【鼠年開飯】最強優惠新春自助餐最平6折！

一大班人新年開飯，酒店自助餐係個好選擇，唔單止有香港人最愛嘅各款新鮮海鮮同精緻甜品，而且農曆新年都會加推一系列好意頭或者以名貴食材入饌嘅中菜，咁就可以同時滿足各位長輩同小朋友。加上而家用OpenRice餐飲券或者優惠券有優惠，最平6折就食到！

6折任食即開生蠔+虎蝦　品坊

唔少朋友去食自助餐都會主攻生蠔，佐敦呢間酒店餐廳最近推出三文魚 ‧ 虎蝦 ‧ 生蠔自助晚餐，以鮮味十足嘅三文魚同虎蝦泡製出一系列菜式，再加即開生蠔、以及多款凍海鮮包括帶子、加拿大雪場蟹腳、新西蘭青口、白蜆，加上買OpenRice餐飲券有6折，要回本真係話咁易啦。

早鳥限定6折　Le Cafe　

同樣主打專人即開鮮嫩生蠔，灣仔呢間酒店嘅鼠年興旺自助餐仲會加推賀年菜式，好似發財大利年年好事（髮菜蓮藕蠔豉煲豬脷湯）、花開富貴（蟹肉蟹柳扒雙花）、包羅萬有（鮑螺片冬菇扒生菜）等等再加多款即煎糕點。不過留意返要喺1月15號前繳付全部費用先有6折呀。

養生兼養顏！　柏景餐廳　

尖沙咀呢間酒店嘅自助餐真係好啱各位孝順仔女帶爸爸媽媽去，因為係主打一系列滋補養顏、含豐富骨膠原菜式嘅「滋補 ‧ 美肌 ‧ 養生」自助餐！每位都有尊享佛跳牆一客，其他必試養生美食包括花膠頭抽炒珍菌、冰糖雪燕燉北海道4.3牛乳蛋白、桂花杞子骨膠原布甸等。

矜貴食材入饌　馬哥孛羅咖啡廳　

同樣位於尖沙咀嘅呢間酒店餐廳就推出豐盛開年自助晚餐，選用多款矜貴食材例如花膠、龍蝦、鴨掌同蟹炮製多款傳統佳餚！想補下嘅話可以食北菰鴨掌海參煲、杞子烏雞螺頭湯，想要好意頭就要食象徵「風生水起」嘅撈起啦。亦唔少得時令生蠔、龍蝦、松葉腳蟹等冰鎮海鮮。

帶小朋友玩完醫肚　豐盛閣

唔少爸爸媽媽會喺假期帶埋小朋友去馬灣玩，如果呢個新年你哋都係嘅話，可以去埋呢間酒店餐廳試下新春團年海鮮自助晚餐。供應意頭十足嘅「風生水起」雜錦蔬菜絲三文魚撈起、海皇燕窩翅、脆皮乳鴿，當然亦有多款冰鎮海鮮、刺身、壽司、甜品，畀大家望住海景慢慢嘆。

賀年菜式x花系甜品　Promenade 西餐廳

紅磡呢間酒店新年嘅「新春多滋味」海鮮自助晚餐加推多款中式美饌，包括蛋白花雕蒸軟殼蟹、蜜餞金華火腿千層餅、玫瑰海鮮醬燒乳豬等。至於女士們最愛嘅甜品就有中式嘅薑汁糖不甩、水晶燕窩燉鮮奶，同一月限定嘅花系甜品，推介薰衣草朱古力筒同櫻花天使蛋糕！

吉祥新春美食　萬麗咖啡室　

灣仔呢間酒店餐廳嘅吉祥鼠年新春自助晚餐就有首度登場嘅富貴片皮鴨、加入鮑魚嘅「風生水起」撈起沙律、「發財好市」味噌蟹籽焗蠔、「鴻運當頭」炆豬手、「笑口常開」炒蝦球、「五福臨門」滷水拼盤等，連烏龍茶朱古力蛋糕都特別有個「福」字寓意「福至」！

秋冬滋補佳餚　灣景廳　

正所謂一口鮑魚一口金，灣仔呢間酒店餐廳推出嘅「鮑魚．海參．花膠」自助晚餐採用優質嘅鮑魚、海參及花膠為主要食材，設計出鮑魚海蜇青瓜沙律、鮑魚虎蝦天使麵鮑魚海參海鮮炒飯、花膠海參炆豬蹄筋等，每位仲有鮑魚松茸瑤柱燉水鴨湯一客，等大家過個最滋補嘅新年。

文：Cathy