下個星期四就係中秋節，唔單止代表秋天終於嚟，亦代表又到大閘蟹當造嘅時候啦！沙田呢間酒店嘅中菜廳今年再度推出任食大閘蟹套餐，以肥美江蘇太湖大閘蟹做主題，清蒸、得，做蟹粉小籠包，得，加黑松露，亦得，得咗！

即將喺19號開始嘅任食大閘蟹套餐有唔少傳統同創新食法，例如有最經典嘅清蒸大閘蟹，加入罕見又滋補雪燕嘅蟹肉雞茸雪燕羹。另一方面又有比較少見凍盤麯酒浸大閘蟹，即係蒸熟大閘蟹後用紹興酒、五糧醇同香料浸泡一日，有酒香加持蟹膏更甘香！

無諗到中餐館都有Fusion菜？黑松露大閘蟹呢道菜式就大膽加入西餐常用嘅矜貴食材黑松露，黑松露同大閘蟹兩者相得益彰，更濃香誘人。當然如果鐘情蟹粉嘅話，亦有最大路嘅蟹粉小籠包可以一試。

大閘蟹美食仲包括蟹粉龍躉斑球同巴馬火腿焗大閘蟹蓋等。意猶未盡嘅話，記得試埋佢地嘅創意甜品，例如甘甜清新嘅菊花薑茶雪糕，同酸甜解膩嘅話梅花雕雪葩，為呢個秋之「蟹」逅畫上甜蜜句號。

帝玉庭　滋味「蟹」逅
供應日期：2016年9月19日至11月30日
供應時間：18:00 - 22:00
*分任食套餐及單點蟹饌
查詢或訂座：2694 3939