薯葉、K Mart(誠品)
脆卜卜嘅零食通常都唔健康？又唔一定嘅。呢個品牌嘅蔬果脆片，以蔬菜、水果為原材料，由農場收割後直接運送到廠房，以美國太空總署（NASA）專有嘅低溫脫水技術處理，確保新鮮得嚟仲可以保持鬆脆口感。多款選擇包括有香蕉、菠蘿、粟米、broccoli、芒果等口味，大部分都食得返食材原味呢。例如香蕉嗰隻蕉味幾重，仲有啲甜味；broccoli則鹹鹹地，有少少似紫菜。
湖池屋 - 譚仔泡椒酸菜魚湯味 / 三哥鴨血水煮湯味薯片
銷售點：7-11
譚仔同三哥最近唔止一齊推出手機程式宣傳，仲同時推出湯底口味嘅薯片。譚仔出咗隻泡椒酸菜魚湯味，微辣啦，酸菜唔係好食到但泡椒味好突出；至於三哥鴨血水煮湯味，則有陣陣麻香濃，粉絲們要試下。
卡樂B - 韓風傳統泡菜味蝦條
銷售點：各大便利店及超巿
泡菜味蝦條，每條都上咗少少橙色嘅，但泡菜味唔算好濃郁。鮮濃蝦味中隱約滲有微微酸味，打孖一齊食先會感受到少少辣味。
好時 - 熱朱古力、熱棉花糖朱古力即沖杯
銷售點：7-11
每年冬天 （雖然今年仲未凍）都會飲返多幾杯熱朱古力，暖笠笠又甜入心。便利店有即沖杯賣，夠晒方便。就咁純朱古力又有，搭埋棉花糖嘅朱古力都有。用熱水沖完攪勻即刻飲得，味道香甜幼滑。
樂家杏仁糖特濃黑朱古力、樂家假期限定3粒裝
銷售點：各大便利店及超巿
呢隻經典朱古力，新出咗可可含量高達73%嘅特濃黑朱古力。外層嘅杏仁脆粒，混入特濃黑朱古力粉，中間依然係香脆杏仁糖心。口感硬脆，比經典嘅甜味多咗一份微澀。而混合口味裝則包括經典樂家杏仁糖同海鹽焦糖杏仁糖。
11月17日更新
無雙 麻辣花生
銷售點：各大便利店及超巿
各位機迷同麻辣控，又有挑機機會啦。就嚟世界盃，都係時候準備定花生啤酒睇波喇。新出嘅麻辣花生，辣到剛剛好，少少刺激再加埋麻香餘韻，送酒啱晒。
11月11日更新
Cororo x LINE FRIENDS 可樂味果汁軟糖 / Puccho x LINE FRIENDS青提味果汁軟糖
銷售點：7-11
勁得意呀個包裝，有幾款唔同嘅設計，分別以Brown、Cony 同Sally做主角。有可樂味同青提味。兩款軟糖都係軟得又有層煙韌口感，雙重口感。
Pocky 冬季限定版
銷售點：各大便利店及超巿
今日係11.11，Pocky & PERTZ Day，冬季限定版又返嚟啦，分別係朱古力、焦糖牛油同粒粒榛子朱古力餅乾條。3款口感各有唔同，朱古力版夠濃厚、榛子嗰隻又crunchy，焦糖牛油仲有陣陣牛油香，不過就甜咗少少啦。另外炭燒百力滋同沙律味百力滋其實都食開嘅，使用「微粒子小麥粉」製作，口感更香脆。
GODIVA朱古力脆球 / GODIVA朱古力
銷售點：各大便利店及超巿
又有新品呀佢哋，藍色嗰款係朱古力脆球，內有3種口味，包括雙重朱古力，榛子牛奶朱古力同椰子牛奶朱古力脆球，口感甜脆；紅色盒嗰款入面同樣有3款朱古力：朱古力醬黑朱古力、榛子牛奶朱古力同覆盆子夾心黑朱古力，仲要分別係心型、貝殼型同星型，但就全部都好甜。
明治雪吻橙皮白蘭地 / 士多啤梨橙皮黑加侖子朱古力
銷售點：各大便利店及超巿
兩款新口味分別係橙皮白蘭地同士多啤梨橙皮黑加侖子，兩款都有少少酒香，前者有粒粒糖漬橙皮夾喺中間，甜甜地又酸酸地；後者嘅葡萄乾亦浸過rum酒，陣陣甘香。
瑞士蓮純味可可60% 軟心朱古力
銷售點：各大便利店及超巿
60%嘅黑朱古力，苦度甜度都剛好。而且呢粒係黑朱古力外殼，咬開係即融嘅軟心黑朱古力，雙重口感。
11月3日更新
Double Chefs Market 日式鯛魚湯 日式雞白湯
銷售點：官網
又到打邊爐同露營嘅好季節，有品牌推出2款健康又方便嘅即煮湯包，分別係日式鯛魚湯同日式雞白湯。例如雞白湯就以大量雞肉、雞殻、雞腳同新鮮蔬菜等，大火熬煮超過3個鐘，經過又打碎又多重過濾等功夫先熬製到出嚟。大家只需簡單加熱就食得，煮完出嚟湯底醇厚，啖啖清甜，飲得出係足料之作。用嚟煮返個拉麵、烏冬，或者整返個花膠雞鍋都仲得。
卡樂B x KFC 狂惹香燒雞味薯片
銷售點：卡樂B（11月17日起）、各大便利店及超巿（11月下旬）
KFC出薯片會係咩味？最近聯乘卡樂B推出「狂惹香燒雞味薯片」，薯片係V-cut形，一開包裝係幾香嘅，食落會食到少少蜜糖嘅甜、少少烤醬嘅鹹，同埋少少雞肉味，間中仲食到少少辣辣地。總括嚟講係幾好食嘅，唔知遲下會唔會出葡撻味薯片呢？
皇玥 精選8味蝴蝶酥禮盒
銷售點：各間分店
應該好多朋友仔都試過佢哋嘅蝴蝶酥，但每次都係心大心細，隻隻味都想試，都揀唔到買邊隻味好。而家唔使煩啦~ Why not all？最新推出咗一盒齊8款嘅蝴蝶酥禮盒，伯爵茶、榛子、杏仁、麻辣等味都可以一次過食到。
SUN365雪葩雪條
銷售點：7-11
你飛得時人哋又飛，有幾條雪葩雪條由北歐飛到嚟香港。4款都係以新鮮水果製成嘅口味，分別有芒果、香蕉雜莓、菠蘿椰子同熱情果柑橘味。每支雪條均含90%新鮮水果，經冷壓製成，不且仲無加糖同人造添加劑，熱量都係得50-61卡路里，食完罪惡感都冇咁大。芒果嗰隻係幾多汁清甜嘅，但香蕉雜莓嗰款就略嫌偏酸，開飯仔食到瞇晒眼呢~ 但就證明真係真材實料咯。
Haagen Dazs 派對冰袋套裝 · 迪士尼系列
銷售點：各大便利店及超巿
迪士尼fans又有地方可以消費啦~~ 呢個派對冰袋套裝系列共有3款，分別係米奇、米妮同唐老鴨，個冰袋勁靚呢。一袋入面有12件迷你雪糕杯/雪糕三文治，買一袋拎上去朋友仔屋企開party就啱晒~
可口可樂 x 《BLEACH》死神千年血戰篇
銷售點：各大便利店及超市
有冇追開《BLEACH》嘅日本動漫迷？全新電視動畫系列《BLEACH 死神千年血戰篇》終於再登場，可口可樂同佢哋做聯乘合作，乘勢推出全新限定口味「可口可樂Soul Blast 」。罐上印有主角黑崎一護，值得收藏。無糖無卡路里架呢隻，可以放心。
10月25日更新
Häagen-Dazs 法式焦糖燉蛋脆皮雪糕三明治
銷售點：各大便利店及超巿
未買機票飛日本嘅朋友仔，喺香港食住日本最新直送嘅脆皮雪糕三明治先啦~ 3款都係甜甜der，包括夏威夷果仁奶油糖、法式焦糖燉蛋同焦糖脆皮雪糕三明治。其中法式焦糖燉蛋味最為出色，吉士雪糕以鮮奶同雞蛋混合而成，甜度恰到好處，最驚喜係有粒粒嘅焦糖粒，神還原焦糖燉蛋面頭嗰層硬脆感。
少爺啤酒 - 雞蛋仔/格仔餅味啤酒
銷售點：Circle K
唔止雪糕薯片有新口味，啤酒都有。本地精釀啤酒品牌少爺啤同媽咪雞蛋仔合作，推出咗雞蛋仔味啤酒同格仔餅味啤酒。兩款都係Amber Ale嚟，本身嘅麥芽、拖肥都已經好香，雞蛋仔嗰款加咗雲呢嗱，格仔餅就再加埋花生同堅果。但千其唔好誤會，飲落唔係雞蛋仔味或格仔餅味，但就係模仿緊佢哋嘅濃郁同豐富嘅口感，整體感覺偏甜。
少爺啤酒 - 【酒花街2號】
銷售點：Circle K
上個月同大家介紹過1號仔，今個月輪到2號仔。連續4個月嘅單一酒花IPA系列，今個月選用新鮮Citra酒花，無論聞定飲，都有好香嘅熱帶水果風味，檸檬、柑橘等，非常清爽。
御品皇「中式點心系列」
銷售點：惠康、Market Place、Market Place by Jasons、3hreesity及Oliver’s The Delicatessen
喺屋企或office都可以食到酒樓點心？有品牌推出超過20種點心，全部簡單翻熱就食得，夠晒方便。選擇包括有叉燒包、奶皇包、小籠包等，更有而家好少見到嘅糯米包呢。糯米煙韌軟糯；小籠包仲有爆汁效果。
卡樂B - 鬼之麻辣味波浪薯片
銷售點：各大便利店及超巿
呢個個名冇呃你，真係鬼之麻辣，用咗多種香辛料調配，麻度同辣勁都十足，仲要係吞完陣辣味都仲喺個口度唔散嗰下先刺激。係一隻幾好食但又唔可以一次過連續食太多塊嘅薯片。
卡樂B - 和牛香蒜味／海老香蒜味薯片
銷售點：各大便利店及超巿
V-cut波浪紋薯片食落口感特別香脆。兩款期間限定口味均以鐵板菜式為靈感，海老香蒜味嘅蝦味，係似平時蝦餅零食嗰隻。至於和牛香蒜味，蒜味相對較突出，夜晚睇波送酒啱晒。
