而家啲月餅愈出愈有創意，唔搞啲花臣又點突出重圍。襯中秋仲有一個月繼續介紹唔同嘅月餅畀大家，等大家買月餅時唔使頭痕。今期有榴槤+茶/酒禮盒系列同埋新口味月餅呀～
目錄
榴槤系：
FORBIDDEN@鴻福堂 貓山王榴槤冰皮月餅
100%採用馬來西亞彭亨州嘅貓山王榴槤製作內餡，香氣濃醇，啖啖榴槤肉，紫色冰皮係用咗具有抗氧化功效嘅Super Food「巴西莓」製成添。
唯港薈 貓山王榴槤冰皮月餅
佢哋今年嘅榴槤冰皮月餅採用全新配方，於馬來西亞生產，採用大量榴槤果肉，將馬來西亞嘅貓山王榴槤果香原汁原味注入冰皮月餅中，冰皮煙靭，每一啖都係榴槤果蓉香氣。
香宮 榴槤冰皮月餅二重奏 
一盒月餅雙重滋味！柔軟嘅冰皮分別包裹住貓山王果肉或黑刺果肉製成嘅飽滿餡料，前者味道濃郁，層次豐富；後者就香甜濃厚，好似奶油咁香滑呀。
港麗酒店 迷你貓山王榴槤月餅
傳統餅皮配榴槤都一樣咁好食～首度推出嘅迷你貓山王榴槤月餅以金黃酥脆嘅曲奇餅皮包裹榴槤果肉，榴槤綿密幼滑，隱約仲滲出微微奶黃香。榴槤控想試要快手，限量300盒咋
新嘗試系：
望月 流心杏仁茶月餅
大家應該都對呢間烘焙品牌唔陌生，每年中秋都會帶畀大家驚喜！今年隆重登場嘅新品係心杏仁茶月餅，杏仁茶內餡幼滑得嚟夾雜住杏仁粒口感，杏仁香氣於酥脆嘅牛油餅皮淡淡滲出，送畀長輩都好啱。
香港維港凱悅尚萃酒店 x 北角利強記雞蛋仔 雞蛋仔月餅
雞蛋仔都可以變月餅？係呀你冇睇錯。呢間酒店同本地人氣小食店合作，推出以傳統街頭小食「雞蛋仔」同「格仔餅」為靈感嘅月餅口味，單食會係香甜濃郁嘅雞蛋仔口味，加埋附送嘅花生醬同煉奶立即變身經典格仔餅味又得，幾有趣。
Paul Lafayet 法式焦糖燉蛋/玄米茶/伯爵紅茶/麥盧卡蜂蜜月餅
呢間法式甜點品牌延續一貫法式圓月插畫主題，今年嘅月餅禮盒一盒有晒4個味，分別係濃郁雲呢拿籽香氣嘅法式焦糖燉蛋、茶香同米香交織嘅玄米茶、清雅細膩嘅伯爵紅茶，同埋甜味自然嘅麥盧卡蜂蜜，隻隻味都好吸引，人多Share每樣試少少就啱晒。
神燈海鮮酒家 金蟹皇麻糬月餅 
首先蟹仔造型夠晒鬼馬，加入大閘蟹肉再混埋大閘蟹蟹黃嘅蟹黃油醬，食落又真係幾有蟹味。中間仲要係煙韌彈牙嘅麻糬，成個感覺同配搭都好有新鮮感。限量供應300盒，想買就要快手啦！
卅二公館 菊花紅棗 / 柚子梅酒月餅
頂尖中菜館推出嘅限定月餅系列，菊花紅棗月餅散發清新花香味，搭配具有吉祥意涵的紅棗，好清新。柚子梅酒月餅其實係以餐廳招牌雞尾酒為基礎，以波本威士忌搭配琴酒，再混合梅子同柚子，帶有淡淡紫蘇香氣，層次豐富。
華點 手工奶黃酥
呢個台灣法式糕點品牌，今年首次同香港著名插畫師含蓄Humchuk合作推出中秋禮盒，手工奶黃酥特意選用經過咗28日古法紅土醃製嘅熟成鹹蛋黃，搭配法國AOP烏豆沙內餡，鬆脆嘅酥皮則採用進口天然無水奶油製成。蛋黃嘅味道又真心特別濃郁飽滿，仲有起沙嘅感覺，力推。
Royal Caviar Club 魚子醬月餅
講奢華呢款魚子醬月餅就實至名歸啦～以黃寶石Imperial Ossetra鱘魚子醬作餡料，一切開個月餅就即刻流出嚟。外層採用法國濃黑朱古力同白朱古力作為脆皮，分別配搭4款唔同口味，包括意大利黑松露、北海道芝士蛋糕、義大利草莓同馬達加斯加雲尼拿，有鹹有甜，襯托出魚子醬嘅鹹鮮香味。
茶/酒禮盒系：
JOHNNIE WALKER BLUE LABEL x 利苑 威士忌配迷你翡翠流心月餅
Johnnie Walker Blue Label同米芝蓮星級食府合作打造限定中秋節月餅禮盒，以威士忌搭配利苑自家製迷你翡翠流心月餅，清新嘅螺旋藻金翡翠蓮蓉同甘香流心蛋黃配上滑順嘅酒體，係享受啊～
Saicho x 都爹利會館 中秋茗茶月餅禮盒
氣泡茶品牌聯乘香港著名米芝蓮一星餐廳推出中秋茗茶月餅禮盒，包括皇牌流心奶黃月餅及Saicho清爽芳香嘅氣泡茶。氣泡茶帶有清新花香同果香，可以中和奶黃月餅嘅膩感。
富豪酒店 x TEA CHÂTEAU 「嘗月·茶香」中秋禮盒
一樣以茶為主題嘅中秋禮盒，禮盒包括富豪酒店迷你奶黃三色賞及TEA CHÂTEAU養生茶囊組合，茶口味包括陳皮普洱、菊花普洱及桂花烏龍，配埋奶黃濃滑嘅月餅就至適合不過。
奧比斯x癲噹x奇華x上水貨舖 限量版迎月套裝
食月餅同時都可以做慈善，奧比斯今年聯同知名本地插畫家「癲噹」、奇華餅家及上水貨舖推出一系列限定聯乘中秋禮盒，如限量版迎月套裝包兩款人氣奇華月餅、上水貨舖本地製造嘅奶醬多及鮑魚口味爆谷，仲有伯爵冷萃氣泡茶，夠晒豐富。同親朋好友共享佳節之餘，又可以向奧比斯醫護致敬，同時為全球眼疾人士送上溫暖祝福！
agnès b. CAFÉ 八月禮盒加配玫瑰大吉嶺紅茶
品牌繼續保留深受歡迎嘅經典奶皇及朱古力月餅，今年更加入全新草莓乳酪口味，細滑柔軟嘅乳酪餡料夾雜草莓乾，味道清新。附有玫瑰大吉嶺紅茶茶包作配搭，散發淡淡果香又可以消滯解膩。
文: Yanica
編：Kar
