手快有手慢無呀！OpenRice Pay推出限時優惠，現時於任何一間接受OpenRice Pay付款嘅餐廳單一消費滿$400，以OpenRice Pay堂食結賬時，輸入優惠碼「PAY60」即減$60。而且有好多間餐廳都係香港人至愛嘅日本菜，包括日式居酒屋、拉麵店同Omakase都有，真係超抵食！推廣期由即日起至10月31日，每日名額100個，先到先得，每名OpenRice用戶可享最多2次優惠～溫馨提示，用OpenRice Pay堂食結賬時，都可以使用以AlipayHK或 Tap & Go Mastercard卡領取嘅消費券，更可與上述優惠同時使用，實行折上折！

鳥棲日本料理 (觀塘) 

觀塘工廈一向都好多美食，呢間日式居酒屋環境舒適，全部都係沙發凳，可以坐得舒舒服服咁享用美食！食物選擇好多樣化，原條鰻魚炒飯鰻魚肉厚有魚油香，醬汁香甜惹味，配埋炒得乾身嘅炒飯真係一流。牛肉他他燒都係另一驚喜之作，油脂豐富細膩，帶有陣陣炙燒香氣，點埋酸酸地嘅汁食，愈食愈開胃。

百年食堂 (觀塘)

店舖細細嘅日本菜，同樣供應多款日式料理～想食好啲可以試下澳洲龍蝦金箔刺身配上象拔蚌刺身，兩款都彈牙鮮甜，食得出好新鮮。仲有招牌脆皮豬手，外皮鬆脆，肉味都好香濃，值得一試！清酒煮蜆都推介，蜆肉肉質彈牙，最精華係個蜆湯，好鮮甜，飲晒成碗都無問題！

阿久根和牛拉麵屋 (旺角/佐敦) 

以日式叉燒為主要配料，餐廳特別選用A4和牛西冷做主打，慢煮A4和牛·雞白湯沾麵，西冷和牛醃製後低溫慢煮8個鐘，食落嫩滑Juicy，有入口即溶感而肉味濃郁。雞白湯用日本鹿兒島走地薩摩雞加少量豬骨熬成，奶白色沾湯濃稠香滑，用嚟沾麵好掛汁～唔想食沾麵都有拉麵揀，香煎虎蝦拉麵湯底好香蝦味，鮮中帶鹹香，虎蝦都好大隻彈牙。

雲壽司 (銅鑼灣/中環)

呢間平民壽司店價錢親民之餘質素仲幾高，由前米芝蓮推薦餐廳嘅壽司師傅班底開設，走平價路線。不過平得嚟仍然堅持選用日本出名嘅新鮮食材～午晚市廚師發辦同價，分三個等級，由最平$380到最貴都只係$680。$380翔套餐包括10件壽司同一條手卷，而$680吟套餐就有7款刺身、7件壽司同一條手卷，供應最時令食材如拖羅、深海池魚同伊佐木等，CP值好高！

居食屋「和民」 (全線分店) 

連鎖日式居酒屋，食品性價比高，而且食物選擇多樣化，啱晒咩都想食啲嘅朋友，適合朋友聚會。鹿兒島和牛壽喜燒係人氣料理，牛肉油脂豐富，入口有微微溶化嘅感覺，其他配菜如豆腐、菜、金菇同粉絲等都吸收晒湯底香甜！其他菜式如香烤芝士年糕、石鍋黑椒牛肉飯同鰻魚厚燒玉子都係人氣之選～