萬代 - 怪獸公司／勞蘇4D軟糖
銷售點：7-11
出咗咁多款卡通糖之後，終於輪到怪獸公司啦！毛毛、大眼仔同勞蘇分別係葡萄、梳打同士多啤梨味，加入咗果汁製作，帶有果甜，造型仲好cute添~ fans真係會拎住唔捨得食啊。
三洋札幌一番炒麵 - 大田生蠔油濃厚炒麵/鹽味牛肋日式
銷售點：7-11
日本直送嘅2款撈麵，大田生蠔油濃厚炒麵配濃郁大阪燒醬汁，而鹽味牛肋日式有幾片仔牛肉，加埋瀨戶檸檬汁，食落微酸。不過兩款口味都偏鹹，建議唔係食開重口味嘅朋友仔，可以唔使落晒成包調味料。
北川半兵衞商店 菊花烏龍
銷售點：菊花烏龍（7-11獨家發售）、白桃烏龍（7-11、惠康等超巿及零食店）
今次唔止有新口味，仲有新包裝，聯乘法國時尚品牌PAUL & JOE推出嘅「淡雅之秋」主題，好鬼靚。清新嘅伝說。菊花烏龍包裝融入經典嘅菊花圖案，較甜嘅伝說。白桃烏龍則係貓咪元素。而家凡買任何伝說茶飲系列4支，憑單一收據正本喺網站登記，即可換購北川半兵衞商店聯乘PAUL & JOE BEAUTY推出嘅餐具套裝1套 （8吋骨瓷碟及餐叉）。
瑞士蓮 - 焦糖海鹽軟心朱古力
銷售點：7-11
哈囉喂就到，周圍都有好多朱古力，7仔亦有新品到著。焦糖海鹽軟心朱古力咬開即刻流出軟滑嘅朱古力漿，入口先係甜到爆燈嘅焦糖同朱古力味，然後慢慢會感受到鹹鹹地嘅海鹽味，自問係甜魔先好食。
10月10日更新
宅卡B薯條 - 熱浪香辣味
銷售點：各大便利店及超巿
熱浪咁多年嚟都係一眾薯片控嘅至愛，最近宅卡B同佢聯乘，出咗熱浪薯條呀！薯條厚切脆身，陣陣香辣，將熱浪推咗去另一個層次。一包企身袋內有5小包，不過一包仔太細，食兩食就食晒，完全唔夠喉呀。
Dreyer’s 哥倫比亞風味咖啡、靜岡焙茶脆皮雪糕批
銷售點：各大便利店及超巿
哥倫比亞風味咖啡脆皮雪糕批
靜岡焙茶脆皮雪糕批
2款新口味嘅脆皮雪糕批，分別係哥倫比亞風味咖啡，同靜岡焙茶。前者嘅朱古力脆皮外層仲有粒粒杏仁果碎，增加口感，內裡嘅咖啡雪糕加入咗哥倫比亞咖啡醬，有淡淡啡香，正常發揮，冇太大驚喜；至於後者，如果齋食焙茶雪糕其實係幾香嘅，有陣陣烘焙香味同茶香，不過連埋外層嘅朱古力脆皮一齊食，就立時被搶晒風頭了。
10月7日更新
A-1 Bakery X GODIVA 雙重朱古力蛋糕
銷售點：A-1 Bakery
嚟自大阪嘅麵包店A-1 Bakery最近同比利時朱古力名店GODIVA合作，用GODIVA嘅72%生朱古力製作期間限定嘅朱古力蛋卷！外面係鬆軟嘅朱古力海綿蛋糕，中間有香醇濃厚嘅生朱古力忌廉，頂層灑上可可碎，層次豐富。唯一可惜嘅係因為唔係即做即食，榛子脆米花口感略嫌太軟。
9月30日更新
姫香香印提子
銷售點：各大超巿
食零食之餘，都要注意營養，多食生果呀！每年8-10月都係韓國姫香香印提子嘅當造時期，須知道要得到「姫香」等級一啲都唔容易，由重量、採裝方法、糖度、著色度甚至日照率都要達標先得，顯得特別矜貴。姫香香印提子大大粒，比平時見到嘅再飽滿啲，外皮爽脆，一咬就爆汁，非常清甜。
老虎堂 芝士黑糖流心雪條
銷售點：7-11、Circle K
老虎堂再出新口味雪條，今次呢條芝士黑糖流心雪條，外層一如以往，係經典嘅虎紋同黑糖厚奶雪糕，冇想像中咁甜。而重點係中間嘅橙色芝士餡，想要有流心效果嘅，最好冰箱拎出嚟後攤一陣先。隻芝士味好似平時食零食，芝士波波嗰隻味，陣陣鹹香。
Binggrae藍莓乳酪雪糕
銷售點：百佳、惠康
嚟自韓國嘅呢個牌子，相信一眾韓粉都唔會陌生。乳酪雪糕本身已有陣陣乳酸香，加埋藍莓醬就更加酸酸甜甜，清新到連帶罪惡感都好似減低咗咁。特大容量710毫升，最啱一家人一齊share。
奢華版Pocky
銷售點：各大便利店及超巿
2款新味分別係牛奶朱古力味同杏仁奶朱古力味，比起平時食開嘅長條形百力滋，呢款肥肥矮矮好得意，餅乾條用0.9%發酵牛油，脆口鬆化。杏仁奶嗰隻特別採用2.4%杏仁，喺朱古力嘅甜香中，暗暗地滲出淡淡嘅杏仁香。
固力果 煙燻味餅乾條
銷售點：各大便利店及超巿
新嘅煙燻味百力滋，細細盒又細細條，仲要勁幼身，口感屬硬脆族。煙燻味好濃郁，打開包裝放埋個鼻度聞，即情好似要湧出嚟咁。2款口味分別係煙燻培根同煙燻芝士味。
固力果 限定版福袋
銷售點：AEON、一田超市
粉絲記住要留意，AEON呢個限定版神秘福袋只有限量10000份，$35就有5件固力果單品，百力滋、餅乾等咩都有。至於一田嗰款，就貴少少，$52.9，有4款人氣單品。
品客薯片 酥脆黃金炸雞/勁濃芝士薯風味
銷售點：各大便利店及超巿
薯片怪又有新味追~ 細細罐嘅日式柚子洋蔥味層次豐富，有啲酸有啲甜，又有啲辣，係爽嘅。至於炸雞味，其實感覺就唔太似，腦補少少都可以想像到炸雞皮嘅，調味粉料過重，感覺偏鹹；至於勁濃芝士則冇改錯名，芝士控要試。
童星闊條麵 日式燒肉醬味
銷售點：各大便利店及超巿
燒肉屋系列，就梗係要將燒肉時嘅醬汁呈現出嚟啦。2款新味包括鹽醬味同辣味，前者鹹香，仲有啲似蔥油味；後者則有濃厚嘅麻油味道。
9月28日更新
涼拌小食系列 - 麻醬雞絲青瓜海蜇、花雕雞腎、尖椒皮蛋黑木耳
銷售點：OK便利店
OK便利店新出嘅涼拌小食系列有3款口味，首先以花雕雞腎最似平時喺餐廳食到嘅味道同口感，有明顯酒香亦幾爽口，其次係麻醬雞絲青瓜海蜇。但尖椒皮蛋黑木耳唔算好辣，嗜辣嘅朋友可能會略嫌不足。不過3款涼拌都係1人分量包裝，好啱帶飯嘅朋友加餸。
9月21日更新
YoungMaster 酒花街IPA精釀啤酒
銷售點：OK便利店獨家發售
由今個月開始，OK便利店每個月都會推出一款只用單一酒花釀製嘅IPA精釀啤酒，從此喺便利店都有靚酒飲啦~ IPA啤酒通常都係酒花香氣滿溢，有時甘苦啲，有時又會有啲果香伴隨。而打頭陣嘅係以大量人手挑選嘅新鮮Idaho 7 酒花為主調嘅「酒花街1號」，西柚、柑橘嘅香氣突出，仲有微微松木氣息，清爽回甘，苦度較低。
ice age 藍色雲呢拿味「雪糕」
銷售點：百佳、city'super
以無動物成份乳清蛋白製作「雪糕」嘅冰凍甜點品牌，最新推出3款口味嘅冰凍甜點，包括雲呢嗱、焦糖燉蛋同熱情果味。最特別係隻雲呢嗱，藍色㗎。而焦糖燉蛋則有陣陣甜香。口感同一般雪糕分別唔大，係較為實少少，有少少沙沙地嘅感覺。重點係不含乳糖，激素同抗生素，無論對人體定係地球都更健康呢。
9月15日更新
樂事 麻辣牛油鍋味、特濃蕃茄鍋味薯片
銷售點：7-11及超巿
打邊爐你哋會揀咩湯底？麻辣鍋同番茄鍋2個都係紅卜卜嘅湯底，最近畀Lays變咗做薯片。麻辣牛油鍋味一打開包裝已經好大陣打邊爐味，第一下食落牛油味幾出，唔太覺辣，但食多兩三塊開始，就會feel到喉嚨麻麻地，少少辣底出返嚟。
TOHATO 暴君極辣薯圈
銷售點：7-11
辣椒仔呢排有好多零食可試，呢款薯圈用咗墨西哥嘅燈籠椒，包裝上仲顯示5隻辣椒。 不過，食落又冇想像中咁辣，慢慢吞多幾下口水先開始嚟料，輕輕喺喉嚨度感覺返啲辣味。
鴻福堂 X 譚仔 解辣山楂酸棗茶
銷售點：全線譚仔雲南米線分店及鴻福堂門市、7-11
咁多款辣味零食，呢款新出嘅解辣茶可以話係大眾嘅救星。由譚仔同鴻福堂聯乘推出嘅解辣山楂酸棗茶，以2款酸味草本食材為主，酸酸地甜甜地，又真係有助中和辣感喎。而且有清熱利咽嘅功效，食完辣後飲返支，喉嚨都會舒服返啲。
innocent®天真 健康果汁
銷售點：百佳、FUSION、INTERNATIONAL、TASTE x FRESH、TASTE、FOOD LE PARC、惠康、Market Place by Jasons等
果汁梗係要純天然、冇加糖先好飲同健康。呢個嚟自英國嘅果汁品牌，主打100%生果壓製榨取嘅果汁，全部都係純天然、無濃縮、無添加。2款新到果汁口味分別有橙汁同蘋果汁。後者直情用1.5個新鮮蘋果榨出嚟，望落係濁啲，但味道甘甜。
