見到呢啲舊式招牌、霓虹燈飾同咁懷舊嘅桌椅，係咪覺得自己返咗七十年代？不過呢度並唔係咩拍戲場景，而家銅鑼灣一間新開、佔地9000呎、並以七十年代舊香港為題嘅火鍋館。餐廳內隨處都感受到懷舊氣氛，湯方面除咗懷舊選擇，亦有唔少新式湯底。

呢個懷舊濃沙嗲湯，沙嗲味濃，有陣陣花生香氣，淥牛肉同出前一丁食就最啱。另外有而家好少見到嘅懷舊豬什湯，材料包括蝴蝶腩、豬粉腸、豬肚、蘿蔔，蝴蝶腩啲筋位特別爽口。

近年最興嘅黃金花膠雞湯，用原隻新鮮雞長時間熬製，再加上金華火腿及花膠。湯底杰身味道濃郁，打邊爐前可飲返碗暖吓胃。

配料方面亦有好多選擇，講到火鍋第一樣要食咩？咁就梗係牛肉啦。老闆極力推介呢個可以生食嘅極上和牛刺身，連埋洋蔥及自製醬汁食，好新鮮～

至於牛魔王一定要試試呢個牛王拼盤，一碟有齊澳洲牛、安格斯、手切本地牛、牛柳粒及牛脷粒，安格斯同牛柳粒肉質較軟腍，牛脂重；至於鍾意牛味重嘅朋友，就可以試試手切本地牛。

新鮮豬腳筋數量稀少，一隻豬得兩條㗎咋～需要淥30-45分鐘，所以記得一開波就掉晒落鍋內啦。豬腳筋口感爽脆，值得一試！

鬼馬蝦膠同海膽餃子亦係店內招牌之一，將蝦膠釀入油炸鬼內，淥佢一分鐘就食得，油炸鬼口感仍然keep 到脆口。至於海膽餃子平時就少見啲，海膽份量唔少，真係食到淡淡海膽味啊～

竹笙釀墨魚吸晒湯，放落沙嗲湯食就夠晒惹味，手打四寶丸包括牛筋丸、墨魚丸、梅菜豬肉丸及鮮蝦丸，粒粒都咁彈牙！

樓下火鍋飯店   

地址: 銅鑼灣謝斐道441號駱克大廈A座地下A號舖及地庫

文：Yanica

相、片：Tom Li