無論係打算出街食大餐，定喺屋企開聖誕Party，最後當然唔少得飯後甜品：聖誕蛋糕！今年唔少都好啱打卡，例如卡通人物、立體造型等等。開飯仔就幫大家精選咗以下蛋糕同甜品，畀大家聖誕佳節繼續「相機食先」。
 

FROZEN小白  Häagen-Dazs

Häagen-Dazs雪糕蛋糕系列 – 小白（$559）

呢期最紅嘅卡通當然要數到動畫電影《FROZEN 2》！今年聖誕就有立體小白雪糕蛋糕，將雪糕蛋糕變成冰雪王國，上面仲有立體嘅小白呀。而且雪糕口味仲可以喺士多啤梨、比利時朱古力、曲奇呍呢嗱等口味中任揀一款。
 

Baileys胡桃夾子　Twinkle Baker Décor

（左）胡桃夾子園（$458），（右）糖果王國（$438）

呢間蛋糕店今年就推出三款原個蛋糕同六款件裝蛋糕，最值得推介嘅一定要數到胡桃夾子園，唔單止三層高紅色胡桃夾子造型搶鏡，上面嘅朱古力甜酒牛油忌廉更糅合咗Baileys Chocolat Luxe，仲可以用滴管再加Baileys！另一款糖果王國係粉紅鹿車造型，滿足少女心。
 

夢幻純素薑餅屋　The Cakery

（左）薑餅屋蛋糕（$1,680），（右）聖誕棒棒蛋糕（$50-$70/件）

主打純素、無麩質嘅呢間甜品店今年推出相當精美嘅薑餅屋蛋糕，傳統薑餅屋加上發光嘅裝飾，下面就係招牌純素奇亞籽Daydreamer朱古力蛋糕。人少怕食唔晒亦有Cakepop，將可愛又食得嘅聖誕樹、雪人等等帶返屋企！
 

打卡立體蛋糕　Ms B's Cakery

（左）Candicane Joy（$880），（右）Christmas Taster（$65-$75/件）

呢間精品蛋糕店今年聖誕推出唔少賣相特別嘅立體蛋糕，好似Candicane Joy嘅紅白相間嘅棋盤蛋糕其實係紅菜頭、可可紅絲絨蛋糕，夾層係Jonathan 蘋果及輕牛油忌廉。而Christmas Taster就有四款唔同口味選擇，包括招牌紅菜頭紅絲絨蛋糕！
 

精緻杯子蛋糕　Sift Desserts

（左）Christmas Cupcake （$38/件），（右）Cake Popsicle（$48/件）

精緻嘅Cupcake都有唔少Fans，呢間甜品店今年就推出多款得意又精緻嘅Christmas Cupcake，係有雪人、聖誕小鹿、聖誕花圈等經典元素裝飾嘅紅絲絨、朱古力及椰絲杯子蛋糕。另一方面睇落似足雪條嘅Cake Popsicle亦有供應，為大家嘅Party增添驚喜。
 

 
童話小鎮蛋糕　DALLOYAU

（左）雪山小鎮蛋糕 （$1,088），（右）紅桑子聖誕泡芙（$58/件）

傳統樹頭蛋糕大家可能都見得多，呢間正宗法式甜品店今年就將佢重新演繹成童話一般嘅雪山小鎮蛋糕！牛油酥餅當中係一層層嘅46％純牛奶朱古力慕絲、榛子朱古力忌廉、焦糖蜂蜜乾果脆餅等。而紅桑子聖誕泡芙就變身為得意嘅迷你聖誕老人。
 

茶香法式糕點　Tea WG

（左）聖誕限定茶香法式糕點（$360/原個蛋糕，$48/件），（右）聖誕紅茶茶香馬卡龍（$120/6件）

蛋糕唔一定會膩嘅，呢個茗茶品牌就喺蛋糕中加入各款頂級茶葉，好似高級茉莉花茶茶香濃朱古力蛋糕、聖誕白茶茶茶香荔枝蛋糕等，既有聖誕氣氛又帶淡淡茶香。而聖誕限定嘅聖誕紅茶就變成紅色同白色嘅茶香馬卡龍，送禮定自私食都咁啱。
 

經典紅絲絨　Lady M

紅絲絨蛋糕（$680/原個，$68/件）

而呢間深受女士喜愛嘅精品蛋糕店就再度推出聖誕經典紅絲絨蛋糕，酒紅色嘅牛油蛋糕以可可粉為基調，豐厚濕潤。蛋糕中間加上新鮮打發嘅忌廉同忌廉芝士，令口感更幼滑輕盈。上面以糖霜、橡果、樹枝等點綴，聖誕氣氛濃厚。
 

聖誕Ryan登場　聖安娜餅屋

（左）聖誕Ryan - 3.6牛乳慕絲蛋糕（$248），（右）聖誕甜品（$26-68/件）

呢間連鎖餅店有成12款選擇！Kakao Friends Fans必買嘅就當然係聖誕Ryan蛋糕，用法國3.6牛乳製作嘅牛乳慕絲包住朱古力蛋糕、牛乳忌廉、朱古力脆層同雜果夾心，口感豐富。另外亦有唔同造型嘅慕斯蛋糕同朱古力蛋糕，總有一款啱心水。
 

濃郁比利時朱古力　A-1 Bakery

（左）聖誕禮物 - 比利時黑朱古力蛋糕（$368），（右）聖誕樹頭卷蛋- 秋田縣米粉比利時朱古力蛋糕（$178）

呢間連鎖餅店以「分享禮物」為主題，聖誕禮物蛋糕邀請日籍師傅設計，比利時朱古力淋面裡面係朱古力忌廉、60%生朱古力和朱古力海綿蛋糕。而聖誕樹頭卷蛋就用秋田縣米粉製作嘅海綿蛋糕卷住比利時朱古力忌廉、原條60%生朱古力同意大利朱古力粒，朱古力控一定滿足。

 

文：Cathy