同好友聚餐，齊齊試新店就最過癮～開飯仔每個月會搜羅各區特色新餐廳，同大家緊貼潮流打卡嘆美食，即睇邊間啱你心水～
11月更新
新派日式意大利咖啡室 Tozzo
由獲得「2024年度最佳糕餅主廚」嘅糕點師傅創辦，呢間fusion咖啡室出品有一定保證。招牌食品「Maritozzo」亦係店名由來，係一種以鬆軟法國牛油麵包製成嘅意大利風味忌廉三文治，當中包括招牌原味、日本京都抹茶、期間限定等口味。另外每日鮮製嘅意大利雪糕有8款口味輪流供應，如栗子、港式鴛鴦和柑橘等。加埋由米芝蓮餐廳ANDŌ設計嘅意大利日本風味全日菜式，選擇好豐富。
新加坡雪糕品牌 The Ice Cream & Cookie Co.
圖：無論咩天氣，雪糕都係誘人嘅甜品！呢間嚟自新加坡嘅專門店，喺當地農夫市集攤起家，以不含乳製品嘅純素材料製作創意雪糕打出名堂。店內提供Blue Cheese Pear、Mango Mochi等口味，而招牌雪糕三文治係用2塊曲奇夾住大大球雪糕，厚身足料夠晒爽。同場仲有布朗尼、咖啡特飲等，喺附近行完街relax吓都唔錯。
典雅風現代歐陸餐廳 Landau's
呢間今個月即將開幕嘅現代歐陸餐廳，店內分為兩個風格迥異、氛圍獨特嘅用餐空間：Bar & Grill氣氛輕鬆寫意，適合休閒聚會；Dining Room則走典雅風格，好啱約會或慶祝重要日子。餐牌主打融合現代歐洲風味同創新烹飪技巧炮製嘅料理，扒類、特色海鮮、各種啤酒、雞尾酒同上等葡萄酒都一一供應。
10月更新
Oppa主理手工意粉 PECORINO
圖：最近韓廚因人氣節目「黑白大廚」而備受關注，唔知上環呢間由Oppa主理嘅意式餐廳啱唔啱你呢？由韓國團隊製作嘅手工意粉同Pizza係呢度嘅招牌菜，半開放式廚房可以睇到師傅嘅烹調過程𠻹。黑松露肉醬手工意粉、芝士意大利雲吞、意大利豬肉腸薄餅等配cocktail，加上簡約文青風裝潢，氣氛幾chill㗎。
典雅西班牙菜館 1862 BAR DE TAPAS Y VINO
圖：位於大館內、佔地2,000呎嘅西班牙餐廳，設計配合大樓19世紀維多利亞式建築物風格，加入英式古典元素，如磚石結構、拱門等，華麗又有神秘感。菜式則以西班牙中北部沿海地區嘅海鮮為主，包括招牌西班牙海鮮飯、烤加利西亞地區原條章魚腿、低溫慢烤西班牙乳豬等，而甜品必試肉桂捲雪糕三文治！
人氣歐式烘焙店 Bakehouse
新分店開到東涌，仲用埋該區特產製作新店獨家烘焙品！大澳蝦籽卷加入大澳益昌號招牌名物，將生炒天然蝦籽配上甜醬油，脆口惹味。另外奶茶蜂蜜丹麥酥多士同提拉米蘇軟雪糕都係東涌店限定，前者以自家製蜂蜜牛油浸泡丹麥酥，融合港式奶茶味奶油；後者則以意大利軟芝士雪糕為基底，插上用招牌冷萃咖啡浸泡過嘅手指餅乾，再灑上可可粉，風味獨特～
9月更新
越南法包×咖啡 NON CAFE
圖：由越籍夫婦經營嘅休閒風文青cafe，以純白色同米色藤椅做設計主軸，加埋落地大玻璃好relax。而menu就大玩越南style，越南扎肉法包除咗可以單點，仲可以變成全日早餐；另外仲有河內蛋咖啡、越南滴漏煉奶咖啡、椰子雪糕咖啡、牛油果沙冰配椰子雪糕等選擇，weekend嚟chill吓啱晒。
主打奶昔、窩夫 SHAKE!T
圖：呢間飲品小食外賣店，標榜用新鮮水果製作奶昔，仲會fusion中式茶飲，幾有創意，如桂花黃桃奶昔、甜蜜18度蜜瓜奶昔、澳洲牛油果奶昔、花生醬奶昔等，而且每款都有充滿咬口嘅配料，用料十足。小食就以窩夫為主，包括土耳其無花果窩夫、巴馬火腿芝士窩夫等，鹹甜口味都有。
