各路英雄你好，能夠喺OpenRice呢片英雄地同大家相遇，並唔純粹係一種緣份，亦係一種安排。介紹返先，在下拉麵哥，平時用唱歌掩飾自己真正吃貨身份，經常被朋友或粉絲質問又去邊食嘢好唔好食，指責時常深夜放毒，甚至人身攻擊，咒罵竟有如此食極唔肥嘅人。所以，我決定喺呢度，暴露我真正身份，帶住西面精神，走訪全港大小區分，搞返壇《west口west臉eat好west - 香港篇》，公諸同好。

Good things takes time，#west口west臉eat好west - 香港篇，真心唔易做。聽日開始洗你版，同大家慢慢玩。 ––——–—— -RamenGorRating💯 In RamenGor we trust! 公平公開公正嘅拉麵哥評分標準。分為五個級別： 🍜 Optional 🍜🍜 CAN try 🍜🍜🍜 SHOULD try 🍜🍜🍜🍜 MUST try 🍜🍜🍜🍜🍜 Amazing! 及隱藏級別 🍜🍜🍜🍜🍜🍜 Wow!! 本著不報導低質或普通貨色嘅宗旨，得到🍜同🍜🍜嘅餐廳雖佔大多數，但絶不是廢，請放心食用。能夠得到更高分數嘅，代表真係有過特獨特之處，足以令人懷念，感嘆造物主之美，領悟存在的意義 。 –——–—— -主題 #wmwf香港篇 將以三款主題劃分，分別為 "地區篇" (e.g.中環/大埔/尖沙咀)，"菜式篇"(e.g.日本菜/泰國菜)和"系列篇" (e.g. 拉麵/燒味)。當中以"地區篇" 最tricky。譬如我唔會喺"中環篇"一次過出曬三十間中環嘅餐廳，大部分都會被分配到"菜式篇"或"系列篇"再作介紹。所以紅磡嘅米線店唔會於"紅磡篇"出現，而於"米線篇"我就會補返"紅磡篇"嘅hashtag。此乃避免重複之策。 最後希望大家明白，如果你覺得我喺度放嘢食相癮大家，我係引導大家了解享受美食係一種高尚嘅情操。其實同音樂行業一樣，只要你明白筒中嘅審美標準，慢慢就識聽識分好與壞，自然能從優秀中發掘更多樂趣。

A post shared by #West口west臉eat好west😒 (@souljasexy) on Jun 29, 2017 at 9:10pm PDT

我選擇由最最basic開始。食粥食飯都未夠down to earth，打頭陣嘅，係層次跳升變化多端嘅bakery系列。由今日開始對食包諸多要求！

1. 品穀

網媒嘅威力係可以好強大，但無論係被追捧嘅人氣店，星級推介嘅米芝蓮，好評如潮嘅隱世店，或者係寂寂無名嘅小店，始終相信自己嘅舌頭才是重要。呢間品穀，我喺佢剛剛開張唔多旺嘅時候已經試過，根據往績，呢條隊值得排！還幸我早來，好快就有得入舖，揀咗紅苺貝果，伯爵奶茶包，冧酒提子同英式鬆餅四款。當中有記憶點嘅係後兩款。冧酒提子做到甜酒味縈繞口腔不散，呢個包身有啲料到。英式鬆餅亦都好食。店家有好多款麵包以分時段推出，大家如果想去就自己check it out。

🉐RamenGorRating -- 🍜 Optional

2. Bread, Espresso &

來自表參道嘅人氣麵包店，13/3當日香港分店開張，我去排完品榖之後就去咗排佢，走在潮流尖端，一嚐佢哋三點出爐嘅French toast。我想講嘅係，我feel到所有排緊隊嘅人，都係網上嘅專業foodie。點解feel到？總之嗰個人做緊一樣嘢，但係又好唔專心咁，例如係睇餐牌嘅時候放空，嗰個就係foodie! 又或者當有其他人用手機影人龍照嘅時候，佢哋係會迴避嘅(我都有迴避)，嗰啲都係foodie! 又或者手持武器📷，揸大炮拎腳架，嗰啲實係foodie。

我感覺就似係盲衝衝入去一個試食活動，入到去咁多位foodies聚首一堂排排坐食French toast，係有少少唔自在。一嚟，我未試過置身於呢個pool之中(其實帶點興奮而靦腆)，二嚟，全場好似得我係一支公嚟…

