就到聖誕節，總會覺得莫名嘅緊張~又交換禮物，又抽獎，買咩禮物次次都諗到頭爆！想送得得體又實際，最好睇得又食得？以下搜羅咗唔同嘅聖誕禮物，包你今年可以做個稱職嘅「聖誕老人」呀~

朱古力及禮盒

奢華甜蜜之選 Sugarfina®

Happy Holidays Candy Bento Box™ 糖果禮盒

呢間美國精品糖果店嘅禮盒出名奢華！聖誕倒數日曆「冬日小屋」除咗可以倒數，仲有24款唔同口味嘅糖果，好似黑朱古力海鹽焦糖、菠蘿軟糖等。而上年熱賣嘅糖果禮盒亦再次登場！內有香檳小熊軟糖、棒棒糖焦糖白朱古力等唔同口味，簡單得嚟又夠得體~

聖誕樹禮盒  Schoggi Meier

亮麗聖誕樹朱古力禮盒（10 粒裝）

呢個朱古力品牌今年推出聖誕樹造型嘅朱古力禮盒，bright bright嘅聖誕樹上，掛上食得嘅聖誕裝飾（即係朱古力~），真心靚！禮盒內有5款唔同口味嘅朱古力，如紅桑子、焦糖杏仁、香橙等，都係用瑞士原材料100%可可脂朱古力製作，味道香濃口感幼滑。

朱古力控必送 GODIVA

GODIVA 2019聖誕巧克力珠寶禮盒42顆裝 

呢間朱古力品牌今年推出唔同size嘅禮盒，最大份嘅有42粒朱古力，粒粒都唔同造型、唔同味道，最特別嘅造型莫過於「傳統聖誕蛋糕Christmas Bundt Cake」啦~當中有胡桃白朱古力、香橙黑朱古力、杏仁牛奶朱古力等，一次過食晒唔同層次嘅朱古力！

豐富聖誕禮籃 Venchi

白色聖誕禮籃；經典木製聖誕禮籃

朱古力總有種魔力會令人食唔停！呢間朱古力品牌就推出多款聖誕禮籃，大大份，有晒唔同口味嘅朱古力~今年仲有全新嘅聖誕朱古力——紅莓可可碎松露朱古力、56%黑朱古力球，無論係鍾意食帶果香嘅，定微苦嘅，都滿足到！

軟心朱古力 Lindor

好多女生都鍾意食朱古力，夠sweet嘛。Lindor軟心朱古力特別推出聖誕版，其中金色嗰盒仲有4款口味添，原味、純味、榛子同白朱古力，買嚟送禮定係派畀同學、同事都好開心。

法式奢華禮盒 JUNON

由藝人軒仔開設的餐廳品牌，一向推出嘅產品出晒名靚，今年嘅聖誕禮盒都唔例外，分「Premium」、「Deluxe」、「Holiday」三款禮盒。造型型格，暗紅嘅用色充滿神秘感，而裡面嘅禮品就更加吸引！包括法國紅酒、法國鵝肝醬、自家製曲奇、自家製法式蛋白餅等，好豐富！

麻辣蝴蝶酥   皇玥餅藝

呢間由前酒店大廚主理，主打傳統餅藝嘅舖頭，最近推出多款獨創口味嘅蝴蝶酥，其中以麻辣蝴蝶酥最為特別，混入多種唔同辣度嘅辣椒、川椒砌粒磨粉，食落初頭好似冇咩事，但慢慢就會滲出陣陣麻香，再辣落喉嚨，都咪話唔刺激；小米亦係首創口味，用上加拿大有機小米製作，煙韌有嚼勁。

傳統茶葉禮盒 福茗堂茶莊

品茗百態時尚禮盒

邊個話聖誕一定要送朱古力、曲奇！？送茶葉都不失為一個有格調嘅選擇呀~呢個茶葉品牌邀請咗有名嘅插畫師Wingki Kwok設計禮盒，時尚感十足，裡面有「潮安鳳凰單欉」、「福鼎茉莉毛峰」兩款茶葉（亦可自己選配）。同時推出以西方名畫為主題嘅Goebel禮罐，好似梵高嘅《開花杏樹》咁，結合西方藝術同傳統茶葉，如果你身邊有朋友鍾意飲茶就啱晒~

酒類

酒控必愛 Berry Bros. & Rudd

經典晚餐美酒套裝；BBR聖誕晚餐美酒套裝

聖誕佳節又點少得飲靚酒呀？呢間歷史悠久嘅酒商今年推出嘅「經典晚餐美酒套裝」，就包括香檳、氣泡酒、白酒、勃艮第紅酒，適合配搭唔同嘅前菜，啱晒聖誕party嘅happy time啦~佢哋仲推出「BBR聖誕晚餐美酒套裝」，包括6款葡萄酒同威士忌，酒鬼聚會就fit晒。

干邑界藝術品 軒尼詩

2019 UVA 限量珍藏版；經典雞尾酒特別版

軒尼詩今年推出限量珍藏版干邑，單係禮盒設計已經係件藝術品咁。採用特殊物料以呈現出躍動感，再配上金屬銅色嘅干邑，顯得特別矜貴~仲有經典雞尾酒特別版，禮盒仿傚1920年代的法國懷舊海報，飲落都特別有味道呀~

召喚葡萄酒fans CLOUDY BAY

朋友係葡萄酒fans嘅話，送呢支白葡萄酒就實冇死啦！近幾個月先首次喺香港亮相咋，夠晒新！嚟自紐西蘭名酒莊嘅2019年白葡萄酒，因為今年嘅天氣畀咗一個近乎完美嘅生長環境，葡萄生得晶瑩剔透，而釀出嚟嘅葡萄酒更加係醇厚勻和。

貼地搞鬼手工啤 友

想送得causal啲嘅話，送本土手工啤都係個唔錯嘅選擇~呢個品牌富香港feel，最近rebrand過，玩味十足！分別設有3款唔同口味嘅手工啤﹕「波友」、「發燒友」同「豬朋狗友」，各使用唔同材料、技術而釀製，同friends子打邊爐、食大排檔就fit晒啦！波友係款傳統lager，帶有柑橘香氣；發燒友混合多種啤酒花進行冷泡法釀製，滲出熱帶水果香；至於豬朋狗友，則加入芫荽、陳皮等地道材料，相當特別。

文﹕Kiko