《香港澳門米芝蓮指南2025》必比登推介正式名單合共77間餐廳，香港佔66間，澳門就有11間，當中有10間係新上榜，包括掃街小食、地中海菜、小籠包等食品，而大多數都位於香港港島區，即睇呢幾間新上榜餐廳有咩過人之處啦~
目錄
香港 - 港島區
風味台灣菜小店 ART & TASTE
圖：人氣台灣菜餐廳「吃什麼」結業後，其中一位老闆同原有嘅廚房團隊共同開設呢間餐廳，繼續供應風味十足嘅台灣菜～其中米芝蓮推介湯頭香濃嘅「外省牛肉麵」，麵條富彈性，仲建議大家選擇半筋半肉，前者軟腍入味，後者帶有肉香。另外台灣小吃不妨試試「起司蛋餅」，雞蛋同芝士嘅香氣好融和。
潮州私房菜 潮家宴
圖：amy_zzz
餐廳現時主打私房菜，當中較著重特色潮州菜，亦有鮑魚、花膠等高質海味料理，提供單點同套餐選擇。好似滷水獅頭鵝採用潮汕地區嘅鵝，滷得入味香口，而粉糯香膄嘅鵝肝亦值得一試。另外唔少食客都會點招牌鹹菜胡椒豬肚湯，湯水乳白色，辛香同酸香平衡得恰到好處，而家嘅天氣都啱飲。另外蝦棗、蘿蔔薄餅、豉油王鳝球等小菜都相當惹味。
實力潮州菜+廣東菜 阿鴻小吃 
呢個餐廳品牌於2003年創立，曾經攞過米芝蓮一星，上年選址銅鑼灣重開就火速打入必比登推介，或者因為擁有超過50年經驗嘅老闆兼主廚，仍然不斷同自己講「一定要不停進步」（訪問詳情按此）。再次獲得推介，鴻師傅就話：「隨緣感恩，各位20多年支持，人間有情。」餐廳供應潮州菜同廣東菜，打冷、滷水、素鵝、南乳粗齋等一應俱全。米芝蓮指南介紹呢度嘅鵝片肉香濃郁，脂肪較薄；仲有招牌菜之一「阿鴻炒飯」上菜時鑊氣十足，鵝肉、XO醬、櫻花蝦等帶嚟豐富口感。
地中海海岸美食 JUNO 
圖：餐廳由曾經喺世界各地工作過嘅巴塞隆拿主廚Jordi Vallés Claverol開設，以地中海海岸美食俘擄大家。南法風味炭烤鱸魚嘅火候同調味配搭得宜，皮脆肉嫩，係招牌菜之一。另外西班牙紅蝦短麵都好鮮味，中空嘅短麵吸滿用番茄、龍蝦等煮成嘅湯汁，令人好滿足。仲有自製嘅迷迭香意大利麵包好鬆軟，同炭烤甜椒等小食係絕配啊。
三代相傳港式臘味糯米飯 強記美食
圖：由路邊攤起家嘅小店傳到第三代喇，佢嘅臘味糯米飯陪伴唔少街坊成長，糯米飯粒粒分明，油潤有彈性，配搭膶腸鴨肝味道香濃又惹味，米芝蓮指南建議大家揀鴛鴦腸，同時品嚐兩種風味。另外煎蝦米腸粉、花生旺菜豬骨粥等都係值得一試嘅「街頭美食」啊。
手工拉麵小籠包 lulu BAOBAO
圖：餐廳嘅廚房設有一大片玻璃，食客可以睇到師傅製作拉麵同包點嘅過程。餐單設計畀人年輕嘅感覺，好似「CLS三代同堂蝦蝦蝦麵」就一碗有齊櫻花蝦、鮮蝦同大量蝦籽，視覺同香氣都幾震撼！如果鍾意清新口味，可以跟米芝蓮推薦試「溫柔」蔥油拌麵，手工麵條充滿嚼勁，簡單以蔥油作主要調味都香氣十足。招牌小籠包則內餡飽滿多汁，一齊食好有飽足感。
香港 - 九龍區
黑芝麻主題甜品 暖心芝作
圖：以石磨即場將黑芝麻研磨成糊，再製作芝麻糊、雪糕、流心布甸、豆漿等甜品同小食。其中經典嘅黑芝麻菲林卷口感軟糯，香氣濃郁，係指南大力推薦嘅款式。 店家更發文表示：「真係好大嘅驚喜，（米芝蓮評審）幾時試咗我哋嘅食物完全都唔知道🙈🙈🙈 謝謝米芝蓮神秘評審員喜歡我哋嘅芝麻食療😘😘辛苦啦⋯每日多位同事嘅用心製作，仲有多謝晒一直支持我哋嘅fans。」
泰式大排檔主題 泰排檔
圖：大廚本身喺米芝蓮泰菜Samsen出身，而家更憑實力獲得必比登推介𠻹！餐廳採用泰式大排檔主題，自然供應唔少鑊氣小菜、佐酒美食～指南推薦嘅醉貓炒河，麵條帶焦香，鹹辣中帶點微甜，仲有陣陣雞蛋同打拋葉嘅香氣，層次豐富。而和牛船麵則以傳統豬骨湯底加入豬紅，再添熱湯將和牛稍為燙熟，都幾受歡迎㗎。
香港 - 新界區
主打泰式香蕉煎餅 香蕉仔
圖：自2019年開店就受歡迎嘅香蕉煎餅小店，2024年重開後一直受大家捧場，佢嘅香蕉煎餅提供多種人氣口味，包括招牌香蕉、芝士豬肉鬆、開心果麻糬等。煎餅即點即做，外脆內軟，香甜嘅香蕉肉令人食指大動，好啱tea time或掃街時過吓口癮～
澳門
精緻南北印度美食 Justindia 印象派
圖：餐廳（IG）
餐廳主廚嚟自南印度，曾經喺澳門知名印度餐廳任職十多年，經驗豐富。小巧嘅餐室掛上代表印度各個城市嘅畫作，充滿異國風情。南北印度美食由午市開始供應，好似塔利套餐就有麵包或米飯、咖喱、泡菜、酸奶同甜點。晚市則提供單點菜單，以及精緻嘅十道菜嘗味套餐，其中喀拉拉和牛就係主廚以印度山城卡塔帕納為靈感嘅菜式，融合卡塔帕納風乾牛肉同澳洲和牛，以豆蔻、黑胡椒、茴香籽同咖喱葉調味，再用椰子油慢煮而成。
完整名單
文：Cathy