另外有3款smoothie味道，包括士多啤梨香蕉、芒果熱情果同蘋果奇異果青檸味，特別一提，芒芒果嗰款用上阿芳素芒果同厄瓜多爾熱情果製作，香氣同甜味都十足。
甘樂 熱帶水果及雜果賓治軟糖
銷售點：7-11
比卡超~出嚟啦~ 粉絲去開便利店嘅可以搵下呢包糖，2種熱帶水果口味分別係芒果同菠蘿，酸感十足。不過重點當然係粒糖係比卡超造型啦。！另外仲有波加曼、快艇同水泡造型，總共有5款包裝架。
Impossible 植脆雞
銷售點：百佳、 fusion、TASTE 、 great Food Hall 、U購Select、 CitySuper
素食朋友又多個選擇。以植物成分製造嘅植脆雞，登陸香港啦。無論包裝定係煮法都相當方便，由於本身已經熟咗嘅關係，唔係好使用太多時間同功夫處理，簡單透過氣炸鍋、焗爐或者微波爐加返熱就食得。外層微脆，不過味道就相對較清淡。
9月7日更新
龜田製菓 Happy Turn's米餅愉快禮盒、TaneBits雜錦禮盒
銷售點：city’super時代廣場店、海港城店（即日起至2022年10月31日）
日本龜田製菓海外首間獨家快閃店登陸香港！呢個品牌主打日本傳統零食米菓，以日本國產米粉製作米餅，再灑上特製調味粉，口味包括香蕉馬斯卡彭芝士、酸忌廉洋蔥、焦糖朱古力等，好有新鮮感！另外亦有高級版柿之種TaneBits，細細包裡面有柿之種同堅果，擺Office過下口癮一流啊呀。
N*ICE POPS 冰花蛋白杏仁茶雪糕
銷售點：富臨飯店
本地手工雪條品牌N*ICE POPS 今年再度與米芝蓮三星餐廳富臨飯店聯乘，推出夏季限定嘅冰花蛋白杏仁茶雪糕！靈感嚟自經典中式甜品蛋白杏仁茶，加埋富臨飯店多年嚟南北杏比例嘅秘方，再配搭蛋白同冰糖，令雪糕充滿杏仁香而唔會膩，口感柔滑。
8月30日更新
森永PARM烤豆粉黑糖醬雪糕批
銷售點：7-11及Circle K
黃豆粉同黑糖醬幾時都係咁好朋友，呢條日本直送嘅雪糕批，外層係黃豆粉朱古力脆皮，一入口即刻溶返做粉，而雪糕都係黃豆粉牛奶味，所以黃豆粉味好濃仲好有口感，反而大理石紋嘅黑糖醬冇想像中咁甜，夾埋一齊幾唔錯。
森永MOW白桃牛奶、摩卡咖啡雪糕
銷售點：7-11及Circle K
白桃嗰隻採用日本生產嘅白桃汁同海道牛乳製成，每杯有成23%都係白桃汁，味道清甜；至於mocha嗰隻，來頭都唔細，由2019年日本冠軍咖啡師石谷貴之監製，採用中度烘烤嘅埃塞俄比亞咖啡豆製作，難怪咖啡味濃郁，口感順滑。
樂飛利芒果乳酪雪糕
銷售點：Circle K
叫得乳酪雪糕，當然有少少酸咪咪，配搭嘅扭紋芒果醬亦唔會話太甜膩，係有種清新感嘅。惟一要挑剔少少就可能係個texture，偏漿口咗少少，口感似cream多過雪糕。
Binggrae希臘乳酪、爆炸糖乳酪甜筒
銷售點：7-11
為咗健康，好多人都會轉食希臘乳酪，將希臘乳酪轉咗做雪糕又有冇得諗？嚟自韓國嘅希臘乳酪雪糕酸酸甜甜，口感軟滑，而且個甜筒特脆，幾有驚喜。另一隻話題性高啲嘅口味係爆炸糖乳酪甜筒，雪糕面頭加咗紅色雜莓醬同彩色爆炸糖，係有啲衝擊嘅，但幾得意。
Dreyers REAL DELIGHT™ PLANT-BASED雪條 呂宋芒果、宇治抺茶
銷售點：各大便利店及超巿
專為素食朋友而設嘅素GREEN雪條，以大豆蛋白製成，不含動物成份，每支70毫升含零克反式脂肪。兩款口味分別係芒果同宇治抹茶，前者味道略淡，後者則有微微茶香。味道同口感同平時食開嘅雪糕當然會有分別，但，健康啲囉。
罐頭豬Lulu 玻璃茶壺套裝連糖果
銷售點：7-11
Lulu豬粉絲留意喇，呢兩set Lulu 玻璃茶壺套裝實用度高，用嚟沖泡熱茶招呼朋友一流。仲附送一包糖仔，氹細路啱晒。
維他奶 新鮮燕麥奶/新鮮杏仁奶
銷售點：各大超巿及便利店
植物奶都有香港新鮮製造嘅選擇啦！呢個品牌新推出「新鮮植物奶+」系列，用100%純天然燕麥同杏仁，喺香港廠房新鮮製作。比全脂牛奶更高鈣，而且低糖、零膽固醇同不含防腐劑，最啱追求健康嘅都市人。特別係燕麥奶口感厚滑又唔會太重燕麥味，沖咖啡或者整早餐都唔錯。
8月23日更新
Shapetime 士多啤梨/藍莓黑莓雪葩雪條
銷售點：各大超巿
夏天想食雪糕消暑又驚有罪惡感？呢個北歐品牌最近推出成分萃取天然、無人造香料色素嘅雪芭雪條！有士多啤梨同藍莓黑莓兩款口味，每支分別只有89kcal同91kcal，外層係清新雪芭裡面係混入果肉嘅雪糕。略嫌水果味道唔太自然。
8月19日更新
H.K. Lovecraft - The Deep Ones （Cold IPA）
銷售點：H.K. Lovecraft 網店及The Madhouse
呢隻本地精釀啤酒品牌，又有新作！今次呢隻Cold IPA，係近年新興嘅類型，酒體清澈，呈金黃色，釀造時加入阿布泰泰國特級香米，使尾韻變得乾爽。重點係，用咗成6款嚟自德國嘅啤酒花釀製啊！香味可想而之，濃濃果香，細分之下可以大約飲到有白提子、芒果、燈籠果同木瓜等熱帶果香味。而釀造靈感則取自H.P. Lovecraft作品《印斯茅斯疑雲》，希望藉此提醒大家要睇清真相，唔好被同化而成為咗當初自己討厭嘅人。
8月18日更新
樂事 羅宋湯味/避風塘炒蟹味薯片
銷售點：各大便利店及超巿
呢兩個超大包裝都係期間限定口味嚟，將飯枱上嘅菜式轉咗落薯片口味度一樣咁夾。避風塘炒蟹味幾有驚喜，完全呈現返爆炒炸蒜嘅味道，嗒真啲仲有啲蟹香，除咗唔太辣之外其實都還原得幾似。
可口可樂X MARSHMELLO 無糖汽水
銷售點：各大便利店及超巿
可口可樂聯乘外國著名電子音樂製作人Marshmello推出咗呢款限量版嘅新品，零糖零卡，唔使怕肥仔。味道則混合咗士多啤梨同西瓜味，都幾啱夏天飲。
OREO 旋風威化卷
銷售點：各大便利店及超巿
米奇同米妮限量包裝，應該吸到唔少粉。兩款分別係抹茶味同士多啤梨味。不過要做少少期望管理先，脆係幾脆嘅，但隻士多啤梨味假假地，酸多過甜。
HARBIO 酸沙味
銷售點：7-11
呢隻熊仔糖好多人都鍾意食，最近換上新口味，多咗隻刺激酸沙味，酸度十足，夠晒過癮。一包入面會有檸檬、橙、菠蘿、覆盆子同埋士多啤梨味。同埋即日起至8月30日，凡買滿$30哈瑞寶產品，就可加錢換個熊熊迷你瓶。
8月9日更新
7-SELECT x OREO 甜品系列
銷售點：7-11
7-11耐唔耐就有一系列嘅聯乘甜品，今次輪到OREO回歸，4款新品全部日本直送。
朱古力薄荷曲奇忌廉雙層泡芙 /曲奇忌廉泡芙
有食過佢哋泡芙嘅都知道，泡芙口感鬆軟，內餡分別係薄荷曲奇忌廉同曲奇忌廉，難得嘅係竟然唔太甜，而且因為薄荷嘅關係，仲有啲清新涼快感。
薄荷曲奇忌廉瑞士卷
同樣都係薄荷忌廉，但呢個就冇上面個泡芙咁清新喇，相對嚟講飽肚感就比較重啲。
香蕉曲奇忌廉朱古力蛋糕
選用哥斯達黎加香蕉製作忌廉，食落係幾重蕉味嘅，蛋糕軟滑，加埋OREO朱古力曲奇碎，甜度大增。
8月1日更新
石見清酒蛋糕
銷售點：銅鑼灣Sogo B2/F 超巿
本地網上商店「閒行地」主打多款特色嘅日本鄉縣小店產物，呢幾日（去到8月3號咋）佢哋喺銅鑼灣Sogo舉辦咗個「鳥取 x 島根：鮮為人知の山陰食品展」，帶嚟咗超過120款嘅當地特色美食。其中特別推介呢款「石見清酒蛋糕」，蛋糕製作時加入石見銀山嘅大吟釀，一打開包裝，未食都已經聞到好香嘅吟釀香味。蛋糕口感濕潤，微甜，仲有陣陣清酒味道湧滲出嚟，非常高質。鍾意sake嘅朋友仔必試。
三幸園 濃厚抺茶餅
銷售點：銅鑼灣Sogo B2/F 超巿
另一款要推介嘅特產係抺茶餅。大大塊，每片抹茶餅都用上2克抹茶粉，難怪抹茶味道極其濃郁，口感微微濕軟，食完好滿足。
Dole POP POP果汁x唧唧冰
銷售點：韓印紅、惠康、UNY、HKTVMall、CITISTORE等
由韓國進口嘅唧唧冰，細細包好得意。以100% 純果汁製造，無添加糖同防腐劑。7款口味包括香桃、蘋果、菠蘿、香橙、芒果、香提同芒果橙，加冰當果汁飲又得、放入冰箱當雪條食又得，甚至乎拎嚟配搭唔同茶或酒，變成果茶或cocktail都仲得！開飯仔試咗雪條食法，而家咁鬼熱食啪返包，係特別清爽，果香清甜。