海鮮主題餐廳 ONDA
月初新開嘅地中海餐廳，由名廚Sergio Landi創辦，主打一系列特色海鮮料理。新鮮刺身到熱食都有選擇，好似加入鹽、胡椒等調味嘅意大利粉紅蝦、爽口嘅意式鯷魚露油醋汁煮青口、擺盤海星形狀嘅「有機三文魚配紅莓和三文魚子」等；如果好幾個人聚餐，蠍子魚番茄圓筒意粉好啱開心share。
8月更新
波蘭式軟雪糕 10/10 Ice Cream & Desserts
圖：軟雪糕可以轉幾多個圈？呢間傳統波蘭軟雪糕店就大約轉到7至8個圈喇，而且圏數多係當地軟雪糕嘅特色。小店由波蘭小伙子開設，佢特別喺意大利採購原材料同軟雪糕機𠻹。現時軟雪糕有雲呢拿同朱古力味，奶香濃郁；豐富啲則有配100%紐西蘭蜂巢、Bueno脆餅朱古力醬等口味。如果想方便share食，以雲呢拿雪糕做基底嘅3球或6球盒裝就啱你喇。
海景雪糕店 Milk & Cream
好Chill咁食雪糕～呢個品牌藏身於集團旗下一間多國菜酒吧餐廳，有維港海景相伴，日與夜都咁有relax。主打嘅澳式無添加手工雪糕有12款口味，經典同創意款式都有，而且選用澳洲全脂牛奶同新鮮水果製作，坊間少見嘅蜜桃梅爾芭味最有特色，靈感嚟自經典法式甜品㗎。另外沖繩黑糖抹茶、黑芝麻、海鹽焦糖花生、法式檸檬酸忌廉、藍莓芝士蛋糕等都值得一試。
本地人氣素食品牌 素年
圖：有特色嘅素食，都會吸引愛肉食嘅朋友仔，好似呢間最近打入港島喇～佢嘅菜品口味大眾化，以本地蔬菜炮製餐點，好似「十九幾種蔬菜有機本地野菌全日早餐」就可以一口氣食勻多款時蔬；另外青醬Pizza都有加入香港農場出品嘅新鮮食材。而招牌之一嘅「不可能芝士漢堡」都可以喺新店食到。
7月更新
印度土邦宮廷菜 Prince and the Peacock
主打印度土邦宮廷菜嘅餐廳，位於大館中央裁判司署二樓，由外至內都充滿歷史感覺。主用餐空間靈感嚟自土邦皇公瑪哈拉賈嘅服飾，又融合傳統印度頭飾同和織物嘅寶石色調，裝潢華麗舒適。菜餚由$38至$238不等，包括招牌菜Patti Samosa、煎烤到香噴噴嘅Chapli Kebab。而超過500年歷史嘅甜品Rose Kulfi，係加入藏紅花、玫瑰花瓣同開心果製成嘅凍奶霜。
幅古雅字畫×江南菜 弘文館
餐館聚集四位經驗豐富嘅名廚，以傳統⼿法炮製一系列江南菜，而中國四⼤古典菜系之⼀嘅淮揚菜，集泰州、揚州、淮安、上海等風味，如淮揚清燉獅⼦頭、酒香鰣⿂、宮廷稻草扎⾁等。當中宮廷稻草扎⾁，更選用泰州⿊豬腩⾁配上獨家醃製嘅泰州春菜，相當有特色。店內同⾓落都添置出自名⼈⼿筆嘅字畫珍藏同精緻盆景，環境風雅有格調。
酒吧+Pizza 208 ITALIAN
坐擁兩層空間嘅意大利菜館，地面設有酒吧同私人廂房，一樓則設有正宗薄餅烤爐，各有氛圍。而當地主廚將南北部菜式融入菜單，帶嚟多元化口味，例如傳統手工意大利雲吞、麵包煮海鮮湯、意式香腸馬鈴薯薄餅等。而11吋薄餅嘅麵糰經過48小時兩次發酵過程，批邊脹卜卜，口感輕盈，係必食菜式啊～
6月更新
日本鰻魚專門店 鰻の成瀬
圖：鰻魚控注意～呢間喺日本多達170間分店嘅鰻魚專門店，已經登陸香港喇！外賣形式有4個size，其中最大份嘅「松」用上一整條鰻魚，如果驚食唔晒可以揀「梅」，都有半條鰻魚㗎。要食到日本風味，可以跟建議食法：先試原味鰻魚汁，再點芥末，最後灑辛香山椒粉，鰻魚嘅鮮甜就會愈來愈突出。另外單買鰻魚，或試鰻魚玉城燒、玉子燒加餸都唔錯。
雞白湯拉麵 マヌル屋