入正題，此French toast不同彼French toast，在於外身很脆而富焦香，內身卻似燉蛋或梳乎厘。後來老闆出咗嚟同我打招呼，仲解釋多士係用咗牛奶，雞蛋同忌廉浸過夜，再入焗爐，然後唔記得咗點解負荷唔到所以只能夠一日做三十份。我相信如果你係looking for一件傳統多士，佢未必係你杯茶。但佢一定會有很多佢嘅支持者，因為一隻字，特別。

另外佢哋嘅法式方包係幾值得mention嘅。老實講，幾unexpectedly好食。平凡嘅方包，包身充滿奶香，口感比起其他方包spongy，感覺挺豐盈的。如果我又想食方包的話，我會想起你。

🉐RamenGorRating -- 🍜🍜CAN try

3. Proof

慕名而來的一家麵包店，high expectations, overall not disappointed!  由最好講起。

<Hot crossed bun>
又係已經試左兩款但係仍死心不息要食多個嘅same old case，然後又係反而追加嘅最好。一層薄薄的楓糖漿搽於表面，配合連內裡亦甜甜的，口感一流的麵包，仲要包內唔係只得提子乾咁膚淺，而有不同dried fruits+citrus peels，令麵包多了份juiciness。我宣佈，今次bakery series，你贏！

<Carrot muffin with cream cheese>
拎上手已經略知，此muffin非池中物。呢個muffin正在兩點。一，密度同濕潤度合適，以致質感好，二，面頭淡滑的cream cheese與蛋糕很配。成件事食完亦全無負擔，係有想encore嘅衝動。

<Cinnamon roll>
山長水遠走嚟跑馬地，就係衝住呢個cinnamon roll而來。人哋話best cinnamon roll in town，我無得唔太大expectation啦。其實係好食嘅，幾喜歡一層層麵包嘅口感，肉桂味都夠，但總覺欠些什麼咁，可能我嫌佢太polite，味道唔夠霸道。

🉐RamenGorRating -- 🍜🍜🍜SHOULD try

4. Po's Atelier

幾年前於上環普慶坊拍《分手100次》，試過佢哋嘅麵包，簡直是忙碌中的一股清泉。熱情過後，我決定再試，睇下仲係咪咁念念。

店方標榜artisan bakery，代表用料一定有別於出邊一般貨色，同時價格亦同檔次一樣高。比起朱古力無花果牛角酥，比較得我歡心嘅係價值$55嘅乾果黑麥。正點如下：

-麵包質感係最重要嘅，佢係屬外表剛強內裏脆弱型既Rye bread，用啲力咬開就可以享受到軟熟嘅麵包啦。
-入面嘅乾果包括果仁，提子乾，杏甫同西梅，當中果仁同我最愛嘅西梅佔大量。加入果仁能夠增加口感，而加入西梅咪就係令佢更好味！

可以更正點如下：
-黑麥包expect更香麥味。
-杏甫份量太少喇。

🉐RamenGorRating -- 🍜🍜CAN try

5. Paper Stone Bakery

有無Baguette法包粉？🙋可能有人會覺得法包勁硬勁「難」(困難)食，但我同你講，一個好法包，唔應該淨係死硬，而係應該嚼勁十足。我就係欣賞佢外表剛強，內裡柔韌有餘嘅性格。嗯，好一個真.男人。

呢間麵包舖主打約十款口味左右的法包，林林總總好易選擇困難。結果我強行地隨便揀咗紅菜頭芝士法包，攞返屋企叮熱食係正確決定，讓芝士熱溶後變軟身。而麵包於加熱後仍然維持煙韌狀態。看似得個色嘅紅菜頭麵包原來亦不乏真實味道。

另外上面嗰位靚仔叫三重芝士米燒餅。偏硬身的薄片Rice bun好咬口，咸脆cheese skirt帶有輕量油份，唔會感覺太有負擔。買兩三塊用嚟夾下牛油搽下jam，立即變邪惡亦得。呢間舖雖然未至驚艷，但穩打穩紥，款式眾多，輕輕有回頭嘅衝動。

溫提:下午兩點去幫襯，法包熱辣辣出爐最新鮮！

🉐RamenGorRating -- 🍜🍜CAN try

※上述內容純屬作者個人意見，不代表本網立場。※