【飲食潮流】M記新推4款小食即試朱古力批、黑松露shake shake薯條（有片）

2016-11-17

意大利M記出緊Nutella漢堡，之前日本M記又出過朱古力三角批，不過大家都唔使葡萄人哋，香港M記今日都有新嘢出，一樣有朱古力批，另外仲有黑松露味shake shake薯條、印度香料雞翼同新地朱古力脆，而之前過嘅北海道三文魚堡同北海道三文魚‧牛堡都有得食返呀~即刻去試新嘢先！

7蚊條朱古力批，暖暖地，脆卜卜，咬開未至於爆漿，但都有好多朱古力醬，係想像中嘅味嚟嘅，都食得過呀。

至於一向都好受歡迎嘅shake shake薯條，就新出咗黑松露味！微微拆開包粉就已經聞到好香嘅黑松露味，雖然知道不過係粉，但都依然好期待！shake完之後試啦，嗯，同期望有少少落差，黑松露味唔算太重，但就有啲鹹……

至於印度香料雞翼，表面睇佢同一隻普通嘅雞翼冇咩分別，但一食就唔同講法嘞，夠香夠辣搭多少少香料味係唔錯嘅，只係略嫌乾身咗少少。