圖：呢間拉麵小店由日本人主理，只有吧枱座位，好有日本氛圍。店家標榜用11個鐘熬煮招牌雞白湯湯底，好多網民都話鮮味濃郁，仲有原味、黑蒜同辣味噌口味畀你揀，而且落單後會將碗預熱以保持湯嘅熱度𠻹。拉麵配上慢煮雞胸、烘烤過嘅雞叉燒，帶出唔同嘅鮮味。
香蕉煎餅小店回歸 香蕉仔
元朗有唔少掃街之選，而呢間小店獨沽一味憑住香蕉煎餅打出名堂，繼上年年頭宣布結業後，終於喺同區重開！餐牌同舊店大同小異，除咗有齊鹹甜口味，如開心果、榛子醬、阿華田、芝士肉鬆等等，仲有新口味焦糖脆餅𠻹～煎餅外脆內煙韌，配埋邪惡醬汁同軟熟嘅香蕉，的確係comfort food！留意由搓麵糰到煎製過程都係即叫即製，所以order後要耐心等待，開飯仔喺剛開門近1個鐘內幫襯，都要等上1個鐘先食到，想食嘅朋友仔記得要預留時間喇。
5月更新
娛樂體驗主題酒吧 LIPS Cocktails & Theatre
有魔術表演、棟篤笑、DJ表演等節目，咪以為去咗文化中心，其實係灣仔一間酒店嘅主題酒吧。店內以寶藍色做主調，帶點神秘感，每晚有唔同類型嘅演出，充滿娛樂氣氛。佢嘅創意雞尾酒都好有特色，其中Catch Me If You Can嘅香味氣泡，店員會由高處放下，客人要自己用酒杯接住；另外帶辣味嘅Spicy Blue則即席加上冧酒再點火，打卡100分。配埋鹹甜輕食包括芝士煙肉紅椒薯餅、迷你閃電泡芙拼盤等，飲吓食吓好relax。
台港夫婦主理 台蔡滷肉飯
圖：荃灣一由台港夫婦主理嘅人氣台灣菜館，2024年入圍米芝蓮推介，可見出品有一定水準。佢最近逆市擴張，喺大角咀開新分店，餐牌暫時同荃灣本店相若，一樣有招牌滷肉飯、九層塔鹽酥雞、芋泥燒排骨等風味菜式。必食嘅滷肉飯用4小時炮製，淨係炒辛香料都要20至30分鐘，每一啖都係心機嚟啊～
古蹟×意大利菜 Sophia Loren Pizzeria 
/ Casa Sophia Loren
圖：灣仔地標之一嘅百年古蹟，最近由一間意大利餐廳品牌進場，兩層分別供應唔同類型嘅拿坡里菜，地面係薄餅餐館，一樓就主打海鮮料理嘅西餐廳，可以品嚐招牌小龍蝦他他配鵝肝、意式炸油甘魚配燒洋薊及龍蒿醬等特色菜。如果想chill啲，一樓有露台座位，加上藍白色調同優雅風裝潢，都幾浪漫㗎。
4月更新
老牌滷水店副線 榕基海南雞
圖：餐廳（FB）
大埔有32年歷史嘅街坊滷水店，自幾年前由90後年輕一輩接手，一直推出唔少創新菜式，深受街坊歡迎。今個月更喺大圍開設全新副線，主打嫩滑海南雞，仲有新加坡喇沙同特色咖啡飲。另外亦將部分總店菜式帶到新店，包括滷水豬頸肉、滷水牛三寶等。
聯和墟毛孩友善Cafe WAKE UP Bistro
圖：三級歷史建築聯和市場活化後進駐唔少新店，當中就有呢間寵物友善café。裝潢走簡約路線，如保留白色主調，讓食客更容易感受昔日情懷；戶外座位仲可以帶同毛孩入座，一齊chill吓！師傅以本地時令有機蔬菜炮製多國菜，包括低溫雞肉紫薯沙律、三重芝士薄餅、烤美國安格斯肉眼扒等。
韓國過江龍 Samsam삼삼뼈국
圖：餐廳（IG）、Ace hk
呢間韓國fusion餐廳喺東大門受遊客同當地人歡迎，而家終於唔使飛，喺香港都食到喇！必食招牌名物土豆脊骨湯，分別有清湯同辣味選擇，湯底以骨頭慢火熬煮至濃郁奶白色，並用香菜調味，加埋軟腍嘅脊骨肉，好惹味啊！番茄羅勒燉豬脊骨都係推介菜式之一，配埋意大利麵、薯條同麵包，絕對係醫肚之選。仲有其他韓式燒肉、刀削麵、豬肉煎餅等，選擇好豐富～
3月更新
慢煮精緻西餐 紅館
