「一個人食飯食乜好？」相信呢個係好多人都諗或者面對嘅問題，好似冇乜奶油一支公去食放題或者鋸扒，於是有人會揀掃街、有人會揀食便利店或者快餐店，甚至有啲人會寧願唔食。但其實一個人食飯又有咩好怕喎？邊個話要一班人先可以食好西？下次唔使再問一個人喺xx食乜好喇，等開飯仔幫你揀啦，今次講下屯門。
秘製醬熱狗 Delicious
自己食通常都鍾意食啲簡簡單單、快快脆脆嘅嘢，即係好似熱狗咁。屯門呢間小店啲熱狗都幾特別，特別在於佢秘製醬汁嘅配搭。例如牛仔腸配香辣蒜蓉醬，好辣者啱晒。柚子蜜糖芥末醬，酸酸地又甜甜地咁，都幾好食。麵包會烘過，鬆軟得嚟又有啲脆口，芝士控嘅話唔使諗，加少少錢加埋熱溶芝士啦。
懷舊冰花大菜糕 萬芳冰室
冰室絕對係一個人食飯嘅好地方。萬芳冰室都有幾多懷舊嘢食。呢隻膠蛋，拆開係冰花大菜糕呀，而家真係唔知仲有幾多地方有得食！另外原隻蝦多士亦夠正宗，堅係成隻蝦加蝦膠咁釀咗入塊包度再去炸，彈牙爽滑脆口。再唔係叫個生炸雞脾吖，超大隻，即叫即炸，夠晒熱，又啖啖肉咁，自己食就算用隻手揸住成隻咁食都唔會有人話你。
泰式豬髀 陸她娜豬髀飯專門店
睇個名就知嚟呢度一定要食豬脾啦，泰式餐廳嚟嘅，但今次想介紹下，自己嚟食嘅話，可以試佢哋嘅彩虹湯河粉。湯底淺紅色，酸酸地，配料加啲豬紅呀豬潤呀粉腸呀呢啲冇乜幾多人肯陪你食嘅嘢，係爽嘅。
【一個人開飯】系列： |
上海排骨粢飯 上海豆漿大王
有時自己一個人，都會諗下舊陣時嘅嘢，嚟呢間啱晒，夠晒懷舊。餈飯豆漿舖唔係淨返好多咋，呢間都做咗廿幾年，而呢度嘅餈飯特別在於用咗上海排骨嚟做餡，食落啖啖肉。配返杯豆漿就啱晒，坐低食嘅不如叫碗熱嘅食，幾有風味。
大大隻雞脾 發發快餐
好多屯門嘅朋友，都好鍾意自己嚟呢間快餐店度食，一嚟由細食到大好有人情味，二嚟價錢唔貴呀，三嚟仲可以同老闆吹下水，解下悶。餐廳都幾多嘢揀，有飯有小食，豉油雞脾有成隻手板咁大㗎，好入味。薯條仲係波浪紋嗰隻，正。
文：Kar