灣仔碼頭 全新點心系列
銷售點：各大超級巿場
品牌推出全新點心系列，以傳統經典點心灌湯小籠包同手工珍珠雞打頭陣，簡單加熱就食得，好方便。灌湯小籠包都裝咗幾多湯汁，入口鮮甜juicy；珍珠雞一包2隻，細細份得嚟都好足料，有鹹蛋黃有臘腸，仲有蝦米、冬菇等，糯米飯滲到少少荷葉香架都。
Lipton冷泡果香茶系列
銷售點：各大超級巿場
新出嘅冷泡果香茶系列有2款口味，清新淡雅嘅伯爵茶，同埋桃香突出嘅蜜桃橙香綠茶。特意選用三角形設計嘅茶袋，令茶葉可以有充分空間完全散開沖泡，令香味可以全面滲透。不過個人就覺得蜜桃橙香綠茶甜咗少少。
Meadows 礦泉水浸吞拿魚塊 / 薯片薯條
銷售點：惠康、MarketPlace、arket Place by J asons 、3hreesity、Jasons ichiba等
呢個品牌愈嚟愈多自家產品推出，薯片控入貨嘅話，不妨考慮紐約式芝士漢堡包味薯片，V-cut厚切，芝士味濃郁；另外BBQ味嘅薯條，大包內分咗做5包細嘅，幫下大家控制每次食嘅分量。不過咁脆口，一次得嗰細細包真係未必夠喉。
另外，礦泉水浸吞拿魚塊由泰國製造再直送香港，以可持續捕獲嘅魚類製成，夠晒環保。用嚟配搭沙律或三文治都唔錯。
7月29日更新
Ping x 瓜生太郎 限量別注版瓶裝雞尾酒
銷售點：線上訂購 (按此)
瓶裝cocktail由專業調酒師調製，方便大家買返屋企享用。最近品牌成立2周年，就聯乘日本當代知名插畫家瓜生太郎推出限量別注版瓶裝雞尾酒，更係首次嘗試利用離心機技術，以多款水果同天然食材調製出3款好啱夏天嘅口味。雖然全部都係透明冇色，但味道就大為不同。紅色瓶裝嘅Rep Lips有蘋果同番茄嘅香味；Yellow Wave則用咗日本沖繩菠蘿味燒酎，配搭香橙、檸檬、熱情果等，味道帶酸；而粉紅瓶裝Pink Moon就有陣陣桃香同西柚香，味道香甜。
H.K. Lovecraft -《明日戰記》電影特別版雞尾酒
銷售點：7仔預購站
各位影迷，相信一定好期待科幻片《明日戰記》上映，有本地精釀啤酒品牌推出《明日戰記》x Bacardi電影特別版雞尾酒，淨睇包裝都好值得影迷收藏儲罐。喺7仔預購站更可訂購套裝，包埋電影紀念戲票同埋明信片呢。
橋村蜂蜜炸雞味 / 辛辣炸雞味薯條
銷售點：7-11
2款炸雞味嘅薯條，有辣有唔辣。粗薯條嚟嘅，脆卜卜，不過係細條咗啲、短咗啲，口感爭緊啲。蜜糖嗰款係用槐花蜂蜜，甜度over咗少少，但炸雞味就唔多覺。
樂天 芝麻白朱古力/燕麥朱古力餅棒
銷售點：各大便利店及超巿
百力滋又有新口味，兩款都被濃甜嘅朱古力包住，一款就有粒粒燕麥黑麥碎，另一款就佈滿芝麻粒，增加脆口感之餄味道亦有豐富咗。
UHA X SABRIO限定推廣裝連拉鍊袋
銷售點：7-11
SANRIO粉絲今次見到一定心心眼！限定推廣裝內有兩包白桃味嘅果汁軟糖，另外送多個拉鍊袋，又有得食又有得用，$35.5，買得過呀。
公仔鬼辣 泰式辣蝦味炒麵
銷售點：各大便利店及超巿
又到咗辣椒仔挑機時間。地獄級系列又有新品，係達6級辣度嘅泰式辣蝦味炒麵，可以話係同系列中最辣嘅產品。蝦又辣、粉又辣，撈勻成碗麵後辣到爆廠，愈食愈刺激。成功挑戰晒成盒嘅朋友仔，真係要畀個叻你哋。
7月27日更新
Pols 焦糖爆谷雪糕批
銷售點：各大便利店及超巿
睇戲要食爆谷嘅朋友，呢個夏天可以轉食爆谷雪糕批！呢個北歐拉脫維亞雪糕品牌將爆谷變成脆脆然後加落朱古力脆皮當中，而裡面係幼滑嘅焦糖雪糕。脆皮同雪糕味道都偏甜，最啱各位甜魔。爆谷脆脆咬落有焦香，不過就韌咗啲要嚼多兩下。
Pols 雲呢拿朱古力曲奇雪糕
銷售點：各大便利店及超巿
繼舊年推出雲呢拿雪糕曲奇，今年就換上朱古力曲奇新登場，曲奇偏軟身，有朱古力粒粒而且難得唔會太腍，裡面嘅雲呢拿雪糕亦相當Creamy。值得一提係佢哋嘅雪糕100%北歐製作，選用新鮮優質牛奶，不含人工添加劑及色素。
7月18日更新
品客薯片 雞蛋沙律三文治味
銷售點：7-11 獨家
平時食三文治，就咁雞蛋沙律餡就可以一餐，簡單得嚟又好味。今次變成薯片，味道出奇地夾，一入口就算blind test都食到係碎蛋沙律嘅味道，加埋蛋黃醬就更加香口。
品客薯片 水果燒烤醬+大阪燒味
銷售點：7-11及百佳
至於呢兩款新口味，則係夏日嘅期間限定口味。水果燒烤醬甜甜酸酸，以甜杏桃為基底，再加咗啲啲辛香料；至於大阪燒味，則搭配咗幾款醬料，包括大阪燒醬、沙律醬，仲有紫菜粉同柴魚片，還原度都高嘅。
卡樂B MELTS溶岩芝士薯片
銷售點：各大便利店及超巿
MELTS系列嘅薯片，由澳洲直送，無論係芝士味定芝士漢堡味，都以波浪形呈現，薯片上更有半溶狀態嘅芝士！口感格外香脆得嚟，亦大大突出咗芝士嘅濃郁，芝士漢堡味則再多咗一陣青瓜味。
7月8日更新
7-SELECT x 銀咖喱 - 咖喱吉列雞扒沖繩飯糰
銷售點：7-11
便利店自家品牌最近聯乘餐飲集團推出咗幾款日式咖喱同章魚燒嘅輕食。日式咖喱通常都係甜甜地而唔多辣，呢款飯糰都唔例外。咖喱醬由 35種特製香料配上鮮雞湯，新鮮豬肉同多種野菜烹煮而成，不過味道唔算好濃郁，飯糰中間夾住嘅吉列雞扒亦略為濕咗少少。貪快食個都可以嘅，但如果真係鍾意咖喱飯嘅，建議都係去返餐廳食會開心啲。
7-SELECT x 銀咖喱 - 咖喱牛肉芝士熱捲餅
銷售點：7-11
另一款聯乘產品，咖喱牛肉芝士熱捲餅就幾有驚喜。以日本咖喱粉炒香牛肉，再搭埋洋蔥、馬鈴薯、車打芝士醬同水牛芝士等，輕輕叮一叮返熱食係幾唔錯，咖喱香口仲有陣陣芝士香，薄餅軟熟。
7-SELECT x 築地銀だこ - 章魚燒日式手卷
銷售點：7-11
好多人都鍾意食章魚小丸子，咁小丸子化身成手卷又如何？中間同樣夾有粒章魚粒，照樣配搭章魚燒醬同蛋黃醬等，聞落係幾香嘅特別係叮完之後，不過問題出咗喺嚿飯度，硬咗啲囉。
6月28日更新
龍勢 八反伍拾 生酛純米大吟釀
銷售點：City’super 清酒祭
話說City’super嘅清酒祭又嚟喇，今年仲多咗架限量版清酒巴士模型，買滿指定價錢即可獲贈。清酒祭期間，最開心莫過於見到多款新產品。好似呢支咁，就係首度登陸香港嘅清酒，沿用逾300年歷史嘅生酛釀造法釀製而成，辛口得嚟帶有輕盈果香，配襯甜酸口味嘅料理就最夾。
FOX’S 朱古力曲奇
銷售點：7-11
英國直送嘅兩款牛奶朱古力同極品朱古力曲奇，曲奇硬脆，帶有裂紋。兩款都係朱古力味爆濃。一款就係啖啖都有朱古力塊夾雜喺中間，另一款則係成層朱古力coating，總之都係肥底架喇。
卡樂B 一口穀物小食
銷售點：銷售點：7-11
零食都可以健康嘅。呢兩款一口穀物小食，分別係原味同朱古力味，有多種膳食纖維同鐵質等。食落有少少硬身，朱古力味唔算好甜，仲間中有粒粒果乾，想食下零食但又怕肥嘅，都可以考慮下。
湖池屋 粟米片
銷售點：銷售點：7-11
粟米片嘅粟米味固然之濃，配埋同樣都係濃味嘅黑松露海鹽會點？粟米味跑出，松露只係輕輕滲出。而如果你係會用嘴唇啜下塊粟米片嘅朋友，咁就會食得到好重嘅海鹽味，但如果你擘大個口成塊啪，海鹽味就冇咁突出喇。另一款口味係香辣番茄，口感鬆脆。
百福 無添加糖鮮豆漿
銷售點：各大便利店及超巿
而家大家揀飲品都開始傾向揀無糖，可以諗諗無添加糖鮮豆漿。用上非基因改造大豆製作，雖然味道淡就係淡口咗啲，但變相豆味就顯得突出啲，感覺都健康啲。
6月21日更新
Grand Calbee 日本厚切薯片
銷售點：city’super時代廣場、海港城分店
全港首間獲授權嘅日本薯片品牌Grand Calbee，最近喺2間city’super分店內開pop up，有多款皇牌產品供應。薯片控對佢哋唔會陌生，佢哋嘅薯片超厚身，近乎係普通薯片嘅3倍。厚得嚟仲要係波浪形切法，口感滿分。5款口味包括：鹽味、牛油味、烤芝士黑胡椒味、烤鹽味同炙燒明太子味，分別以慢炸同炙燒製作，鹹香惹味。
EKSELENCE 杏桃雪葩配大黃冰凍甜點