圖：原區搬舖後，餐廳大咗，裝潢優雅得嚟帶少少文青感覺，無論係閨密聚會或約會都好啱feel。餐廳由法國藍帶主廚主理，供應招牌慢煮料理配自家製醬汁外，亦有特色薑母鴨、澳洲M8和牛他他、孜然羊串等鮮味同香口料理，照顧唔同食客口味。
韓系佐酒菜 韓大叔大排檔
圖：以韓大排檔為題嘅餐館，菜式比「大排檔」精緻，可以食到包括醬油蟹、醬油鮑魚同醬油蝦嘅醬油拼盤，啖啖都係鮮味。另外韓式煎餅、炸雞、人參雞湯等風味料理都一樣有供應。而店內放滿啤酒樽、當地食材等作佈置，成陣韓風出晒嚟呀！
摩登泰國菜 SO! BangKok Thai Eatery & Desserts
圖：呢間裝潢時尚嘅泰國菜館，室內樓底高，以橙色作主調，設有特色石牆等佈置，而戶外兩排座位就採用露營為題，氣氛chill爆，好啱一班friend嚟聚餐。而餐點融入西式元素，例如有冬蔭功海鮮乾炒意粉、泰式涼拌煙三文魚等。另外各種咖喱、燒物佐酒一流。
2月更新
鰂魚涌手工純素烘焙店 Maya Bakery & Bar
新年食得豐富有罪惡感？呢間手工純素烘焙店可能幫到你，品牌標榜以天然食材製作港西Fusion糕點、麵包同茶點，其中招牌純素蛋撻、班蘭菠蘿包同開心果牛角包都係必試款式。另外西式口味都一樣有供應，純素發酵忌廉芝士、蘑菇發酵松露忌廉芝士酸種麵包就啱晒芝士控喇。飲品方面除咗濃縮咖啡康普茶等咖啡或健康飲品，亦有Honeybee Gin Tea等酒類飲品。
台灣過江品牌 胖老爹美式炸雞
圖：品牌（FB）、為食肥寶
由台灣過江嘅炸雞店唔一定係台式風味嘅，呢間外賣店就主打美式風味喇～佢嘅炸雞標榜即點即炸，落單後要等大約20分鐘或以上。炸雞沾上自家調配嘅醃漬粉、炸粉厚薄適中，入口香脆又有美式奶香風味，而鍾意食雞翼嘅朋友重可以揀全翼𠻹。配埋波霸花枝丸、台灣直送甜不辣等小食，外賣都可以好豐富。
西環葡萄酒主題小酒館 Crushed Wine Bar
酒友bookmark～由雙層葡萄酒零售店轉型為Wine Bar概念小酒館，酒香四溢嘅感覺特別chill。餐廳主打嘅3杯/5杯葡萄酒品酒套餐只需$180起，CP值幾高。而菜式創作靈感則以各種農產品，例如充滿創意嘅辣椒黑朱古力伴茄子。店家亦會提供wine pairing建議，好似烤韭葱伴杏仁蒜蓉泥可配質感豐富嘅Luddite Saboteur白酒；特色花生醬批就同Guthrie Family Wines Heirloom Grenache紅酒幾夾。
1月更新
北海道起家創意拉麵 竹麓拉麵
拉麵有幾多款口味？呢間拉麵店自1996年喺北海道開業至今，就創作多達500款拉麵喇～不過嚟到香港先以3款招牌拉麵同大家見面，包括九州豚頭背脂拉麵、和牛鹽風拉麵同名古屋雞湯拉麵。其中和牛鹽風拉麵唔只配上低溫慢煮鹿兒島A5福永和牛牛肋肉，連湯頭都加入日本產牛筋慢火煮熬，鮮味突出。
平鐵牛扒副線新分店 研香
由賣牛扒到到賣中式糖水都大受歡迎嘅品牌，今次約1,800呎嘅新分店，增設嘅甜品同飲品都加入西式元素！人氣嘅開心果露豆腐花就有新拍檔喇，包括開心果梳乎厘、開心果Latte等；另外亦照顧大眾口味，供應意大利芝士蛋糕同草莓味梳乎厘。而飲品重有「啜豆花」系列，以及競賽級咖啡𠻹，選擇多好多呀～
日本高質吉列豬扒 とんかつ専門店 宴美豚
圖：嚟自日本嘅高質吉列豬品牌，以日本店嘅秘製配方，將北海道四元豚炸至金黃酥脆，食落香脆又juicy；客人重可以自行研磨芝麻製成個人風味嘅醬汁，令吉列豬更加惹味。而定食配搭清新椰菜可以免費追加，好解油膩感。而豬肉以外，吉列宮崎和牛石燒、宮崎和牛野菜火鍋、黑炭咖喱等都係唔錯嘅選擇。
文：Cathy
