全球第一間老麥概念店就係金鐘海富中心地下嗰間喇，啱啱新裝修完，加咗個開放式廚房，改埋名叫McDonald’s Next，仲有幾款係得嗰間舖先食得到嘅限定食物，包括雜莓新地窩夫、自選沙律同埋頂級咖啡豆沖製嘅咖啡。
雜莓新地窩夫就集咗藍莓紅莓同黑莓嚟混醬﹐有原粒生果肉㗎，而塊窩夫外脆內軟，再淋上一層焦糖醬同埋自家雪糕新地，唔講仲以為係出面甜品舖嘅甜品添呀！
自選沙律就參考咗本身都有局部地區性推行嘅Create Your Taste自選漢堡概念，不過揀嘅唔係漢堡配料，而係沙律嘅配料，連埋醬一齊大大話話都有成19款揀㗎喂，芝士呀、意大利黑醋呀、粟米粒菠蘿粒呀咁，仲有藜麥同碎蛋小龍蝦揀！
而咖啡豆就係嚟自危地馬拉、印尼蘇門答臘同埋埃塞俄比亞嘅，飲落先有花香、後有黑朱古力香，總之就係香。
概念店嘅概念，除咗食物款式有改良之外，當然希望可以根據客人嘅需要，提供更好嘅服務啦，呢度就多咗幾部機嘞，例如自動洗手機、自助斟水機同埋自助充電設備，不過又唔係下下都機器化晒嘅，每晚6點後，就會有店員送餐服務喇，完全顛覆咗傳統快餐店乜都自己嚟嘅概念！
而旺角家樂坊地庫重新開返嘅Starbucks，係繼洗衣街同中環之後，香港嘅第3間概念店。呢間店最大嘅特色就係有一個開放式嘅Starbucks Reserve Coffee Experience Bar，咖啡控唔單止可以喺度慢僈歎佢哋杯咖啡，仲可以觀摩咖啡師如何沖調出一杯咖啡嘅全個過程，直情袋晒錢入袋啦。加上呢個bar嘅咖啡豆，仲係走訪世界各地後，珍藏嘅獨特品種，全港都係得幾間分店限量供應㗎咋！
對咖啡有少許研究嘅朋友，就肯肯定會對呢度獨有嘅咖啡機著迷喇，一款Siphon（虹吸）一款Black Eagle特濃咖啡機，兩款機都令到沖製出嚟嘅咖啡有一種難以取代嘅口感同埋濃度！
配合旺角充滿街頭表演者嘅特色，呢間舖亦都打造咗一個Community Corner，玩Live band又得，做藝術表演同搞展覽又得，相信好快就會成為文青嘅打卡之地！
圖片來源：Mc Donald’s、Starbucks Hong Kong
文：Kar
隨時接收最新資訊
讚好OpenRice專頁！