銷售點：百佳超級市場、 TASTE、 FUSION、FOOD LE PARC、GOURMET及GREAT
源自北歐拉脫維亞嘅雪糕，近年慢慢打入香港巿場。脆皮雪糕批有新口味，香橙汽水味有啲似mocktail嘅感覺，有微微氣泡感嘅香橙雪糕幾清新，另外花生棉花糖脆皮朱古力就絕對係邪惡嘅代表。棉花糖又甜，襯埋都係甜嘅朱古力脆皮，幸好有花生粒同埋清啲嘅雲呢嗱雪糕做平衡，成個感覺先冇咁膩。
另一款新品杏桃雪葩配大黃冰凍甜點。大黃係歐洲嘅流行食材，味道酸甜，配埋帶有清新桃香嘅杏桃雪葩，充滿夏日氣息。
Meadows 日本零食
銷售點：惠康超級市場、Market Place、3hreesity、Jasons ichiba、及Oliver’s The Delicatessen
係日本製造同直送嘅日本零食啊！總共有成23款咁多，有啲係鹹味小食、有啲係餅乾同朱古力，例如雜錦海鮮燒餅、香辣烤魚小吃、醬油燒米餅、煙燻鵪鶉蛋、草莓忌廉夾心餅、日式餡餅 (栗子味、番薯味) 等，揀幾款同大家推介下先。
三重芝士脆條
呢款芝士脆條用咗車打芝士、金文畢多芝士同戈貢佐拉藍芝士全製，未食已經可以想像得到有幾濃郁。加上外層餅皮香脆，試完返唔到轉頭。
杏仁朱古力/波子汽水味朱古力/薄荷朱古力球
朱古力系列都有幾多選擇，細細粒嘅薄荷味同波子汽水味，都幾有驚喜，夏天食係幾爽。想有啲果仁咬下口同平衡下甜味嘅，杏仁朱古力就啱晒。
POTONG寶冰雪條
銷售點：各大超巿
泰國嘅人氣雪條到港，幾款雪條都係以純椰奶配搭唔同食材製成。4款口味包括香芋、榴槤、紅豆同黑糯米。難得地幾款雪條都唔太甜，黑糯米嗰款仲幾有咬口添，煙煙韌韌，有啲似食緊紫米露咁。不過少少可惜係椰奶嘅味道略為淡咗啲。
6月20日更新
Line Friends x 雀巢 杯裝乳酪
銷售點：各大便利店及超巿
Line Friends粉絲留意喇，佢哋最近聯乘雀巢推出咗幾款期間限定特別包裝嘅杯裝乳酪，5款包裝分別有熊大、CONY同SALLY，有藍莓、芒果、士多啤梨等口味。新包裝杯身仲可以回收添，夠晒環保。另外，凡喺指定超巿買呢幾隻乳酪滿$30，即可加錢換購限定版天然竹製多功能托盤一件呢。
6月13日更新
明玥 森林動物曲奇系列
銷售點：金鐘廊 明玥
人氣蝴蝶酥品牌皇玥集團最近開多咗條新line，成立新品牌專賣高級兒童食品，仲喺金鐘開咗首間專門店。有細路最鍾意食嘅水果軟糖，亦有造型可愛嘅森林動物曲奇、朱古力同脆香果仁等。水果軟糖有士多啤梨、青檸、雜莓等8款口味，全部都係採用天然食材製作；至於曲奇亦有8款口味，例如芝士、番茄、粟米片、紅菜頭草莓等，有隻蔬菜味都好得意，以椰菜、西蘭花、紫菜等製成，好啱小朋友食。
6月9日更新
Mevgal希臘乳酪
銷售點：全線Market Place by Jasons及惠康超級市場
以藍白色為包裝主調嘅呢個希臘乳酪品牌，一直以傳統方法製造純正希臘乳酪，最近更特別喺原味系列中，新增低脂版，適合既想追求健康但又同時都重視食物味道同口感嘅朋友。至於水果希臘乳酪列則新出咗檸檬味，開飯仔試過，堅係清新，同埋食落有啲質感。
另外仲有Mix 'N Match希臘乳酪系列，以脫脂希臘乳酪(0％脂肪)配埋蜂蜜同香脆核桃，乳酪口感厚滑帶奶香，想要幾甜可以自己控制倒幾多蜂蜜。
Haagen Dazs 全新盛夏真果系列
銷售點：各大便利店及超巿
夏天食雪糕，仲要係酸酸甜甜嘅果香味雪糕，零舍爽。Haagen Dazs新出西瓜士多啤梨味同車厘子黑莓味雪糕，前者唔止有真果肉，仲有士多啤梨軟心醬；後者則加入黑莓軟心醬，相比下，西瓜士多啤梨味嗰隻會甜少少。
仲出埋西瓜士多啤梨脆皮雪糕批。外層嘅白朱古力脆片加埋士多啤梨乾粒，入面嘅西瓜雪糕食食下有驚喜發現，原來有真士多啤梨果肉呀。
HERSHEY'S 綿花糖朱古力曲奇、朱古力撻
銷售點：各大便利店及超巿
棉花糖加朱古力絕對係一個邪惡得嚟又唔能夠抗拒嘅組合。今次呢個品牌出咗兩款產品，分別係曲奇同朱古力撻，就咁食又得，想要拉下嘅可以放入微波爐叮10-15秒呀。不過撻皮嘅鬆脆度就爭少少。
樂事 日式香草奶油濃湯味/韓式炆牛肋骨味薯片
銷售點：各大便利店及超巿
樂事繼續將唔同國家嘅味道融入薯片內，韓式炆牛肋骨味係有淡淡嘅肉香嘅，日式香草奶油濃湯呢，老實講，好似sour cream隻味😂。
日清湖池屋 酸梅味/醋味薯片
銷售點：百佳、Don Don Donki
夏天總係想搵啲咪咪嘅嘢食下，於是乎連薯片都有酸味！一款係酸梅味，一款係醋味。不過都係輕擎嘅，少少地咁易啲接受。始終酸嘅薯片係有少少怪嘅食唔慣嘅話，有啲衝擊。
公仔炒麵王 沙嗲雞肉串燒味
銷售點：各大便利店及超巿
今次以星馬泰特色嘅沙嗲味做主角，推出沙嗲雞肉串燒味嘅炒麵。講真，係咪雞肉串燒味就真係唔多分到嘅，不過沙嗲醬帶有陣陣花生鹹香，微微辣，都幾開胃嘅。
美祿 朱古力忌廉 / 牛奶忌廉曲奇
銷售點：各大便利店及超巿
美祿應該係唔少人嘅童年早餐回憶，呢個品牌最近有新品，將美祿朱古力變咗做穀物棒。不過雖然話每條bar低於100kcal，但都幾甜架下講明先。另外仲有朱古力忌廉同牛奶忌廉曲奇，除咗甜之外，都仲食到啲麥芽香味嘅。
6月8日更新
青鳥旅行 春水堂珍珠奶茶蛋卷
銷售點：青鳥旅行屯門期間限定店及網店
兩間嚟自台灣嘅知名品牌今年再度聯乘，而且係全新配方，神還原春水堂嘅台式珍珠奶茶！外層係鬆化嘅紅茶蛋卷，而裡面係奶茶餡同黑珍珠，珍珠口感比一般珍珠奶茶食到嘅硬身啲，但依然Q彈唔會咬唔開，的確幾過癮。
青鳥旅行 盛情端陽綜合甜鹹蛋卷禮盒
銷售點：青鳥旅行屯門期間限定店及網店
呢個期間限定特別版禮盒真係好啱香港人，皆因集合四大招牌口味：原味肉鬆、海苔肉鬆、芝麻沙沙，同花生粒粒，鹹甜都有。海苔肉鬆外層有日本青海苔粉，裡面嘅肉鬆帶鹹香。而花生粒粒就夠香口。
少爺 HIGHERTHAN Highball調酒系列
銷售點：少爺網店
少爺啤酒廠嘅全新罐裝調酒，首發三款口味都糅合現代亞洲風格，包括靈感嚟自鹹檸七嘅鹹檸Highball，加入優質鐵觀音茶嘅鐵觀音Highball，同混合香料同生薑嘅麻辣Highball。相信大家都好奇麻辣Highball會係點？其實飲落無想象中咁麻咁辣，反而薑嘅香氣更明顯，勝在完全唔嗆易入口。
6月1日更新
Haagen Dazs 麻糬迷你杯
銷售點：7-11 及日資超巿
兩款由日本直送嘅麻糬迷你杯，分別係黑蜜黃豆粉，同核桃糰子醬味。前者黃豆牛乳雪糕頂頭有層軟糯嘅麻糬，再灑上黃豆粉同拌入黑蜜，豆香十足過足口癮。至於後者嘅糰子醬則由砂糖同醬油混製而成，拌入埋高溫烘焙嘅核桃粒，但整體感覺就略為甜咗少少。
Haagen Dazs 日式芝士撻迷你杯
銷售點：7-11 及日資超巿
呢款雪糕可以話係神還原返日式芝士撻嘅味道，以北海道忌廉芝士製成雪糕，再拌入由多種芝士調製而成嘅特濃芝士軟心醬，再加埋烤芝士撻皮嘅脆餅粒，芝士味香濃到一個點，值得一試。
Haagen Dazs草莓芝士餅冰凍甜點三明治
銷售點：各大便利店及超巿
士多啤梨一向都係哈根大師嘅皇牌，今次加埋金文畢芝士同忌廉芝士製成嘅雪糕，層次當然再提升。出面層朱古力脆皮佈滿士多啤梨粒粒之餘，同樣灑上金文畢芝士粉
H.K. Lovecraft X Conspiracy Chocolate 緻 手工朱古力啤酒套裝
銷售點：H.K. Lovecraft 網上商店
本地精釀啤酒品牌H.K. Lovecraft 又有新搞作。最新推出嘅Precioso緻，係一隻朱古力草莓Lager，酒體呈銅紅色，微微嘅果酸中滲出陣陣朱古力嘅甜香。如果食埋聯乘手工製朱古力小店Conspiracy Chocolate合作嘅bean-to-bar草莓羅勒朱古力再飲返啖，草莓嘅微酸會變得突出少少。講多少少，隻草莓羅勒朱古力幾得意，既有草莓小粒嘅清甜，亦有辣辣地嘅小刺激。
淳茶舍 冷萃日式深蒸綠茶 / 台灣金萱烏龍茶
銷售點：各大便利店及超巿
