櫻花牛油味薯片 卡樂B
薯片嚟講，已經唔再淨係得原味、燒烤味、Pizza味嘅世界，而家啲口味愈嚟愈多，之前出完蜂蜜牛油味薯片，櫻花季梗係出返櫻花牛油味應一應節嘛。不過話時話，點解一定要配牛油先？唔知喎，可能就咁得櫻花味就會太清啩。Anyway，最緊要有得食！春日限定呀！
詳情：
九州地區：即日起發售
中國、四國地區： 2月22日起發售
櫻花牛奶咖啡 雪印
人類嘅創意從來都冇停止過，櫻花唔淨止用嚟睇，仲可以飲落肚！將櫻花味加入香滑嘅牛奶同濃郁嘅咖啡度，估唔到又幾有驚喜，一啖入面口感豐富，有少少甘甘地，又有淡淡地鹹鹹地嘅櫻花味，係夾嘅。
詳情：
現於日本便利店有售
櫻花Latte、櫻花戚風蛋糕 Starbucks
將櫻花加入做飲品嘅，又點止得雪印吖？Starbucks同樣將櫻花嘅概念添進佢哋嘅飲品裡面，包括櫻花士多啤梨latte、櫻花士多啤梨Frappuccino同埋櫻花士多啤梨果肉latte ，有一層櫻花味cream喺面，再將咖啡、士多啤梨、白朱古力等等溝埋一齊，但又唔會互相搶咗啲味，很想試吧？試就要一次過試埋佢哋出嘅櫻花戚風蛋糕喇，喺鬆軟嘅蛋糕外層擠多層忌廉，面頭放多片櫻花！喂！同真‧櫻花一樣咁呃like啦！
詳情：
櫻花士多啤梨Latte、櫻花戚風蛋糕：2月15日至3月15日期間限定
櫻花士多啤梨果肉latte：2月16日開始，日本各大便利店發售
金箔櫻花酒 北岡本店
呢隻金箔櫻花酒，淨係睇個樣都贏晒。透明嘅酒樽，打直擺又得、打斜擺又得，入面有一粒粒金箔，仲要有朵櫻花喺度，日日望住都可以當賞櫻呀！呢隻酒酒色粉紅，有櫻花嘅香味，甜甜地好易入口， 而且酒味唔重，都幾啱女仔飲，不過提一提返酒精濃度都有11%㗎！
詳情：
北岡本店
櫻花啤酒 Asahi
如果有留意開嘅朋友應該都會知道，每年大概到咗呢啲時候，Asahi都會推出櫻花期間限定嘅啤酒，而今年嘅主題係「櫻之宴」。雖然味道冇咩大分別，但係個罐又真係幾靚，有時係會忍唔住手買嘅。
詳情：
即日起，日本各大便利店發售
櫻花味可樂 百事
櫻花味可樂帶嚟嘅，唔止係味覺上嘅衝擊，連視覺上都係呀！你幾時有見過支可樂係粉紫色先得㗎？冇呢？我都未！但將會見！下個月飛去日本就有得見喇！
詳情：
日本：3月8日起發售
櫻花味Red Bull
圖：blipparjapan、gigazine詳情：
即日起至4月初期間，在日本部分便利店限定發售
櫻花抹茶芭菲 辻利 京都店
圖右：markezine.jp詳情：
辻利 京都店：3月1日至4月30日期間限定發售
櫻花蛋糕 白い恋人
白い恋人變成粉い戀人啦啦啦~ 講緊嘅係櫻花季節期間嘅白い戀人，總共出咗4款櫻花味食品，我唔直接話你聽，我用相話你聽！見到未？見到未？開飯仔我就最想試過年輪蛋糕同千層酥餅皮夾住櫻花朱古力嘅美冬嘞，仲有個卷蛋同蛋糕都想試。係呀，即係全部，唔得咩？
詳情：3月1日起期間限定發售
（此文將不定期繼續更新）
文：Kar
隨時接收最新資訊
讚好OpenRice專頁！
关键字
櫻花
日本
薯片
可樂
酒
复制到剪贴板