食人腦02教室 海洋冰室
以校園鬼故做主題嘅海洋冰室，頭盤就係「異廁元牛尾湯」。校園鬼故喎，廁所梗係有份啦，打開廁所蓋，就會見到……骷顱頭鬼臉，你都咪話唔嘔心，不過，你入得嚟都係為呢啲啫。
飲完呢碗蕃茄牛尾湯，就要上bio堂喇。成副骷顱骨咁上嘅「雜錦拼盤」，有腦、腸、肝、肺、胃，仲有支茄汁畀你，想加幾多血畀佢都得。睇真啲，原來係海鮮蔬菜凍批、直布羅陀腸伴蕃茄醬、香燒雞柳、炸雞胸釀芝士同西冷牛扒。最後仲有竹炭瑞士卷同白朱古力整成嘅「鬼粉刷、粉筆」。
小鬼應該都會幾開心，因為有「鬼馬幽靈列車兒童套餐」畀佢哋呀，腸仔扮嘅斷指意粉同文具蔬菜都唔係好得人驚啫，最開心係有HaagenDazs雪糕嘛。
捉鬼敢死隊為食鬼套餐 海龍王餐廳、冰極餐廳
有睇過《捉鬼敢死隊》嘅應該會好有共嗚，帶子煙肉焗薯蓉係棉花糖鬼嘅化身，然後三揀一嘅主菜分別有菠菜海鮮酥盒、素菜香草忌廉意粉同竹炭牛肉漢堡，通通都畀隻鬼插晒旗。就連食到最後上嘅甜品，朱古力慕絲都係佢嘅經典標誌嚟，喂，唔鬼捨得食呀！
而海龍王餐廳仲有埋下午茶食添，入到去成鬼日掛住食你都唔怪得我。
隨時接收最新資訊
讚好OpenRice專頁！