成日留意住個茶櫃嘅朋友，應該會發現到又有新茶飲。冷萃日式深蒸綠茶選用100%日本茶葉，以「滴濾慢釀」嘅方法製作，飲落冇乜茶葉嘅苦澀味，反而咗重清香同甘甜。至於台灣金萱烏龍茶，則有淡淡花香。零糖零脂肪，怕肥者又想飲下啲有味嘢嘅，幾啱。
雀巢美祿 朱古力麥芽味夾心飛碟
銷售點：Circle K
有時早餐求快求方便，都會行經便利店就買個包。新出飛碟口味有雀巢美祿，冇想像中咁甜喎，不過如果有埋粒粒脆口嘅美祿朱古力片或美祿波波咬到，會再開心啲。
5月20日更新
樂天 Ghana 曲奇甜筒
銷售點：Circle K
今Round嚟咗幾款韓國製造嘅朱古力雪糕系列，曲奇味呢款口感都幾豐富，既有曲奇碎，亦有朱古力同杏仁粒，不過就都幾甜下。
樂天 Ghana 朱古力甜筒
銷售點：Circle K
但講到甜，當然點都唔夠朱古力味呢隻甜。混合咗兩種唔同濃度嘅朱古力，未食都已經可以想像到特濃嘅甜香，朱古力控應該會鍾意。
樂飛利 朱古力年糕雪糕
銷售點：Circle K
混合咗雲呢嗱同朱古力雙色雪糕，面頭又有粒粒朱古力，中間仲有煙韌軟糯嘅韓國年糕添，一杯雪糕可以食到好多種口感都幾開心。
樂天Ghana 無糖朱古力雪糕批
銷售點：7-11
而家好興無糖，就連雪糕都有無糖版。呢款朱古力批以糖醇取代砂糖，甜得嚟但唔怕會產生熱量。雪糕批內層係朱古力雪糕同生朱古力雪糕，外層又加多層濃郁嘅朱古力，可以話係三重奏。
樂事法式慢燉牛肉味 / 意式黑松露雜菌燉飯味 / 葡式蒜香蝦味薯片
銷售點：各大便利店及超巿
金色包裝嘅Lays薯片係限量版嚟，3款新嘅特別口味都幾吸引，係西餐常見嘅菜式口味。法式慢燉牛肉味有淡淡肉香，細心食仲有啲番茄嘅酸甜味，又有啲似喎；意式黑松露雜菌燉飯味雖然未至於食得出咁仔細係燉飯，但黑松露香氣突出而唔過份，仲有少少菇菌嘅香味；至於葡式蒜香蝦味嘅鹹香都幾夠濃郁，好似食緊碟餸，不過係脆口嘅咁。
全新無糖雪碧
銷售點：各大便利店及超巿
柳柳粉留意喇，全新登場嘅無糖雪碧搵嚟阿Jer (柳應廷)做代言，嚟緊5至6月仲有機會可以喺街頭見到唔同嘅宣傳品打卡區。無糖雪糕標榜0糖同0卡路里，依然有清爽嘅檸檬酸味，有少少似飲緊梳打水。
5月17日更新
Rankingdak Loveeat®️雞胸肉蝦肉/蔬菜燒賣
銷售點：Rankingdak官網
唔經唔覺，韓國雞胸肉品牌Rankingdak已經登陸香港3年，最近更新增雞胸肉燒賣作為週年食品。燒賣1包有6粒，含12-13g蛋白質，用微波爐叮一陣就食得，口感鬆軟唔會好實。蝦肉味（圖左）為230kcal，油分相對多少少，食到有爽口嘅蝦肉；而蔬菜味（圖右）則只有210kcal，味道似韭菜餃，相對乾身少少。
維記牛奶 原味低糖乳酪飲品
銷售點：便利店及惠康超級市場
為咗照顧鍾意低糖飲品嘅朋友，維記牛奶最近推出原味低糖乳酪飲品，糖分比以前用少50%，無添加防腐劑同人造色素外，更用上100%新鮮牛奶製造。入口質感稠身，酸味幾明顯，唔太甜，但冇飲開乳酪或怕酸嘅朋友未必接受到。
5月11日更新
竹下 童星點心麵朱古力味雪條
銷售點：7-11
由細食到大嘅童星點心麵，最近出咗雪條？！真架，你哋行便利店搵下，都係經典紅白配色包裝。雪條外層黐滿晒一條條童星點心麵，中間係朱古力同雲呢嗱雪糕。應該有唔少朋友都好奇到底夾唔夾，等開飯仔為大家做試伏器啦。你以為會係鹹甜夾雜？又唔係喎，鹹味為主，朱古力同雲呢嗱嗰層都冇乜味，所以唔使驚又鹹又甜會好奇怪，不過……啲點心麵係……腍嘅，sosad。
5月6日更新
李錦記x金象牌 蠔皇元貝鮑魚撈飯
銷售點：各大便利店及超巿
有時趕時間趕到落街買個飯都覺得嘥時間，更莫論自己煮。不過呢個早排推出嘅方便飯，就絕對係救星。一包一人份，內有一盒即食白飯，同埋一包三隻嘅蠔皇元貝絲鮑魚連醬汁。簡單加熱就食得，成件事五分鐘都唔使。鮑魚軟腍，鹹鹹地嘅醬汁都幾送得飯。
4月29日更新
金必氏愉快動物餅朱古力抹茶味
銷售點：各大便利店及超巿
細細個會拎住嚟同個盒，逐隻逐隻動物對嘅動物餅，最新出咗朱古力抹茶味，連包裝都唔同埋，由盒裝變成有得zip嘅袋。一入口係甘甘地嘅抹茶味，食食下又變返回憶中嘅牛油動物餅味。
伊藤久右衛門 抹茶/櫻花甜品
銷售點：7-11
便利店呢排又有好多抹茶甜品喇，趁住櫻花季，仲有啲係搭埋櫻花味添啊。咁多款當中，最推介嘅係宇治抹茶忌廉紅豆銅鑼燒，銅鑼燒口感軟熟濕潤，微甜帶甘香。唔止中間嘅餡夾有紅豆同抹茶忌廉，連餅皮都有加入宇治抹茶粉製作呢。宇治抹茶忌廉泡芙亦係唔錯嘅選擇，泡芙軟熟，入面嘅宇治抹茶忌廉直情有爆餡嘅感覺，軟滑香濃。
早餐買開包嘅，有2款抹茶麵包揀，長條形嘅宇治抹茶吉士包，用上宇治抹茶粉同日本麵粉，以日式烘焙技術製成，夾住嘅抹茶味吉士都幾多，不過包身略為硬咗少少。至於宇治抹茶櫻花紅豆白玉包，混埋紅豆蓉同白玉，口感豐富咗。
另外兩款品加埋櫻花，宇治抹茶櫻花忌廉瑞士卷，櫻花味較淡，幾乎只係食到卷心嘅宇治抹茶忌廉味；而宇治抹茶櫻花蛋糕則以鹽漬櫻花製作外層嘅淺粉紅色忌廉，嗶起就會見到內層嘅抹茶忌廉，都幾滑身。
MORINAGA午後紅茶 奶茶夾心餅
銷售點：7-11
午後の紅茶本身有唔少fans，今年35周年，就出咗呢隻限定奶茶夾心餅。兩層餅乾鬆化，夾心牛奶味幾濃郁，對比起平時飲開嘅樽裝茶，反而冇咁甜喎。
樂天朱古力抹茶曲奇
銷售點：7-11
每塊曲奇都係獨立包裝，薄薄地一塊，朱古力底嘅抹茶脆餅。不過可能朱古力味太濃，稍為蓋過咗抹茶嘅清香。
迪士尼精品連糖果
銷售點：7-11
有冇勞蘇、Rex、三眼仔或者阿Hamm嘅fans喺度啊？呢排行過便利店記得望多兩眼啊，迪士尼出咗一系列嘅卡通精品呢，好似有美耐皿碗、原子筆、記事簿、便利貼、多用途小袋同埋速乾巾等，全部都附有包細細包嘅糖仔。自肥或者送畀小朋友都好開心呢。
4月25日更新
Four Grams Cookies
銷售點：Four Grams網站
細細塊嘅曲奇，鬆脆香口，好易令人食唔停口。今次介紹嘅呢間Four Grams 本地手作曲奇品牌，由於每塊曲奇都係4克重，故以此命名。品牌選用新西蘭草飼牛油製作曲奇，並創作咗多款唔同口味，當中有唔少更富有香港本土特色，好似鹹蛋黃蝦、蝦乾、紅棗等，而最新出嘅檸檬薑味亦充滿特色，加入古法檸薑同新鮮檸檬皮同薑製作，食落帶甘，同時亦有微酸同微辣多重口感，小清新。嗜辣嘅朋友仔，特別推介可試麻辣口味，麻香愈食愈刺激。鹹蛋黃蝦口味同樣有驚喜，呢款嘅口感唔似其他口味咁脆，而係走鬆軟路線。鹹蛋黃以威士忌蒸熟，更有粒粒虎蝦乾粒食到，鹹香嘅層次都有幾層。
雀巢 可愛造型雪條
銷售點：7-11
呢幾款雪條嘅造型都好cute cute，實氹到好多細路仔。原來係嚟自泰國嘅雀巢ESKIMO / MAT KOOL，不含人造色素同防腐劑。蝴蝶造型嘅係草莓白提子味，仲要係孖條嚟，酸甜清新。熊貓造型嘅係朱古力雲呢嗱味，而西瓜造型就係返西瓜味，呢款最清涼，夏天食最啱。
4月19日更新
OREO 櫻花柚子/ 玫瑰葡萄味
銷售點：各大便利店及超巿
粉紅同粉紫色嘅OREO，喺包裝上係幾容易引到一眾粉色系控。粉紅色嗰隻係櫻花柚子味，食落冇想像中嘅伏，有微微酸甜嘅柚香；至於粉紫嘅係玫瑰葡萄味，聞到幾重嘅提子味，但味道就一般，有少少似好甜嘅提子汁。
無雙酸菜魚風味粉
銷售點：7-11、惠康、百佳
酸菜魚近年大熱，唔止開咗好多酸菜魚餐廳，就連酸辣粉都出咗酸菜魚味！以熱門遊戲「無雙」為名嘅品牌，新出咗酸菜魚風味粉，繼同系列嘅張飛同關羽之後，今次揀咗周瑜做代表人物。風味粉內包咗酸菜包、味醬料、魚湯包同芝麻辣椒油，加滾水5分鐘食得。辣度視乎你自己落幾多啦，開飯仔只係落咗半包都覺得幾刺激。紅薯粉爽滑彈牙，開頭都會食到少少魚鮮味嘅，但慢慢食食下，就畀辣味蓋過咗。
ACHIM 即食年糕
銷售點：7-11
韓國年糕有一定嘅捧場客，而家喺便利店更可以買到即食嘅添。選用100%韓國米製造，叮一叮熱淋埋醬就食得，兩款口味有辣有唔辣，食得辣嘅梗係揀韓式甜辣炒年糕醬啦，夠晒風味，否則另一款天然甜米蜜味糖漿都唔錯，甜甜地。一盒有3條，口感係幾煙韌，有嚼勁嘅，不過略嫌乾身咗少少。
