唔知係咪因為多數香港人細個都飲過媽媽煲睯番茄湯，只要間餐廳係主打番茄湯乜乜乜，都會吸引唔少人去幫襯，勢要搵返細個飲番茄湯嗰種親切感為止。講起番茄湯，大家可能都會諗起出名嘅勝香園或者華嫂冰室，但其實坊間仲有唔少漏網之魚，就等開飯仔帶大家去發掘啦！
真.番茄專門店 蕃滿門
（圖：賴先生與屈小姐）
蕃滿門大部分食物都用番茄烹調，除咗有唔同配搭嘅番茄湯粉麵飯，亦有番茄焗飯同焗意粉，幾多選擇。呢到嘅番茄湯味道頗濃，湯內含有唔少番茄粒，而且可以加辣，再配上芝士同炒滑蛋，罪惡感即刻浮晒出嚟，唯有安慰自己食埋今餐先再減肥喇！番滿門喺大埔、元朗同大角咀都有分店，對於住新界同九龍嘅朋友都叫就腳，近近地，用嚟過吓番茄癮就啱晒。
宵夜茶記常餐 民華餐廳
茶餐廳嘅常餐一向深受大家歡迎，份量同配搭多、價錢夠平（雖然已經貴咗好多），絕對係香港最重要嘅平民美食之一。當常餐遇上番茄湯又會點呢？怕個湯會好hea底？呢度常餐嘅番茄湯超濃郁，味道唔會過酸，湯內亦有番茄件，以常餐嘅價錢食到咁嘅質素可以話係物超所值。順帶一提，民華餐廳位於旺角，開到凌晨三點，大家下次想食宵夜都可以諗諗佢喇。
當沾麵遇上番茄 漁場台風
想喺香港食到好食嘅沾麵絕對唔容易，呢間漁場台風就算係做得唔錯嘅一間。漁場台風日間只賣沾麵，夜間只賣拉麵，而兩者麵質亦有分別。想試呢到嘅魚介豚骨番茄海蝦沾麵，就要揀日間時段嚟喇。湯底嘅番茄味唔係好出，但上面佈滿櫻花蝦，而且魚介香味十足。店舖話佢地拉麵嘅份量比起其他拉麵店多1.5倍，喺香港食到呢個價錢嘅日式沾麵算係比較抵㗎喇。
屯門區小店 番茄濃湯專門店
（圖：sharontam0712、霖迪）
位於屯門西鐵站附近嘅番茄濃湯專門店，顧名思義係以番茄濃湯作為主打，平日吸引唔少區內學生、街坊幫襯。番茄濃湯味道有少少偏酸，幸好番茄味濃厚，食落口啖啖都係番茄肉，果然係真材實料。同蕃滿門一樣，番茄濃湯專門店嘅番茄湯亦可以選擇辣度。另外，唔少食客都推薦麻辣肉丸，試過先知，麻辣味同番茄湯原來係一拍即合。雖然屯門先有，但由屯門西鐵站行過去只係需要三分鍾左右，大家不妨去支持吓呢間小店啦。
用番茄蟹湯打邊爐 老坑火鍋
（圖：為食MoJil）
聽個名以為得啲老坑先會去？咁你就錯喇，老坑火鍋食嘅野一啲都唔老，仲要好貼近依家後生仔嘅口味，睇佢有呢款番茄蟹湯底就知。叫得做馳名番茄蟹湯底，當然係用料十足喇，入面有番茄、薯仔、一大隻蟹，仲有青口同蜆肉，番茄湯配上海鮮，令到湯底味道更加鮮甜。落埋手切肥牛、油炸鬼，韮菜餃等高質火鍋配料，直頭係無得輸。
自稱番茄拉麵專家 醬家
醬家全店只係供應一款番茄湯底嘅拉麵，專心一意做好一款湯底。湯底無得揀，但係配料有得揀，當中豚肉同漢堡扒亦較多人推介。講返番茄湯底，入面有番茄同洋蔥，茄味香濃而且唔油膩，做得幾好。可惜，唔少食客反映呢到嘅拉麵麵質唔似一般日本拉麵，口感唔夠彈牙，令到成碗麵扣咗少少分。
讚好OpenRice專頁！