4月14日更新
韓國HBAF蜂蜜牛油杏仁甜筒
銷售點：7-11
韓粉一見到呢個包裝，應該一定會聯想到HBAF杏仁零食啦。今次呢款韓國直送嘅甜筒，正正就係由HBAF授權生產，加入韓國蜂蜜，同埋蜂蜜牛油杏仁調味料製作。難怪食落有陣陣清甜嘅蜂蜜香，雪糕頂更鋪滿低溫慢火乾焗嘅杏仁，好有口感。
樂天buon Gelato綠茶朱古力味雪糕批
銷售點：7-11
韓國雪糕批，外層係綠茶脆皮，中間係朱古力雪糕，不過呢隻綠茶味略為甜咗少少，層次唔夠豐富。
樂天buon Gelato士多啤梨味雪糕批
銷售點：7-11
同樣由韓國直送嘅雪糕批，外層有粒粒士多啤梨果肉，中間亦係士多啤味雪糕，由內到外都係酸酸甜甜嘅感覺，熱天食係幾清爽。
4月12日更新
7CAFE+ pop up概念店
地址：旺角花園街7號地下7C及7D號舖
7-11跳出便利店框架，最近喺旺角打造咗首間「7CAFE+」嘅pop up概念店，除咗有三文治、雪糕等產品外，更新增咗多款特色沙冰、手搖茶、單品咖啡豆同甜品，而且價格頗為親民，廿零蚊就可以飲到杯冰爽解渴嘅特飲。
特色沙冰以香港情懷嘅飲品同中式糖水為藍本，特別推介紅豆冰味同楊枝甘露味沙冰，兩款入口都有冰爽嘅碎冰口感。前者混和紅豆嘅甜香同奶香，比起紅豆冰更為融和；而後者則有陣陣清新感覺，柚子微酸，好啱大熱天時飲。
手搖冰茶系列則將帶有酸甜味嘅水果加入茶飲，再配合人手即叫即搖，茶澀味減輕之餘，亦突出咗果香味道。三款茶飲包括有港式檸茶、西柚烏龍茶同熱情果烏龍茶。當然唔少得咖啡同鮮奶，仲可以揀要OATLY燕麥奶都得。可以試下限定口味，以薑汁撞奶為靈感嘅薑味咖啡或鮮奶，尾韻滲出淡淡薑辣，熱飲款式會更為突出。
概念店更設有烘焙甜點櫃，多款烘焙產品如藍莓鬆餅、提子酥、朱古力酥等均有供應，甜品控唔可以錯過朱古力心太軟，即場叮熱食又得，拎返屋企自己叮都得。廿蚊個，堅流心，而且朱古力岩漿味道濃香，性價比相當高。
可口可樂STARLIGHT
銷售點：香港太古可口可樂e-Shop、各大便利店及超級市場
可口可樂最近有新罐，勁靚啊，係紫紅漸變色㗎，仲有點點星光，可樂迷要試之外仲要儲埋個罐啊。呢罐全新嘅可樂命名為「可口可樂STARLIGHT」，零糖、零卡路里，330毫升高罐裝，限量登陸咗香港，嚟緊仲會推出限量STARLIGHT玻璃杯，喺指定網上商店買滿一定數量嘅新罐，就可免費獲贈一隻。咁星光味到底係咩味？倒出嚟係緋紅色嘅，飲落帶有莓香，酸酸地甜甜地。不過唔少飲唔慣嘅網民就表示都係鍾意經典原味多啲。
3月28日更新
Meadows Cola
銷售點：惠康、MarketPlace
有新嘅cola品牌登場啊，一次過出咗原味同無糖兩款口味，氣泡感強，悶熱天時飲一啖，係幾爽嘅。另外重有零卡路里嘅梳打水，下午茶時間配搭香脆小食，例如薯片、曲奇，或者朱古力等，絕對可以叉到電啊。
Godiva Domes
銷售點：7-11
Godiva又有新品，藍色同紫色嘅包裝做得幾靚，紫色嗰款係雙重朱古力脆球，藍色盒則係榛子牛奶朱古力脆球，每盒各有3粒獨立包裝。香甜脆口，中間更有粒果仁呢，口感幾豐富。
Smarties
銷售點：7-11
聰明豆唔只係細個食開嘅一粒粒，而家仲混埋入朱古力塊中，三款口味包括白朱古力、橙味朱古力、牛奶朱古力。呢個設計啱晒甜魔，一啖可以食到唔同形態嘅朱古力，由頭甜到尾。但如果怕太甜嘅朋友仔就食返原版好了。
HERSHEY’S 花生朱古力/榛子朱古力
銷售點：7-11
韓國直送嘅2款朱古力，一包有2嚿，花生朱古力仲有層蝴蝶餅同花生，甜中帶鹹仲脆卜卜，層次豐富；另一款就係外層朱古力餅，中間就fill滿榛子朱古力，一個字，甜。
3月21日更新
小島屋 - 焦糖燉蛋味雪糕蛋撻
銷售點：惠康超級市場、Market Place、3hreesixty及Jasons ichiba
好多人都鍾意食蛋撻，當蛋撻變成雪糕會係咩味？有品牌最近推出咗創新嘅焦糖燉蛋味雪糕蛋撻，喺超巿有售，引起大眾興趣。包裝係幾靚嘅，有啲懷舊冰室feel，一盒兩件。蛋撻造型嘅雪糕亦幾可亂真，撻皮係牛油蛋撻皮，係幾鬆脆嘅，開頭印象分唔錯，不過食到中間嘅雪糕就開始有啲扣分，蛋香味唔多夠，焦糖燉蛋嘅焦香同忌廉味亦欠奉，有少少似將蛋撻雪凍食嘅感覺。
3月17日更新
H.K. Lovecraft x nefelibata - Gift For her 禮盒
銷售點：H.K. Lovecraft網站 (按此)
雖然2.14同3.14都已經過咗，但要送禮物使乜講日子㗎，想送就送啦~ 本地精釀啤酒品牌H.K. Lovecraft最近聯乘小店nefelibata推出「Gift For her 禮盒」，一打開個盒就已經有陣陣花香撲鼻，原來係有塊全人手製作嘅手工制乾花擴香石啊，唔使點火就有擴香效用，重可以重複使用。另外有6罐Lager精釀啤酒，都係H.K. Lovecraft嘅常設酒款，有清爽嘅，亦有煙燻香嘅，其中2罐更係全黑冇label，可以畀你自由DIY，畫上/寫上心意圖畫字句呢，夠晒心思。
急凍小菜燉湯套餐
銷售點：7仔預購站（預購期：即日起至4月28日）
蟲草花百合雞燉湯 (右)
鹹魚蒸肉餅、紅蘿蔔豬軟骨
呢排大家多數都留家煮飯仔，餐餐又諗又買又煮都咪話唔頭痕，特別本身係地獄廚神嘅就更加嗌救命。有便利店推出咗「急凍小菜燉湯套餐」，每日新鮮製作，利用專業速冷設備將食物冷凍再真空包裝，仲可以送到屋企樓下交收，食之前簡單加熱就得，好方便。小菜選擇多樣，例如咖喱牛肋條、支竹柱候炆鴨、南乳炆豬手等都有，而古法燉湯則有淮山海底椰螺頭燉湯、蟲草花百合雞燉湯等。
3月15日更新
泰國特產水果
銷售點：阿布泰便利店ABT
阿布泰進軍便利店界喇，日前喺銅鑼灣開設第一間地舖，內有多款泰式特產，其中最受歡迎嘅包括泰國水果，好似斑蘭香椰青同埋金水仙芒果。開飯仔都買咗嚟試，廿蚊個椰青，清甜多汁，記得要刮埋啲椰肉食啊！芒果又係好甜好多汁。
Binggrae 超級甜筒
銷售點：7-11獨家發售
呢幾日啲天氣好似夏天咁熱，想搵啲雪糕食下降溫嘅，可以試下由韓國直送、最新登港嘅超級甜筒喎，150mL特大size夠晒滿足。包裝設計仲好貼心，撕得又靚又方便。4款口味包括朱古力、曲奇、雲呢嗱同埋薄荷碎朱古力，全部頂層都有特厚朱古力同曲奇/花生粒，口感豐富，而且咬到落甜筒位置都有層厚厚朱古力圍邊呢。
3月7日更新
DREYER’S 全新朱古力布朗尼雪糕
銷售點：各大超級巿場
朱古力控通常都鍾意食brownie，香甜濕潤。最近有朱古力brownie雪糕新登場，仲要係大大盒嘅家庭裝，啱晒而家成日wfh嘅朋友仔，可以一家人一齊嘆。濃甜嘅朱古力雪糕，加入咗朱古力粒同埋軟糯嘅朱古力布朗尼塊，三重朱古力享受，絕對係甜魔之選。
Watson’s Soda 乳酸味蘇打水
銷售點：各大便利店及超市、屈臣氏零售店
有時就咁飲水dry dry地，又唔想飲汽水咁肥，蘇打水係個唔錯嘅選擇，最近更有2隻新出嘅蘇打水都係標榜輕盈零負擔呢，可以放心大啖大啖飲。經典原味零糖零卡零脂肪，全新配方加入青檸味，微微澀但幾清新。另一隻係乳酸味，低糖低卡，酸酸甜甜又夠汽。
3月3日更新
7-SELECT x PABLO小熊造型芒果味芝士慕斯蛋糕
銷售點：7-11
有冇好掛住日本人氣芝士撻PABLO？有便利店同佢哋聯乘，最新推出芝士甜品呀！仲要係賣相勁cute cute嘅小熊造型芒果味芝士慕斯蛋糕。瞓咗喺度嘅熊仔好鬼治癒，真心有少少唔忍心切開佢個頭。慕絲蛋糕入口軟滑，中間仲有層芒果啫喱，甜甜地，但芝士味唔算好突出。
Häagen-Dazs 春日限定蜂蜜果漾系列
銷售點：各大便利店及超巿
呢幾日天氣開始回暖，又有藉口搵雪糕食啦~ 重要Haagen Dazs最新推出咗2款春日限定口味，以天然蜂蜜製成蜂蜜軟心醬，拌入果漾雪糕中。蜂蜜‧西柚味相對清新refresh，微酸中滲有淡淡洛神花香；至於蜂蜜．黃桃玫瑰，唔止有雪糕杯，仲有雪糕批𠻹。味道清甜，帶有好微好微嘅玫瑰花香，而雪糕批外層嘅白朱古力脆皮上更有黃桃果粒增加口感。
Sugarfina x SANRIO 香港限定春日糖果系列
銷售點：Sugarfina
呢間美國精品糖果店嘅出品，一向都勁靚。今次同Sanrio合作，推出6款Sanrio糖果小盒同2款禮盒，當然亦係相當精美，粉絲一見就愛啦。6款被選中嘅角色包括有Hello Kitty、My Melody、Kuromi、Kerokerokeroppi、Ahiru No Pekkle同Pochacco。而相應嘅糖果口味更係為角色特設，例如Hello Kitty係紅蘋果焦糖糖果，而My Melody則係粉紅拼白色珠光牛奶朱古力，好有心思。
2月25日更新
大白兔牛奶/花生牛軋糖雪條
銷售點：7-11優先發售 （開售日期：3月2日）
大白兔糖可以話係好多人嘅童年回憶，嚟緊呢個回憶重生喇！大白兔糖出雪條！連包裝都用返傳統嘅紅白藍配色，神還原呢。呢條大白兔牛奶雪條，好似粒放大版嘅大白兔糖咁，圓棒形，陣陣濃郁嘅牛奶味，不過認真，都幾甜。
另外重有款大白兔花生牛軋糖雪條，包裝設計復古。呢條同樣有濃濃嘅牛奶香，但混入埋粒粒脆口花生粒，咁就多咗重花生香味，層次豐富咗，感覺反而冇咁甜身，值得推介。
2月23日更新
雀巢 櫻花味朱古力碎士多啤梨味甜筒
銷售點：各大便利店及超巿
2月係戀愛同粉紅色嘅季節，雀巢就推出咗支深粉紅色嘅甜筒應應節。呢隻櫻花味朱古力碎士多啤梨味甜筒面頭有粒粒粉紅色嘅櫻花味朱古力碎，雪糕則係粉紅同白色扭紋相間嘅士多啤梨同雲呢嗱味，冇想像中咁甜，反而重有微微果酸，由內到外都充滿住少女心。
2月16日更新
亞玉包裝糖水
銷售點：亞玉豆腐花
喺荃灣以$3豆花以聞名嘅糖水舖，最近出咗幾款純手工製作嘅包裝糖水，畀大家可以買返屋企放心食。即開即食嘅包裝糖水，凍食又得，煮返熱先食都得，總共有芝麻糊、陳皮紅豆沙、海帶綠豆沙、喳咋同涼粉5種口味。一包大約係2人份量，開飯仔試咗芝麻糊，甜度適中，凍食比熱食更濃稠。
2月14日更新
百福 豆乳雪糕
銷售點：Circle K
細細個就聽過佢個名嘅百福豆品，一直以非基因改造嘅大豆製作多種傳統豆品，最近更推出咗全新嘅豆乳雪糕！雪糕將牛乳同豆乳混合，豆味算濃嘅都，牛乳味就相對冇咁突出，口感順滑。望望營養資料，雪糕嚟講只有113kcal都算係咁，但9.9g糖就略嫌甜咗啲啲，整體嚟講都可以一試。
KIMSOOM’S 蒜味爆脆蝦 / 芥末苿爆脆鯷魚
銷售點：7-11
韓國人氣零食到港啦~蒜味爆脆蝦同芥末味爆脆鯷魚分別由原隻海蝦同原條鯷魚脆炸而成，兩者口感都極度酥脆香口，前者真心食到啖啖鮮蝦香味，後者嘅芥末味則較重，有啲嗆口。不過細細包，唔覺唔覺打兩粒字就食晒。
Baileys 士多啤梨忌廉軟心朱古力
銷售點：7-11及各大超巿
2月係甜蜜嘅月份，絕對係一大藉口畀自己破破戒，食多啲甜嘢嘅日子。Baileys軟心朱古力口感幼滑，想再sweet啲嘅揀粉紅色包裝嘅士多啤梨味就啱晒，甜到入心。
1月31日更新
全新汽水品牌 OOHA
銷售點：自動售賣機、香港可口可樂e-shop、各大超巿及便利店（2月11日上架）
成日心思思想飲汽水，但又怕肥嘅朋友仔，有專為你哋而設嘅全新汽水品牌呀。OOHA標榜 0糖份、0卡路里、0脂肪！飲多幾罐都唔怕lu~ 暫時有3款口味，分別係柚子海鹽味、白桃烏龍茶味同荔枝乳酸味，有果香之餘更有清爽感覺。重點係，搵嚟人氣王教主Anson Lo擔任品牌大使，更推出抽獎活動，有機會得到OOHA® X Anson Lo 簽名版限量禮盒，甚至親身出席教主有份嘅宣傳活動機會呢，神徒們，good luck！
抽獎詳情：
1月27日更新
少爺x甄沾記 椰汁紅棗啤、椰汁菠蘿啤
銷售點：OK便利店
農曆新年飲新啤！本地精釀啤酒少爺再度同百年傳統椰子品牌甄沾記合作，椰汁紅棗啤加咗紅棗同甄沾記招牌椰子，無論係聞落同飲落都有紅棗甜味，之後就有焦糖香同烘烤麥芽味，加埋椰子香真係幾有紅棗年糕Feel。而椰汁菠蘿啤聞落的確都有菠蘿同椰子香，不過飲落就略嫌菠蘿味唔突出，勝在整體清爽唔苦、非常易入口。
1月24日更新
Häagen-Dazs™ Japanese Collection
銷售點：7-11、(2月9日起)日資超巿
掛住日本嘅，就食住呢幾款日版Häagen-Dazs先啦~ 3款由日本直送嘅脆皮雪糕三明治分別有抹茶朱古力心太軟、焦糖同杏仁奶油口味，其中最推介就係抹茶心太軟嗰隻啦，咬咬下真係好似心太軟咁，啲比利時朱古力軟心醬緩緩流出，可可香氣中帶有抹茶回甘。焦糖嗰隻啱甜魔，而杏仁奶油則滲有陣陣果仁香。
另外重有2款意式冰凍甜點迷你杯，口感額外軟滑，榛子牛奶味唔止有牛乳香，更突出嘅係榛果甜香；鍾意果甜嘅朋友就要試香芒熱情果味，用咗阿方索芒果同愛文芒果果蓉，食得到啲果肉𠻹啊，甜酸味道平衡有致。
雀巢黑糖波霸雪米糍
銷售點：各大便利店及超巿
雪米糍口味繼續進化，最新嘅有黑糖波霸雪米糍，期間限定㗎。黑糖味嘅雪糕中間，重有粒粒波霸珍珠，難得黑糖味香得嚟唔算好甜，不過可惜啲珍珠就軟腍咗少少。
1月10日更新
7-SELECT X HERSHEY'S聯乘系列
銷售點：7-11
HERSHEY'S呢個朱古力品牌相信大家都唔會陌生，有便利店自家品牌第一次同佢哋聯乘合作，一次過出咗多款特濃朱古力新品。最甜嘅就應該係朱古力慕絲軟心玫瑰花形蛋糕，啡色玫瑰花造型係幾靚，切開中間係有軟心朱古力餡㗎，軟滑濃甜。
朱古力忌廉千層蛋糕嘅層次較多，既有朱古力嘅甜香，亦有可可嘅甘苦同淡淡蛋香，蛋糕面層重有粒粒濃甜嘅朱古力，口感係幾豐富。
至於朱古力忌廉蜜瓜包，由包面到內餡都有朱古力，雖然甜度冇上面2款甜品咁高，但都有返咁上下，食食下有啲位重會有朱古力忌廉咇出嚟，$10個嘅價錢嚟講都算唔錯。
1月5日更新
SANRIO WITH微熱山丘鳳梨酥
銷售點：7-11獨家發售
微熱山丘嘅鳳梨酥，唔使我多介紹啦，大家都好熟悉。今次同Sanrio characters聯乘，每套都會隨機附送1款精美手挽布袋同造型匙扣，4款卡通包括Ahiru no Pekkle、布甸狗、大口仔同埋My Melody，粉絲們，祝好運咯。
KITKAT奶茶味朱古力日版
銷售點：7-11、各大超巿、日本KITKAT®朱古力新年Pop Up 店
KITKAT頻頻出新口味，今次由日本直送嘅日版奶茶朱古力味，雖然唔算好濃，但都有淡淡茶香，不過就甜咗啲咯~ 另外開心果味都係新出嘅，有淡淡嘅果仁香。
KITKAT禮盒日本版
銷售點：7-11獨家發售
就嚟新年，以往去日本買嚟做手信嘅禮盒版，而家買都啱數。呢個禮盒仲要係日本版，有最新嘅口味，包括奶茶同開心果，另外有埋牛奶朱古力、黑朱古力同綠茶，想一次過試到多幾隻口味嘅就啱晒。
HELLO KITTY法國麵包脆餅禮盒
銷售點：7-11
Hello Kitty粉見到個盒應該已經變咗bling bling眼，禮盒內有2款脆餅口味，分別係灑上脆糖粒嘅原味同塗上大蒜醬嘅蒜味。前者有陣陣奶香，後者則多咗重大蒜嘅味道，兩款都係脆卜卜，好似烘多士咁。但粉絲最關注嘅應該係禮盒會送獨家設計嘅Hello Kitty法國風格限量馬克杯呀！
HELLO KITTY肉鬆QQ餅禮盒425克
銷售點：7-11
另一款禮盒係肉鬆QQ，以台灣在地紅豆獨家秘方熬煮成蜜紅豆，搭配Q彈麻糬同埋特製台灣純正豬肉鬆，再加啲鹹香碎蛋黃等製成嘅酥香餅皮，鹹甜有致。而呢套送嘅係獨家設計限量瓷盤，好靚呢。
日清湖池屋 法式松露味、美式芝士煙肉味 薯條
銷售點：759阿信屋獨家發售
兩款全新口味嘅杯裝薯條，法式松露味初頭食個味幾濃郁，不過食食下可能習慣咗就好似冇太濃了；美式芝士煙肉味就真係有燻煙肉嘅感覺，仲有陣陣芝士香，呢隻唔錯。兩款都係極幼而又好脆口嘅薯條，一次過放幾條入口會過癮啲。
文：Kar